VII  Il gudogn dil paun

Las rihezias naturalas
Ch'ins metti buca semplamein d'ina vart las rihezias naturalas ch'igl intschess da Tujetsch tegn tschelau en siu ravugl. Sidavon stat la crappa, sco per exempel il scalegl e las cristallas, caltschina e sal camutsch, in techet fier, zinc e plum e suren entgins garnetschs aur e plinavon la turba. Per far rauba denton drova ei dapli.

Il scalegl
Ina veina clar grischa da scalegl setila silla costa dretga dalla vallada dil Rein e mira ora odem la Val Sumvitg epi danovamein a Mumpé-Medel ed a Nual, tonscha sur l’aua vi sil Calmut e dat la davosa cuchegiada a Hospental.
En scadin cass ch'ils vischins da Tujetsch ein dai avon biars onns sil crap scalegl, schebi ch'ils emprems indrezs da scaldar ein stai empau pli sempels, sco per semeglia far cauld plattas da crap e far pegnas da mir. Dallas empremas pegnas da scalegl pudessen datar neu digl onn 1740, forsa; per pressapauc 100 onns pli tard ein las pegnas scalegl sefatgas per propi. - Ed igl ei pli che mo remarcabel che ual glieud d'ordeifer ein s'empitschada dil scalegl ella val. Ins sedamonda, schebein ils Tuatschins vevien buca raps, ni forsa e buca regl d'interprender enzatgei.
Ils anno 1867 muentan in Colblezer dad Amsteg ed il Walker da Schattdorf la damonda d'explotar il scalegl ella Val Tujetsch. Ils Tuatschins fredan l’aura e setenessen plitost cun in'offerta da nossas varts. Ed els scrivan ora il crap ella Gasetta Romontscha. Collemberg e Bisquolm da Mustér s'annunzian e la vischnaunca lai vi la veina. Probablamein ei l’interpresa nuota sefatga dil meglier; igl interess ei tschessaus ed igl onn 1897 conceda Tujetsch gratuitamein scalegl alla claustra da Mustér per ils altars ella baselgia da Nossadunna. - Pauc sissu, igl onn 1901, sefa danovamein in contract denter Tujetsch e Gion Battesta Collemberg, pigner a Mustér, e quei per Calmut e Nual; ins ei vegnius perina per 5-6 onns cun explotar ina tiarza dalla crappa a Nual e las autras duas sil Calmut, in cun l’auter denton buca dapli che 1200 peis. Las indicaziuns ella scartira ein da muntada:

- ils prezis ein fixs e muntan per Nual 15 raps, per Calmut 12 raps il pei, quei che fuss matei pressapauc 30 cm³
- fender e buca sittar la crappa (lavagar la pastira)
- finir en in liug avon ch'entscheiver en in auter (serasar!)
- il scalegl ei da dar giu als Tuatschins per 60 raps il pei ella mina
- las cauras pil latg han il dretg da pascular gratuitamein
- il fein pil letg e la lenna morta ein semegliontamein da dar giu per nuot

All'entschatta ha la fatschenta cun dr. G. Brauchlin da Mustér, quella da calonda october 1916, fatg ina hazra pareta. En num dalla ovra da talcum a Sumvitg/Surrein fa el amogna pil scalegl en Tujetsch la summa da 1000. - francs mintg'onn e per in vagun da 10 tonnas treis francs l’in e sch'ei survarga ils 500 vaguns per onn, allura 4. - francs il vagun. Entochen che l’explotaziun entscheivi per propi, s'oblighesch'ins da pagar annualmein 300. - francs. Culs 15-6-1918 mida il tgamun num e secloma da lu enneu Montan- u. Rohstoff AG, Mustér. Alla testa stat dr. G. Brauchlin, il parsura dil cussegl d'administraziun. Culs 14-1-1919 seretila la fatschenta dil contract e fa valer ch'ins vevi fatg il quen cun la viafier dall'Alpsu che vegni ad interim buca baghegiada. La suprastonza da Tujetsch sevolva tier igl advocat dr. G. Willi da Cuera che cusseglia da secunvegnir; ei vali buca la peina.
Denteren lavura il cavacrappa Remigio Locatelli, sesents a Sedrun, ella cava sil Calmut, ferton ch'il pigner Johann Jacomet dad Acletta tschenta repetidamein damondas alla vischnaunca per prender si il Calmut, sco per semeglia ils onns 1912, 1913 epi ils 9-1-1927. La finala secunvegn la vischnaunca cun Gion Battesta Jacomet Flury d'Acletta per il prezi da francs 20. - il m³; el dueigi sez denton secunvegnir cun Remigio Locatelli pervia dalla cava sil Calmut. A Nual perencunter ei Gion Battesta Jacomet persuls e paga francs 40. - per il m³. Denter Calmut e Nual ha ei dau da sestrer, tocca ch'ins ha spartiu las duas cavas. Naven dils anno 1933-1937 ha il cavacrappa Giusep Berther da Gonda/Sedrun giu la cava dil Calmut, Gion Battesta Jacomet dad Acletta encuntercomi ei secuntentaus cun Nual e quei cun adina puspei renovar ils contracts entochen 1947. Explotaziun a Nual 1943: 4.55 m³ a 50. - francs = 227.50 sco indemnisaziun alla vischnaunca da Tujetsch.        .
Schebi ch'ils Tuatschins sezs han nuota propi vuliu morder en, ein els ora ed ora stai dall'idea ch'ei selaschi far daners cul scalegl. Nual ei damaneivel dalla «gliut da dadains gl'uaut» e 4 giuvens da Selva: Venzin Benedetg, Venzin Stiafen, Loretz Gaudenz e Deflorin Pieder fan in contract cun la vischnaunca arisguard l’explotaziun a Nual. La scartira datescha dils 10-11-1944, ina cunvegnientscha da dus onns cun indicaziuns sco las ulteriuras. Enzatgei onns avon fuvan era Giusep Zazzi e fegl s'interessai per Nual e per Calmut. Cun ina brev dils 27-7-1950 s'occupeschan Benedetg Valier e Baseli Schmed cun la cava a Calmut, ina damonda alla vischnaunca che manegia veramein serius. E la suprastonza communala rispunda ch'ella seigi ad interim ligiada e sappi buca far cunmeins. Atgnamein naven digl onn 1942 ei Carli Baselgia da Cumpadials a Langenthal sespruaus da vegnir en contact pervia dalla cava sil Calmut. Finalmein vegn el a sté ed ils dus contracts dils 12-6-1945 e quel dils 22-7-1946 plaidan d'in spert serius d'interpresa. - Dalla biala entschatta enneu ein las difficultads vegnidas grondas; Carli Baselgia ei sestentaus scosauda ed ha dau lavur a passa in tozzel luvrers indigens. E per ses 35 m³ digl onn 1946 ha el tuttina pagau alla vischnaunca da Tujetsch 1575. - francs e suren aunc 12 vaguns material manedel a frs. 5. - il vagun.
Per in um persul fuva la fatschenta onz greva; a Sedrun sefuorma ina societad d'aczias «Ovra da pegnas da Tujetsch, SA Langenthal». La speronza ei carschida il mument che la firma nova ha baghegiau in baghetg silla ravera dil Drun a Sedrun. (Oz casa da colonias da Clemens Monn-Gamboni.) La taxa dils 10 raps per 1m³ occupau ei tuttavia buca stada giud via.
Cun la cunvegnientscha dils 26-6-1946 ei Gion Giusep Jacomet da Mustér semess en a Nual; cun ina dunna da Tujetsch eis el scochemai staus da casa ella val ed il contract muossa buca ora puncts apartis. L'explotaziun ei sefatga e secloma:

- 1955     6,33 m³ = francs 316.50 (pia à frs. 50. -) 
- 1956     3,74 m³
- 1957     2,68 m³
- 1958     3,98 m³ 
- 1959     6,55 m³

Lein dir ch'ina pegna ordinaria drovi approximativamein 0,3-1,5 m³ scalegl schubergiau. Ton che Gion Giusep Jacomet fageva al pli 15 pegnas mintg'onn. Ed el ei staus in bien contrahent ed ha adina puspei renovau il contract a Nual e quei entochen sia mort prematura dils 26-10-1974.
Pervia da pagaments ha la vischnaunca da Tujetsch visau il contract calonda matg 1954 e l’Ovra da pegnas a Tujetsch ha buca acceptau la visada. E la finala eis ei tuttina iu en nuot. La collaboraziun cun la Serpentina a Hospental dils 20-10-1965 ei era buca sefatga ed ei semegliontamein dada ell'aua. Cun l’interpresa dalla Serpentina SA ad Erstfeld eis ei buca iu bia meglier. La cunvegnientscha dils 5-10-1971 veva giu priu ina stupenta entschatta cun ina taxa annuala da francs 4000. - (in'explotaziun da 250 m³ = francs 4000. -) e per ulteriurs m³ francs 15. - l’in e per ils curdems (rauba manecla) accurat il medem prezi. Ed il resultat ei puspei staus poverets, plitost disgusts e visadas ufficialas per vegnir en culs raps.
Dapi igl onn 1976, naven dils 1 d'avrel, ei Barclamiu Berther, tschentapegnas a Sedrun, in explotader da num sil Calmut. El ei s'obligaus da pagar francs 120. - il m³ ni silmeins ina summa annuala da francs 800. -. Igl avrel 1981 ei Barclamiu Berther semess en cun la firma Murer SA Tujetsch e las pegnas d'ozildi sevendan bein, aschia en vesta dallas historias ch'ins ha cugl ieli. Ina survesta en nos dis muossa ora:

- pegnas pintgettas (70 x 60 x 80)                      frs. 4-6000
- las ordinarias 100 x 100 x 30)                         frs. 7-8000
- quellas cun baun pegna ed aschia vinavon        frs. 18 000
- ina execuziun da luxus                                    frs. 30 000

L'explotaziun sil Calmut ei carschida da detschiert e la crappa vegn tagliada a Schmerikon ella grossezia da 10 cm, quellas plattas che tuornan allura a Sedrun el luvratori giul Drun. - Buca meins che treis luvrers stattan vidlunder ed han fatg per semeglia igl onn 1984 ventgaquater pegnas. Ed igl onn 1985 ha la firma Murer SA Tujetsch explotau 41,574 m3 e paga alla vischnaunca pil m³ francs 120. -, pia ina summa da francs 4'988,90.

Il svilup enteifer ils davos 80 onns ei singulars:

1900 ha ina pegna custau                   frs. 80- 100
1930                                                 frs. 200- 250
1950                                                 frs. 650- 800
1980                                                 frs. 7000-8000

Fontaunas
Gadola, Guglielm. La Cadi, dal pugn da vesta economic ed industrial. En: Il Glogn, annada 22/1948, p. 80-122
Venzin, Gion Antoni. Extract dils protocols da vischnaunca 1838-1948. Privat. Giusep Alig-Venzin, Salins

   
Miniers e minieras da fier
Ella Synopsis (resumada da scartiras) stat ei scret che avat Adalbert II hagi ensemblamein cul cumin dalla Cadi schau vi per tscheins 1658 tut ils fuorns da metal sil territori da Tujetsch ad in cert bandierel Duri Soliva ... Ed en quei cass vess ei stuiu esser plirs fuorns ed aveinas da differents metals.
Ils mussaments veseivels ein scarts; els ein denton evidents, sco per semeglia sin las palas dil Tgom dalla vart da Nalps, ual dado la Val blaua. La mina ei franca e secava meters e meters, silmeins curonta, viaden ellas costas dil cuolm. Silla preit osum stat l’annada 1679 engravada. Con lunsch ch'ils miniers ein sefuritgai egl intern dalla tiara, gliez ei ina damonda. Igl ei denton da supponer ch'els hagien tschercau ils minerals da fier els platters dil Tgom. E ... l’expediziun viaden el dadens dil cuolm vegn ad esser stada plitost in mistregn da puorla e miarda che ha serrau il pez - ed il suadetsch dils umens - lez ei il sal dalla crappa.
Agradgiu sil plat dalla val, sper l’aua da Nalps, secatta il liug, il liug che senumna aunc oz ils Falluns. Sche lein nus metter il cass ch'ils miniers hagien lavau leu il fier.
A Tgatlems ei zatgi semegliontamein ius ad encurir minerals da plum; la tscherca ei dil reminent pli pauc enconuschenta, pli u meins sco las alas fier enta Cavradi.
La crappamorta sill'ala dretga dalla Val Tujetsch cuntegn insumma minerals, schizun aur. - Giudapeis al crest da Cavorgiasura, da maun seniester dalla via da Valzeinza, ha Giachen Hendry-Monn possediu in'acla cun clavau e nuegl. Da rugalar la via vitier il nuegl ha el anflau crustas fier, in entir tschuat.
E dallas minas dalla Val Medel tschontschan ins dapi da daditg enneu, digl avat Giachen per exempel e dil plum en argien ed era dil pirit. L'ucliva da Fuorns dat perdetga ed il zinc ord la Val Cadlimo ei enconuschents.
L'interpresa da fier a La Punt ei sefatga all'entschatta dil schenivavel tschentaner. Ton la cava da Rueun (Schmuer) sco quella si Sursaissa (Viver) ein stadas sut la reschia dalla societad a La Punt. Ils minerals da plum e d'irom hart rendiu pauchet, ual sco la luentera dils anno 1826 a Trun, malgrad ch'ins veva tuttina investau 200 000 flurins.

Fontaunas
Berther, Baseli. A Camischollas. Notizias cultur-historicas ord la Vall Tujetsch. Mustér 1917
Salis, Friedrich von. Beiträge zur Geschichte des bündnerischen Bergbauwesens. II. Der Bergbau im Oberland. En: Jahresbericht der Naturforschenden Gesellschaft, Neue Folge, 1861/62, S. 173-189  
Dapli mira era: La ruosna da Palits

Las palius da turba
Ils quendisch da fenadur 1917 ha Giusep Brugger, posttenent a Cuera, fatg ina damonda alla vischnaunca da Tujetsch d'astgar cavar turba a Plidutscha. La Paliu dultscha secatta denter Tgatlems e la siara da Maighels ed ei sco Surpalits e Muschaneras terren da turba.
Tschels onns ha principalmein la glieud da dadens igl uaul, ils vischins da Tschamut e Selva, fatg diever dil scaldament a turba. - La turba sezza ei ina dallas davosas restonzas neu dil temps glacial; ella cuntegn datier da tschunconta per tschien cotgla ed ei la lenna dils paupers che han dad acceptar la muoschadad ch'ella derasa e suren aunc in tgamin da rascha.
La lavur dil cavaturba ei stentusa; amiez la paliu tila el la canal cun ina corda e taglia cul badel da tagliom plat il tschespet ch'el caveglia d'in maun per cuvierer silsuenter la cava, la cava che sefa in meter entochen in meter e miez afuns. Ils quadrels cotschens che setilan magari sin mellen e brin, quadrels da 20-25 centimeters cubics, ch'il cavaturba rasa ora dasperas la cava. Entochen il di ch'el caveglia ils cubs en fuorma da meidia u fa ordlunder in um crap. Ed el sesprova che la turba hagi pauc contact cun la tiara, sinaquei ch'els vegnien dabot secs e ners da tuttas varts. Tut mantuns che sefetgan ad ault sco l’enzenna stgira d'ina profezia.
E vonzei ein els vegni, ils dels da Selva e Tschamut, cun benagls e carrs ed aschia e la turba ha cuau bein e zatgi ha saviu sescaldar.

Fontaunas
Venzin, Gion Antoni. Extract dils protocols da vischnaunca 1838-1948. Privat. Giusep Alig-Venzin, Salins

Las caltgeras da Pardatsch
La greppa smuttada e melnauna denter las auas dalla Val Gierm e dalla Val Nalps muossan ora; greps da caltschina siper ils gliemets dallas plauncas. La Val Gierm ei dalunsch ed il grep da caltschina en Pardatsch ei staus relevonts. Ina caltgera onz pli veglia secatta giudapeis al grep, ferton ch'ina secunda ei in tgaubriechel sur la punt.
Ei stat scret ella nudauna ed ils contracts ein enzatgei da num. Sco per semeglia quel dils 28 d'uost 1858 denter la vischnaunca e Giachen Antoni Schmet e Giachen Martin Giger e sco tierz il Barclamiu Gieronimi da Ciavana (Clavenna?) neu dil comune di San Giacomo che di cun expressiun, tgei ch'ils surprendiders hagien da far, sco per exempel:

- ereger ina caltgera nova, cun la bucca encunter igl uaul da Cavorgia
- ella ha da cuntener silmeins sissonta salmes (matei entuorn 4800 liters)
- curonta francs indemnisaziun per baghegiar il fuorn niev
- cura ch'il diember necessari d'empustaziuns ei avon maun, tontas e tontas brels, silmeins trenta, forsa, fixescha la vischnaunca il temps da barschar (buca ual sil pir far fein)
- ch'ins detti ina mesira fil e streha e In buca crappa, tschendra u puorla
- ch'ils surprendiders verteschien la controlla da vischnaunca
- Per l’erecziun dalla via o gl'uaul da Cavorgia ed il fuorn dat la vischnaunca trenta umens che lavuran dallas otg entochen allas quater, cun pussar in'ura denteren
- ils surprendiders dattan ina segironza da sis onns alla vischnaunca

In secund contract datescha digl onn 1866 - denter la vischnaunca e Giusep Antoni Bisquolm da Mustér, per diesch onns quella ga. Il surprendider furnescha alla vischnaunca la caltschina per treis francs e tschunconta raps il salme e paga la lenna da brisch cun tschun francs la tschuncheisma.
Igl ei la primavera baul dils anno 1910; Giachen Martin Hendry e Tumaisch Schmed da Cavorgia ein uonn ils surprendiders. Eis stattan sidavon la caltgera sper la punt sur l’aua da Nalps. Il Tumaisch veva pluminau ed il Giachen Martin ha dau suenter - da semetter en e barschar la caltschina. Siu cusrin ledi cul regl d'interprender ed el, il Giachen Martin Hendry, cun ses treis affons pigns - e la Barla Catrina spitgava il quart ella casa sil crest a Cavorgia. Per gnanc trenta raps mintg'ura - e luvrar di e notg, quater dis silmeins.
Ella suoschna dasperas la caltgera semiran ils umens tier, semettan meinsvart per liung e spetgan la scumiada, essend ch'enzatgi ha traso dad esser en pei.
Il tagliament ei sparunaus da mintga vart ed igl arviul tegn sc'in fier la crappa manedla, forsa ella grondezia da biabein ina curtauna.La cuvrida da dascha e sissu la cozza d'arschella ha dau in tschuat lavur als surprendiders.
Dil bural amiez l’arschella tschessa il fein e l’aria che dat afuns ueglia e muenta il fiug. Il Tumaisch Schmed manischescha ed empiala culs tils dallas varts e suten; ei secapescha cul fing e quei ei siu misteri. Cura ch'el tila tec a tec il fing per l’entira caltgera entuorn. Per cura che la flomma setila e spida in recent blau, siara ei ils tils suren e suten. Ed en pressapauc dus dis e miez ei la caltschina barschada. - Il mument ei singulars, il mument che las menadiras arrivan en da Nacla, cun benals e sliusas scultas ed ils purs han spir damondas sin bucca.
Il Tumaisch Schmed ed il Giachen Martin Hendry stattan eri e miran ensi encunter il Tscher; els sminan omisdus che l’auter onn vegni la caltschina a vegnir da sutensi, en sacs ed aschia.

Fontaunas
Venzin, Gion Antoni. Caltschina viva. Studi historic-cultural. En: Igl Ischi 1949, p. 82-87  
Dapli mira era: Il barschar caltschina
  

Cristals e cavacrappa
Per ei 18avel tschentaner han ils alpinists perscrutau las Alps, ascendiu per l’emprema gada nossas tschemas e svegliau il senn per la bellezia da nossas muntognas. Las muntognas che eran entochen lu in mund scarschentiu ed untgiu, il reginavel dallas strias e dil barlot, ein daventadas il simbol dil ruaus e dalla bellezia.
Il pli enconuschent exploratur da nossas muntognas ei pader Placidus a Spescha staus (1752-1833). El ha percurriu ina gronda part dallas valladas e pitgognas grischunas, oravontut denton las stgeinas e pezzas dalla Val Tujetsch. Sco emprem ha ei ascendiu il Pez Ault, il Pez Giuv, il Pez Tgietschen, il Badus e traversau nossas vals lateralas. Pader Placi a Spescha era buca mo in renconuschiu alpinist, bein era in versau mineralog ch'enconuscheva gia da siu temps buca meins che 50 minerals. El decuors dils onns veva el rabitschau ensemen ina biala collecziun ch'ei deplorablamein vegnida confiscada dils Franzos. Senza dubi ha il conventual, ch'ei era staus caplon a Selva, insinuau nos vischins da vegnir cun ei ed ir per cristallas. Las cristallas eran per ei ina fontauna da gudogn, in agid beinvegniu per ils muntagnards.

Cun quei patratg propona ei da crear a Glion ni a Trun in deposit central da cristallas e da cumprar ina mola. Trumpaus dil nunsuccess pren ei sez enta maun la caussa e diregia il commerci da cristallas buca meins che 40 onns.
Cristallas, quella marvigliusa crappa, han ins appreziau da vegl enneu. Viandonts e pasturs ch'engartavan cristallas per schabetg han segiramein rabitschau las pli bialas a casa. A partir dil 14avel tschentaner entochen viaden el 18avel ei la claustra stada fetg activa ell'explotaziun da sias minieras en Surselva e dirigiu cun bien inschign il commerci da cristals e minerals. Ins astga supponer ch'era enqual Tuatschin segidava en quei risguard. Scadin cass ei pader Placidus a Spescha gl'emprem ch'ei ius cheu tier nus sistematicamein per crappa ed era stimulau ils indigens da seprofitar da quels beins naturals.

En ina vischnaunca spirontamein purila eran las resursas pintgas e mintgin stueva mirar co sedustar. Per cristallas ein ins i per gudignar empau raps, per nutrir la famiglia. S'entelli, ideal e plascher drova ei era, pertgei ir per cristallas ei nuota bialaveta!
El 19avel tschentaner stueva igl ir per crappa vegnir praticaus ualti stedi, pertgei ils 30 da mars 1884 concluda la vischnaunca «da trer ora ina cumissiun per sedeliberar e s'entelgir, sch'ins savessi buca metter si ina certa taxa a quels che cavan mineralias sin nies territori».
El regulativ sur dallas grevezias e dalla gudida da tuts beins communals dalla ludeivla vischnaunca da Tujetsch, anno 1885, stat ei lu scret: «Mineralogs che fan diever da quei mistregn sin nies territori han da retrer tier la suprastonza ina patenta e pagar per quella en cassa communala frs. 50. -.»
Ina aschi suarada taxa han ils cavacrappa buca acceptau e sin camond dil cantun sto la vischnaunca dils 6 d'avrel 1885 sbassar la patenta per la mesadad, pia sin frs. 25. -.

Da lezzas uras eran in per da nos pli enconuschents cavacrappa sil meglier.

Era en nies tschentaner savein nus enumerar entgins cavacrappa fetg activs e versai.

Cavacrappa d'occasiun ha ei dau aunc bia auters. Biars eran plitost ils vischanders dils capomineralogs, auters ein mo i cuort temps suenter quels scazis.
Las duas uiaras mundialas han lavagau la fiera da cristallas e reduciu considerablamein il diember dils cavacrappa. La tscherca era fetg pintga ed ils cavacristallas stuevan esser leds da vender crappa da mular per 1-3 frs. il kg.
Era ils onns suenter la secunda uiara mundiala e duront l’erecziun dils implonts electrics (1955-1966) fuva igl anim dir per crappa fetg pigns. Sper in per ch'eran sils onns era ei atgnamein mo pli dus, treis giuvens che mavan ualti stedi suenter crappa

Tochen viaden els anno 1960 eisi stau in temps miert, senza grond interess per cristals e minerals.
Silmeins ina gada ad onn vegnevan ils cumpraders, Häfliger da Basilea, Sicher da Gurtnellen e Nell Caspar da Caschinutta, ella val e cumpravan las anfladas.
La conjunctura aulta cun lavur e grond gudogn ha lu vivificau il commerci da cristallas ed era midau da rudien las relaziuns economicas. Culla jamna da lavur da 5 dis e las vacanzas prolungidas ha la glieud giu pli bia temps liber a disposiziun. Quei temps han naparts impundiu per star en gamba, per satisfar al basegns da moviment ed ina occupaziun corporala. In'attractiva occupaziun accessoria che sa era purtar in cert gudogn ei igl ir per cristallas. Da quei ein pli e pli biars vegni pertscharts, e suenter ils anno 1970 ei igl interess per cristals e minerals carschius considerablamein; igl ir per crappa ei bunamein daventaus ina pissiun populara. Naturalmein ha era la gronda propaganda dallas differentas uniuns, las numerusas fieras (buorsas) e las bialas exposiziuns cudizzau biars dad ir suenter crappa. 1980 han 42 indigens e 51 jester priu la patenta annuala; la vischnaunca ha dau ora 194 patentas dil di.

1985 eisi stau 48 indigens e 44 jasters che han giu la lubientscha annuala ed 125 persunas han priu patentas dil di.
Indigens e jasters tegnan pia ualti bein ballontscha.

Negozi da cristallas e minerals
Ditg e liung ha pader Placidus a Spescha diregiu il commerci da cristallas. Suenter el ha siu amitg, il plevon Giusep Hitz da Sedrun, cuntinuau il commerci intermediar.
Vonzeivi han denton ils cavacrappa indigens surpriu la funcziun da precumpraders. Els vevan contact cul grond mund, tenevan ils fils enta maun e tras lur mauns anflavan las cristallas la via ora el mund. Enconuschents precumpraders fuvan: 
Carli Cavegn, Tschamut
Luregn Giacumet, Camischolas 
Adolf Cavegn, Sedrun 
Ambrosi Cavegn, Sedrun 
Gion Antoni Hitz, Rueras

Entochen lunsch viaden en nies tschentaner era il contact cul mund minims, savevan ils biars strusch tudestg, era l’informaziun concernent cristals e minerals pli che munglusa. Aschia eran ils cavacristallas, oravontut ils novizs, dependents dils precumpraders. Quels diregevan la fiera, fixavan ils prezis ed ils auters stuevan esser leds da saver vender lur anfladas, era sch'ella vegneva buca adina pagada tenor valeta. Avon e suenter la secunda uiara mundiala, cura che mo in per mavan per cristallas, vegnevan ils precumpraders d'ordeifer, dall'Italia (Magistretti), dall'Engheltiara (Ashcroft F.N.), dalla Spagna (Folch), dalla Frontscha (Frenkel), neu digl Uri (Nell Caspar e Sicher Valentin), si da Basilea (Häfliger) ed aschia vinavon.
Oz ein ils precumpraders ton sco svani. Mintgin va sez a fiera ni venda ad interessents che vegnan en casa. Il prezi sedrezza tenor l’offerta. Damai che la purschida ei oz fetg gronda, ei la fiera saziada ed ils prezis plitost bass.
Igl ei semidau da rudien. Ils cavacrappa ein organisai, fan part dallas uniuns localas, cantunalas e dall'uniun tetgala svizra. Quellas arranschan onn per onn fieras, schinumnadas buorsas, nua che mintgin sa far venal sias preziusadads e dumandar informaziun. Milsanavon organiseschan las uniuns exposiziuns, referats e sentupadas d'instrucziun. Dil reminent dat ei plunas cudischs che descrivan igl inschign d'ir per cristallas e las enzennas caracteristicas.
Oz sa pia mintgin s'informar e sez disponer. Il temps da menar l’in ni l’auter davos la cazzola ei spiraus definitivamein.
L'Uniun cristal Tujetsch ei vegnida fundada igl onn 1978.

Patentas per ir per cristallas
L'emprema taxa ei fixada el regulativ dallas grevezias e dalla gudida da tuts beins communals dalla ludeivla vischnaunca da Tujetsch, anno 1885, e munta a frs. 50. -. Il medem onn eis ella vegnida sbassada sin frs. 25.-. Sto esser ch'ins mava fetg stedi per cristallas. Il vegl Hitz raquintava schon che tut ils da Selva e Tschamut mavien per crappa e ch'ils Giacumets purtavien las cristallas en scharls o da Strem. Denton ei la rabia tschessada e la taxa ei sesminuida a frs. 5. -.

Survesta

Entradas
Entochen 1965 vegnevan las patentas da cristallas incassadas cul quen communal. Perquei eisi grev d'eruir igl exact import. Quel era denton minims.

Incasso per lubientschas dad ir per cristallas:

Quei rapid carschament d'entradas muossa claramein ch'igl anim dad ir per cristallas ei carschius constantamein.

Collecziuns privatas e cabinet da cristallas communal
Nos vegls cavacrappa vendevan tut quei ch'els anflavan. Per els eran las cristallas ina part da lur existenza. Entschiet a collecziunar han ins per entuorn ils anno 1950. Enqual biala buccada metteva il cavacrappa en scaffa «da glas» ni zanua en in zuppau. Oz ch'ins ha buca aschi basegns da raps ha quasi mintga cavacrappa sia collecziun privata. Aschia restan ils pli bials cristals e minerals en nossa val, quei ch'ei da beneventar zun fetg.
Igl onn 1978 ha la vischnaunca realisau siu cabinet da cristallas. Gnanc da far curvien, en suprastonza eran 3 cavacrappa: Vigeli Berther, Tumaisch Monn e Vigeli Giossi.
Igl emprem era il cabinet plazzaus ella casa Cadruvi, oz ei quel el museum communal «La Truaisch» e fa buca mal parada.
Ils daners che la vischnaunca incassescha per patentas impunda ella cumpleinamein per la cumpra da cristals e minerals e per la meglieraziun dil cabinet. In tal agir mereta renconuschientscha.

L'explotaziun
Ils emprems cavacrappa vevan bi far. Els anflavan segiramein bia fuorns aviarts e savevan mo encurir si ils scazis. Ditg e liung han els giu pastg entir, gattis bein veseivels e bunas cundiziuns. Cul temps ei tut vegniu pli rar; ins ha stuiu ir pli lunsch e far pli bia lavur.
Per arver fuorns pli stinai han ins lu entschiet a duvrar el 18avel tschentaner puorla nera. Furar a maun era hanau e schluppentar cun puorla nera fetg prigulus. Pli sempel e segir eisi oz da siglientar cun patronas explosivas.
Igl onn 1965 han ils dus cavacrappa Lucas Monn e Tumaisch Curschellas cumprau l’emprema maschina da furar crappa. D'ina tala maschina purtabla, era sch'ella pesava entuorn 40 kg, semiava gia il bien Gion Antoni Hitz.
Oz han buca meins che 10 cavacrappa maschinas da furar che vegnan oravontut duvradas en Cavradi.
Cul furar e schluppentar ei la quietezia da tschels onns svanida.

Anfladas singularas
Igl onn 1934 ha Luis Curschellas-Berther da Surrein anflau el Pez Blass ina cristalla (clutger) che peisa 82 kg. Ella ha ina circumferenza dad in meter ed ei 65 cm aulta. Igl ei il pli grond cristal dil Grischun. Il clutger paradescha el museum da Friburg.
Cavradi ei il sulet liug sigl entir mund, nua ch'ei dat hematit cun si rutil (alas fier).
Il pli grond fuorn ch'ins ha anflau en Tujetsch ei il fuorn da fens sil Culmatsch. Ils cavacrappa vevan montau lien petgas da sustegn ed ei eri in pign caplut. Il Geromini ch'ins veva clamau per gidar ad explotar veva denton manegiau: «Na, na, ain co la'l Geronomi betga la pial!» Igl onn 1967 han ils frars Curschellas da Surrein e Lucas Monn da Sedrun fatg ina biala anflada. Ils petgens gronds e clars dad entadem la Val Strem (Pezs gits, sut il Pez Tgietschen) ein mess en salv en «La Truaisch» (museum tuatschin).
Forsa ch'ei dat en Tujetsch bunamein 100 sorts da cristallas ed ellas ein quasi senza paregl, ton da vart dretga sco da vart seniastra dil Rein, sco per semeglia:

1. Claus, Pardatsch e Nalps 
- cristalla da guilas
- monocit 
- anatas 
- xenotin
- fens (titanit) e prenit

2. Curnera
- hematit (alas fier) 
- amatista

3. Val Val 
- adular 
- albit
- fluorit
- alas fier pintgas (rosetta)

4. Val Giuv
- cristalla nera, stgir-brina e brina 
- milarit
- mulau 
- tschelit

5. Val Milar
- cristalla nera 
- desmin

6. Val Strem 
- scolacit

7. Val Maighels 
- epidot

Fontaunas
Hitz, Gion Antoni. Per crappa massel jeu bugen. Lavur edida, introducida e commentada dad Alfons Maissen. Cuera 1971. (Studia raetoromanica; 7-9) (Sep. ord: Igl Ischi, 1967-68)
Maissen, Flurin. Mineralklüfte und Strahler der Surselva. Fuorns e cavacristallas. Mustér 1955. (Diss. Fribourg)

Mistergners ed industria 

Il Sep Antoni Hafner
Hafner nuot, plitost scadler ni figulant, ni semplamein in luvrer che fa vischala da tiaracotga. Ed el ha giu num Sep Antoni Deragisch, siu fegl era, ed il descendent dil secund Sep Antoni ei staus il Duri Vigeli Deragisch da Bugnei. - Dil fuorn el plaunterren che cunteneva tuttina melli tocs enina e dil luvratori sut la stiva cun la roda digl uler ed ils models differents - nuot, lidinuot pli.
El, il vegl Sep Antoni Deragisch che fuva vegnius si dil Schuob ils 29 da mars digl onn 1834 cun in prima attestat, suttascrets dil burgamester Weber, ed ei stat scret lien:

«... dem 19 Jahre alten Joseph Ant. Deragis von Tavetsch Canton Chur beurkundet, dass er nach ordnungsgemäss erstandener Lehrzeit sich der durch die Gewerbe-Ordnung vorgeschriebenen Prüfung unterworfen und dass er dabei solche Kenntnisse in seiner Profession bewiesen hat, dass er zum Gesellen befördert ... u

Ed a Bugnei ha el scochemai entschiet cun siu mistregn sper la lavur dil funs ed ils dis da malaura. Leu nua ch'el ha dau fuorma, bein ina zun mudesta e per la glieud sempla, a ses ruogs, allas caffetieras e broccas, a scadialas e miolas, a crucifix ed a parlets d'aua benedida, als brocs da flurs, a naschors e tentaschors. Epi - ha il Sep Antoni teniu ault las pegnas da tiaracotga (da quadrels). En sia stiva ha el fatg ina - aschia per mussar ora. Mo encunter la pegna scalegl ha el drizzau ora pauchet.
Cun la rata u cul carret eis el semess sin via, engiu ed ensi, da Tschamut tocca Glion, la fatschenta mava buca mal. E nuotatonmeins ha la gasetta «Igl amitg della Religiun e della Patria» susteniu la nova industria, sco per semeglia el numer dils 10 da schaner 1838, sut il tetel «Tuietsch».
«... Schon dis ed onns ha la Patria grischuna termess naven grevas summas daneers per vischalla ed autras faturas de tiarra-cotgia. Ussa aber havessen nus ina fabrica de semiglionts artikels denter nus. Passa in onn ei tscheu in figulant (luvrer de tiarra-cotgia) che ha baghegiau si fuorn e laboratori, e producescha da tuttas sorts faturas da tiarra-cotgia sco vischallas, quadrells per pegnas etc. Ei fuss ludeivel, sche buns patriots e sez la Regenza encuressen de sustener quella e semigliontas interpresas cun ina ner l’autra favur ... »
Ei tucca era cheu da sepagar da raschuns. L'arschella giu dalla Val Fistatg (sillas plauncas dil Cuolm da Vi) ei nuota stada pli ch'in ton, las colurs dalla glasira han entschiet a vegnir onz caras, sco la lenna da scaldar il fuorn era ed il Sep Antoni il secund vess munglau dar la vischala miez per nuot. Ton ch'el sez ed il fegl Duri Vigeli Deragisch han survegniu avunda; cun la tiarza generaziun ei l’industria da Bugnei ida en.

Fontaunas
Gadola, GuglieIm: La fabrica de vischala de tiara cotga a Bugnei. Tenor P. Notker Curti. En: Il Glogn 1929, p. 34-37

Il taglialenna
Enstagl dad ir vidaneu han ils umens dulau la lenna rodunda sil plaz, sco per semeglia amiez igl uaul, mintgamai sin dus bucs da lenna robusts. Ils taglialenna han tschentau il lenn rodund per liung e cul dies ensi, sinaquei ch'el prendi si la frida. E suenter la viulta dat in um la crena e tuorna a volver ensi, fermond el davon e davos cun dus punachels. Cunquei che la lenna rodunda ei buca scursada, dattan ils taglialenna la stiala. La tenta da scarvun ed aua el truc da lenn da forsa ina grondezia da trenta sin vegn centimeters ei ni dira ni rara ed ha la colur vulida. La corda da diesch entochen quendisch meters lunghezia che vegn neu digl asp setila atras la titgira. Cun in zuic anetg dosta in dils umens la tenta danvonz che squetra giun plaun u magari e enviers in aspectatur da marveglias.
Ina corda bugnada ulivamein dat ina lingia schubra. Buca senza quitau stendan ils taglialenna la corda sul lenn vi e lingieschan cun ina stendida anetga. Ina lingia nunsurveseivla ed uiarscha resca furschalas. - Ei capeta ch'in um pli passau sesa sil lenn e pren giu la plema dalla frida. Aschia per rir numna ins el il gavun marsch.
Cun fridas ulivas allontaneschan ils taglialenna la part groppa dil lenn e la sigir aulta fa buna lavur. La sigir lada perencunter dalla quala ins fa diever silsuenter schubregia e fa il tagl ulivs. Ei dat da duas uisas sigirs ladas, ina dretga ed ina seniastra. Per ordinari han ils taglialenna dulau il lenn rodund da duas u treis varts. Ina lavur da stenta che ha adina puspei danovamein mussau ora la habilitad.

Fontaunas
Berther, Sep Fidel. Tenor scret dils 6 da november 1985, Rueras

Il talper
Talpas han adina dau ed il talper ei staus in mistregn da num, el che veva da ver il dun da veser e fantasia da quei che sepassa els vaus sutterrans. Il mun talpa sez ei per ordinari ina via tschocca ed igl ei da tender la falla el vial principal che secatta in tec naven e meina ella gniv. E - las talpas ein malas, van magari sperasora e sclaudan sezzas las fallas. Nua che la tiara ei stagna van ellas pauchet sut la cutgna u schizun surenvi e rescan da dar ellas greflas da tgapers e giruns.
Perencunter ei il talper ordaviert e spera ch'il freid tschessi ed ils calzers tachien buca memia zun. - La notizia fa endamen; ils dus d'avrel digl onn 1840 han ils vischins eligiu Gion Balzart sco talper dalla val, naven da Nislas entochen sisum Tschamut, sin praus e pastiras - ed el hagi scochemai da dar suatientscha, per cass ch'enzatgi clomi. Ins scheva semplamein agli il «Gion muser» che ha retschiert treis bazs (35 raps) per ina talpa. In onn sissu, ils dus da matg 1841, han ins fatg cun Gion Balzart in contract, in scosauda, numnadamein sissonta risculdis (102 francs) per onn.
Sto esser che las talpas han fatg pigns ed ellas han mulestau enzatgi; ils talpers vevan traso da siglir vi e neu e para ch'els ein vegni unfis, aschia da vegnir a currend naven d'oragiudem tocca enasisum la val. Ton ch'ils vischins da Tujetsch decidan ils 18 da matg 1873 da partgir en squadras igl intschess, damai che mo in pegliatalpas detti buca pli il damogn. E quellas ein determinadas:

- emprema squadra Selva e Tschamut entochen Val Giuv, 1 talper 
- secunda squadra Rueras e Zarcuns tocca l’aua da Strem, 2 talpers (in dadens ed in dado il Dutg grond)
- tiarza squadra, naven da Strem tocca il Drun, 1 talper
- quarta squadra, Drun, Cungieri, Bugnei entochen Nislas, 1 talper
- tschunavla squadra, Surrein e Cavorgia, 1 talper

Ils vischins dallas squadras elegien mintgamai ina persuna e visien ils geraus. Per las regiuns «dadains gl'uaut», Sedrun e Bugnei e Cavorgia e Surrein ei negin s'annunziau. Cumpatg ch'ins ei nuota sescarpaus per la plazza da talper. Ils 8 d'october digl onn 1875 han ils Tuatschins fatg in inserat ella Gasetta Romontscha; els tscherchien in talper.
Las squadras ein restadas; struschamein enzatgi seregorda en Tujetsch dils davos talpers. Zatgi ha detg ch'il Flurin Capeder da Zarcuns e Giohen Deflorin da Suloms a Rueras u schizun il Leci Hendry-Monn da Maunsut savessien esser stai dils pli davos umens en Tujetsch che hagien pigliau talpas per incumbensa dils vischins.
La maniera da pigliar las talpas ei diversa. Dalla trapla da fier cun sias duas astas e viultas osum engiu e la rintga ella cadeina da tschentar denteren ella falla aviarta fan ins aunc oz diever. - Onz pli hanada ei la pigliada cun festa; ed ella vegn en damonda per las talpas las pli rufinadas.
Il talper taglia ora in tschespet e fa in quadrat, scuviera il vau dad omisduas varts, implonta in lennet da stgein (pressapauc da ventgatschun centimeters lunghezia) osum il vau. In secund lenn atraviers (in per centimeters pli cuorts) vegn encrenaus el stgein vertical. - Ver otgonta centimeters naven dil quadrat, s'entelli a per cul vau, catscha il talper in fest coller sturscheivel (coller ei meglier che rom che secca vi e seglia), in fest d'in bien meter lunghezia, giuaden el tratsch. Cun in cantun ha el rentau la corda ferma osum il fest, ferton che da l’autra vart dalla corda secatta la palutta, tagliada ora e strenschida cul cantun, ina palutta da sis centimeters lunghezia e forsa treis centimeters lada. Il talper stenda il fest e la palutta carga viaden ellas crenas dils dus lenns, dil lenn vertical e dil travers che stattan el quadrat. La secunda corda ch'ei medemamein fermada vid il coller, onz plinengiu, tegn ferm il fildirom (in en fuorma dad onza), in fildirom ch'il talper ha sfundrau cun agid dil fassuir giu ed atras il vau. La distanza denter il quadrat ed il fildirom munta ver otg entochen diesch centimeters. Cun adatg ha el mess il tschespet el vau ed enaquella che la talpa sfui e muenta il tratsch el passadi, seglia il travers ord la crena e la palutta ed il fildirom slontschan ad ault. E la talpa cul tgierp el fildirom ei amauns. Secapescha ch'igl entir cundrez culs lenns ei accurat il medem e da l’autra vart dil quadrat, ton che la talpa sa vegnir u da vart dretga u da vart seniastra; ella va da mintga vart encunter il clauder.
Fidel Hendry dils anno 1912, derivonts da Cavorgia, ha demonstrau la pigliada cun festa en tut ils detagls. Il Tumaisch Schmed (il Tumaisch dil consum, 1871-1952), sez vischin da Cavorgia pudess esser staus in dils pli davos che ha pigliau las talpas cun festa.
Igl ei stau ual suenter l’emprema uiara mundiala, entuorn ils anno 1919 u 1920. Giachen Hendry-Monn, il bab da Fidel, ei vegnius tiel president communal Vigeli Venzin da Rueras cun 82 cuas da talpa, en in onn. El vevi scret il diember sin in pupi e schau il mussament ad interim en sac. Ed il president cuort sissu: «Ina pli gronda schula vesses buca saviu scriver.» Ed il Giachen Hendry buca maufers: «Ulteriurs vischins da Cavorgia han ina pli gronda partida.»
En verdad - els ein vegni cun dapli cuas. Cun ina indemnisaziun d'in franc l’ina ha quei dau ina summa, ina ch'els han saviu scriver sin tgamin. Suenter ch'ils vischins ein sestratgs ditg e liung han els decidiu che las talpas da vart dretga dil Rein, tonca da Maunsut, che pertucca Cavorgia e Surrein e Plaunmiez, vegnien buca indemnisadas. Ch'ils cussadents sesalvien els sezs. Ed ils ezs han fatg in nas liung, pigliau lur talpas vinavon ed han tagliau pustretsch tenor las tschuncheismas fein. Quella moda singulara ha cuzzau entochen ils 18 da schaner 1938; il di ch'ins ha fatg uliv e buca pli mess anavos la glieud ed il funs da tschella vart dil Rein. Forsa e in techet pervia da vischins pussents che vevan prau da Maunsut.

Fontaunas
Hendry, Fidel. Differentas intervistas, entschatta november 1985; demonstraziun a Cavorgia dils 13-11-1985
Venzin, Gion Antoni. Extract da protocols da vischnaunca 1838-1948. Privat. Giusep Alig-Venzin, Salins

La davosa brischavinars a Tschamut
Ella ei ina femna ed ha num Antonia, la feglia da Gion Giusep e Margheta Riedi-Peder, naschida ils siat da mars 1910. Siu tat Augustin ei staus in brischavinars ed ella sezza ha barschau cun la mumma las ragischs d'ansauna aunc entgins onns suenter la mort dil bab Gion Giusep ils anno 1924.
Tschamut ei giudapeis allas plauncas dil Cuolm d'Ursera ed encunter miezdi sesarva la Val Maighels che tonscha tocca sils sumfils e da vart dretga encunter Purtgera. - La purtada en in blah senza cantuns entuorn il tgau e giu per la schuiala ed il dies orasi da Purtgera entochen a Tschamut ei adina stau in strapaz, in buordi aschia da curonta kilos e varga ragischs.
Cun in cunti da sac schubregian ins las ragischs e taglia naven ed il suer tacca vid la detta e las levzas. Da schar il migliac memia ditg d'ina vart, schigian ellas ora u van magari en mal. El truc da pors sefan las ragischs manizzadas ed ins ha ina buna survesta. Entochen il di ch'ins metta ellas a lomia en in nuegl ch'ins maglia ual ora il fein; la temperatura da nuegl ei la vera. L'aua tievgia surengiu tempra ed ils emprems flocs ein in'enzenna. Il raup dallas bullas che sesaulzan e schloppan alla surfatscha daventa pli e pli vigurus. La maischa secoi, vegn ad ault e mass cugl uvierchel e tut, per cass ch'el fuss buca sparunaus enviers la palaunca dil nuegl. Quater jamnas silpli ed il process da fermentaziun ei alla fin.
Dalla hetta pli veglia resda la crappa pressapauc tschunconta meters oragiusut la caplutta da sontga Clau; l'aua per la destillaziun han ins priu neu dalla plaunca siviars Scharinas. Pli tard ei ina secunda hetta sefatga enasisum la Val Rullatscha, leu nua ch'il brischavinars han anflau ina fontauna ual sil plaz.
Las treis vanauns d'irom, la gronda forsa da 75 liters circa, la mesauna ed ina onz pli pintga e d'in maun las sedisch entochen gissiat buots cun la maischa, quei ei stau dabia. La procedura dalla destillaziun ei negin striegn. La turba giu da Surpalits ei stada in prima material da scaldar ed il bugl da fontauna ventgaquater uras ina suenter l’autra ei bien e ditg. La scumiada ei sefatga mintgamai suenter otg uras aschia e las notgs fuvan liungas. Buca schi unfiseivlas, sch'ils pervesiders da Caspausa devan dad esch en. Ed ina stiva cun pegna scaldada ei buca nuot.
L'emprema ga eran ils daguots gross neu dil vischi da lenn empau da schavets, schotg grads forsa. La destillaziun atras la vanaun pintga perencunter, lezza fuva in bien ton megliera e la valeta digl alcohol carschida considerablamein, datier da sissonta grads che sesbassavan denton anetgamein tocca ual sut tschunconta.
Aschia al bunfin dattan tschien kilos ragischs d'ansauna 6-7 liters vinars. Dils onns dalla brischavinars Antonia Riedi ha zatgi pagau pil vinars 4 francs per liter, oz encuntercomi passa curonta francs; ina tiarza dil vinars sco indemnisaziun per la lavur u e directamein cul daner blut.
Las treis vanauns d'irom e la concessiun suren ha la famiglia Riedi da Tschamut vendiu alla confederaziun per quatertschien francs.

Fontaunas
Riedi, Antonia. Intervista dils 6 da november 1985