Chor viril Sedrun 1869 – 1929
Regurdientschas
per la fiasta giubilara da 60 onns
celebrada ils 3 da mars 1930
Da Sep Modest Nay

Motto: Per Diu e nies Rein La viarva romontscha cantein.

Sco il viandont che ha traversau la vallada seferma bugen sin in tgiembel, contemplond la vasta tenda percurrida e laschond repassar en siu spert tut ils deletgs de siu viadi, aschia prendein nus era per dueivel e beinfatg de clamar oz en memoria la via e la veta de nies chor viril tras il spazi de sis decennis. Nus cartein de satisfar cheutras al sentiment d'engrazieivladad obligada enviers quels nos pardavons, che han sacrificau e dedicau avon onns lur amur ed ardur al cantar. E gnanc in mument ha il dubi fatschentau nus, schebein ei vali la peina ni buc de spender plaids pervia d'in schi sempel eveniment sco il giubileum d'in chor viril si en nossas muntognas.

Buca che l’historia de nies chor viril presentass schabetgs de muntada extraordinaria u de speciala impurtonza per quels pli da lunsch. Mo questas regurdientschas han era plitost la mira ded esser ina cronica intima e familiara, e per quest intent san era pigns eveniments esser gronds ed impurtonts. Astgein nus bein cun buna raschun considerar el factum della ualti liunga existenza dil chor la viva perdetga d'in patertgar ideal, d’in spert elevau ed animau da ferventa ardur per il bi, bien e sublim, che ha regiu dapi onns ed onns denter ils biars convischins giuvens e vegls en vischnaunca. E quei spert, che aulza il carstgaun en siu patertgar e cunfar sur il material e las bassas della veta, ei enzatgei ton bi e ventireivel, ina talmein gronda qualitad dil cor, che nus mein cun legria in mument sin ses fastitgs, rimnond las flurs sternidas sin sia senda. E denter tuttas ina dellas pli carinas ed amureivlas ei senza dubi l’amur per il cantar, igl ardiment e la cuntinuada premura de ludar en suns ed accords il Segner, la patria, l’amur e la splendur dell’entira scaffiziun. Ei fuss sco de purtar aua el Rein de vuler relevar tut il deletg e solaz, ch’il cantar da cuminonza porscha al cantadur, de vuler descriver ils legreivels sentiments de ventira ch’el dedesta en l’olma e de vuler brancar e metter en plaids tut sia valur per il viver, sentir e luvrar dil carstgaun. Il cant ei la frestga clara fontauna per quel che ha seit, il sulegl scaldont per tgi che schela; el ei in dun dils pli nobels che la carezia dil scaffider ha dau a ses affons, el ei in regal dil Parvis.

En la radunonza generala dil chor viril de Sedrun dils 18 de november 1928 ei levada la damonda d’intercurir empau l’historia dil chor, essend che quel duessi exister tenor il dir dils vegls dapi 50 onns e ch’ei fussi perquei bein commensurau de celebrar igl onn 1929/30 ina fiastetta giubilara. Aunc vivan var zacons cantadurs vegls che attestan d’haver cantau el chor viril gia dal temps della fiasta districtuala de cant a Trun digl onn 1879; in de quels veterans, G. Giusep Deflorin, posseda aunc oz il pindel della fiasta de cant dils anno 79 a «Trons».

Intercurend allura origin e historia dil chor pli exactamein, igl ei resultau, che quel ha existiu gia in bien ton pli baul, e ch’ils cantadurs ded oz san celebrar il giubileum buca mo de 50, mobein de 60 onns. Perdetgas viventas e notizias rimnadas tscheu e leu cuntegnan il mussament digl origin de nies chor viril. Il fundatur ei staus senza dubi sur Gion Antoni Casanova de Vrin, caplon a Sedrun 1866-70, che ha rimnau ils cantadurs, principalmein ils giuvens, per mussar ad els de cantar. Schebi ch’igl ei igl emprem raschieni mo d’in «ferm quartet», astgein nus tuttina supponer cun raschun che quei quartet seigi prest carschius. Questa suposiziun vegn confirmada dals vegls cantadurs sco era entras ina communicaziun, che nus engraziein al rev. segner pader Baseli. Tenor quella han ils giuvens de Sedrun ils 25 de fevrer 1867 dau (ella remisa della Cruna, ussa «garage») ina cumedia en dus acts: «Il fabricant dell’aura». Cun quella caschun eis ei era vegniu cantau, carteivlamein dagl emprem chor organisau. La «Gasetta Romontscha» dils 8 de fevrer 1867, che annunzia questa producziun teatrala a Sedrun, di, «ch'ils acturs formeschien era ina societad de cant, senza denton far speculaziuns sin premis federals u cantunals».

En nr. 9 della Gasetta, igl 1 de mars 1867 cumpara in rapport concernent la numnada producziun dils acturs de Sedrun. Alla fin de quel stat ei scret: «ina honorifica menziun mereta il bi cant, producius dals medems giuvens». Tenor dir dils vegls possedeva il chor da lezzas uras ina elita de stupens cantadurs; denter quels numnein nus cheu oravontut igl excellent tenorist Gion Antoni Monn, numnaus il «Grond Madlainer», cun in’admirabla sonora vusch. Sanflond ina stad in curant tudestg ella «Cruna», leva quel dispet engaschar il Grond Madlainer sco cantadur per in teater e pagar tgei ch’el mo leva. Denton ha Gion Antoni cumpatg preferiu de cantar vinavon ella patria tuatschina.

Ultra de sur G. Antoni Casanova ein aunc in diember de spirituals a Sedrun s’occupai diligentamein della cultivaziun dil cant. La premura e carezia per il cantar davart ils augsegners para insumma ded esser tradiziunala en Tujetsch e quei tochen sil di ded oz. Ina raschun persuenter anflein nus bein era en la perschuasiun dils spirituals, ch’il cultivar il cant en ed ord baselgia nobiliteschi ils sentiments dil pievel, seigi ina biala e meriteivla recreaziun e secumporti aschia dil tuttafatg era cun igl intent e l’aulta mira della pastoraziun.

Sco rev. sur Tumaisch Berther raquenta fuva il mussar de cantar in’obligaziun dil caplon de Sedrun. Schebi ch’igl ei de supponer, che quella cumpegliavi en prema lingia il cant-baselgia, sche constat ei, che era il cant profan ei vegnius cultivaus dasperas trasatras e ch’ins ha buca mess in tierm strict denter chor-baselgia e chor viril. Aunc ozildi serecruteschan ils cantadurs de baselgia ord il chor viril, aschia che domisdus chors profiteschan in da l’auter entras la pli extendida cultivaziun dellas vuschs.

Local de cant fuva en la hodierna casa de caplania, baghegiada ils anno 1849 sco casa de scola, nua ch’il sur caplon stava en la secunda alzada. Per munconza de canzuns romontschas cantavan ins il bia ord il Heim; denton eisi nuota de dubitar, ch’ins hagi cantau era da lezzas uras enqual canzun romontscha en quater vuschs. Ins dei mo patertgar che quei ei stau il temps dil fervent promotur dil romontsch, Gion Antoni Bühler, che ha translatau diember de canzuns per chor viril dal tudestg en romontsch.

La ierta de sur Casanova ha bein scolast Fidel Caderas priu a mauns, ch’ei staus scolast a Sedrun dals anno 1859-73. Sco nos pli vegls convischins san risdar, ha scolast Caderas fatg vicedirigent dal temps de sur Casanova ed era gidau lez a mussar teater. - Anno 1874-78 ha sur Giachen Antoni Augustin d’Alvaschein pastorau sco caplon a Sedrun. Sur Augustin ei staus oravontut il grond promotur dil cant choral en baselgia; dasperas ha el era cuntinuau a cultivar il cant profan el chor viril. Cumpatg ch’ei era in instructer fetg rigurus e spargnava nuota de dar enqual lavatgau da miervi a cantadurs e cantaduras. - En buna regurdientscha denter ils vegls cantadurs ei siu successur, scolast e forester communal Stiafen Schmed (Tguinter) de Gionda, dirigent dil chor viril anno 1879 e puspei pli tard ils anno 1889, nua ch’el ha carschentau il chor cun novas forzas, carteivel cun risguard della fiasta de cant de quei onn a Trun, nua ch’il chor ha cantau la canzun «O libertad» da Rheinberger, viarva da Gion Antoni Bühler.

Igl onn 1881 anflein nus nies rev. convischin, sur Tumaisch Berther, caplon a Sedrun. Cun anim e forza giuvenila ha sur Tumaisch priu a mauns cant-baselgia e profan e mussau messas, litanias e canzuns a cantadurs e cantaduras. «Mo Dieus pertgiri, tgei bials temps che quei era», resda il venerabel veteran aunc oz cun veseivla legria e bein era cun in stel encarschadetgna, patertgond vid las uras de cant e las legras ed emperneivlas cantadas de lezs onns. Ils cantadurs vegls de Sedrun stevan buca denter quater preits cun lur cant; els purtavan viadora lur canzuns en vitg e vischnaunca, cantond per deletg dil pievel sin cadruvi e sin las tgeuas vias duront las seras stellidas de stad. Gie, temps d’unviern mavan els perfin tochen enta Rueras e cantavan si sur il vitg «Sur Giassa» lur bialas canzuns che tut tedlava cun bucca aviarta. Ultra dil «Grond Madlainer» eran principalmein ils dus frars Bruno e Giachen Antoni Soliva e Stiafen Beer dils pli capavels cantadurs per questas serenadas. La casa Soliva e quella de Hans Giachen Beer han insumma dau al chor viril dapi sia existenza buns e fervents cantadurs. A vesta de quellas regurdientschas eisi mo de deplorar, ch’il temps ded oz cun sias fuolas e furtinas lai strusch prosperar e recuvrar pli aschi abuldantamein la ierta de quei humor sulegliv e la legria che nos vegls anflavan en lur cantar.

Dals anno 1895-97 ei Gion Antoni Deragisch de Bugnei, scolast a Sedrun e dirigent dil chor viril. Schegie ch’el fuva bien dirigent de cant, sch’era sia speciala capacitad surtut la musica. Igl onn 1897 diregia scolast Giachen Antoni Paly de Camischolas, ussa a Disla, il chor viril, ferton che siu collega Deragisch pren a mauns e reorganisescha la musica de Sedrun, ch’el ha rabitschau sin in ault scalem. Scolast Deragisch ei staus anno 1899 dirigent festiv de tut las musicas della Cadi cun caschun della fiasta centenara a Mustér.

En quei interval fuva era la fisionomia dil chor viril semidada bravamein; ina parts dils veterans eran i en santeri, auters seretratgs muort vegliadetgna. Scolast Gion Antoni Paly ha lu capiu de dar anim principalmein als giuvens e de rimnar novas forzas sut las alas dil chor viril. Ils commembers pli vegls de nies chor ded oz han aunc cantau sut la rigurusa bitgetta de scolast Paly e laudan la gronda exactadad de quei dirigent, che schavi mai stgisar ina canzun, schi ditg che quella fuvi buca mulada en tut ils detagls tochen orasum.

Sut il successur de scolast Paly, scolast A. Camartin de Breil, 1900/03 anflein nus buc in pli dils veterans dell’emprema perioda. Sco remarcabladad ord quels onns, che daventa buca mintg’auter di, lein nus menziunar la schlittada dils cantadurs de Sedrun vi Curaglia, nua ch’il drama «Il fegl perdiu» vegneva daus, e nua ch’ils nos han fatg furore, cantond als vischins de Medel duront las pausas de lur teater.

Cumpatg ch’ei ha muncau als scolasts a Sedrun el temps suandont la capacitad necessaria de direger il chor. Dagl onn 1903-08 stat quel sut la direcziun de Gion Antoni Monn de Sedrun, anteriur forester communal e presentamein directur dil consum. Gion Antoni Monn ha per atgna forza ed iniziativa dirigiu il chor viril cun gronda premura e sacrificontadad.

Igl atun, 1908 surpren scolast Hans Giachen Decurtins de Sedrun la scola reala de Tujetsch ed el medem temps il tgamun dil chor viril. Sut sia direcziun crescha il chor sin in diember de circa 40 commembers. Da quei temps ha existiu perfin ina filiala dil chor a Rueras sut direcziun de scolast Giachen Fidel Berther. Igl onn 1913 il matg frequenta il chor la fiasta de cant a Breil e quei cun aparti success. Canzun de pag «Igl Avat Pieder de Pultengia» - 2. rang. Cun quella caschun ha il chor elegiu per l’empremaga in comite, consistents en president e cassier. Lein buca tralaschar ded era menziunar l’aulta viseta de nies monsignur uestg Georgius. Vegnend monsignur cuort avon la fiasta de cant per siu viadi de creisma a Sedrun, ha el, il grond amitg dil cant, buca muncau de tedlar ils Tuatschins e sco ei seresda, ha el aunc dau tscheu e leu ina tarschanadetta a «lur avat Pieder» avon che schar ir el a Breil. Per munconza d’ina atgna bandiera ei nies chor ius a Breil cun ina bandiera della ludeivla cumpignia de mats, sin la quala la Mme Rouberolles haveva buntadeivlamein surcusiu ina harpa per insigna. Per questa curtesia ha il chor engraziau alla signura digl ingenieur Rouberolles cun ina serenada. Duront il temps de sia direcziun dil chor viril ha scolast Decurtins era dirigiu, il cant-baselgia cun premura e bien success.

Igl onn dell’uiara gronda 1914 vegn scolast Bistgaun Bundi de Surrein-Sumvitg elegius scolast della scola reala e surpren era il menaschi dil chor viril. Sez in bien cantadur d’in excellent humor e de buna cumpignia, ha el malgrad il temps d’uiara pudiu mantener bein en pei il chor, schegie ch’ils exercezis vegnan ad esser stai anzi munglus e malregulars muort la mobilisaziun. Duront quella perioda ein era vegnidas fatgas las empremas statutas dil chor viril anno 1916. Scolast Bistgaun Bundi ha dirigiu il chor tochen anno 1918, nua ch’el ha bandunau la Val Tujetsch per serender egl jester. Deplorablamein ha el giu la sort d’anflar en tiara jastra la fossa gia en ses giuvens onns. El ruaussi en pasch.

Successur de scolast Bistgaun Bundi ei staus scolast Barclamiu Coray de Laax, scolast a Rueras, enconuschents per versau e fetg habel dirigent. Che tschaffen e premura han gidau el a cultivar il chor cun bien success sa mintgin cumprender ch’enconuscha la via d’unviern da Rueras e Sedrun e las lunas stuornas dil Strem. Scolast Coray ha instruiu il chor dapi 1918 tochen la primavera digl onn 1920, nua ch’il chor ha cantau cun success la canzun «Il retuorn» cun viarva fatga a posta per questa caschun da sur Flurin Camathias.

Dapi gl’onn 1920 stat il chor viril sut la direcziun de scolast Sep Modest Nay de Danis. Sut sia direcziun ha il chor frequentau anno 1924 la fiasta de cant a Glion cun 45 cantadurs. Canzun de pag «Comiau» da R. Wiesner, viarva da scolast Nay. Quei ei stau l’emprema ga ch'il chor ha cantau en la categoria greva. Il success ei staus fetg cuntenteivels. Ils derschaders scrivan en lur rapport, ch’il chor seclassificheschi cun sia canzun «en proxima vischinonza della emprema qualificaziun». In bien e grev pensum ha il chor priu a mauns per la suandonta fiasta districtuala de cant dils anno 1927 a Glion, nua ch’el ha cantau «Il giuven bandierel» da Chr. Schnyder, translatada dal dirigent. Nota generala dil rapport: Fetg bien. In eveniment de tut speciala impurtonza en quella perioda ei senza dubi stada la cumpra de nossa biala bandiera, fatga dalla firma Fraefel a S. Gagl tenor in dessegn de sgr. Sulzer, Winterthur. La bandiera representa il Badus en la gloria dil sulegl e porta l’inscripziun: Per Diu e nies Rein la viarva romontscha cantein. La bandiera ei gartegiada oreifer; ella ha menau il chor l’emprema ga a Glion anno 1927 cul «Giuven bandierel». Lein buca emblidar de seregurdar digl anim ed impuls che la premura de nies anteriur president Tumaisch Berther ha purtau en quella fatschenta e della gronda generusadad de nos preziai convischins ed amitgs dil cant, che han da bien cor gidau il chor tier sia biala bandiera nova, documentond lur amur pil cant e la gronda e legreivla attaschadadad ch’els portan al chor viril. La bandiera ei vegnida benedida la fiasta dils affons, dumengi’alva 1927, en baselgia de s.Vigeli, e quei di ei staus dublamein bials e festivs a tuts ils cantadurs ed amitgs dil cant. - In di che vala ded era vegnir memorisaus, ei ils 29 d’uost 1928 che ha dau a nus la viseta dil chor viril dils emploiai dil marcau de Lucerna. Havend passentau in emperneivel di culs cantadurs de leugiu e scumiau cant romontsch e canzuns tudestgas en cordiala harmonia havein nus dau adia a nos cumpatriots, che han partend regalau a mintga cantadur ina memoria ed a nies chor in stupent buccal d’argien per biala e cuzzeivla regurdientscha.

Nus lein buca serrar questa part de nossa cronica senza seregurdar era dils merets de nies present vicedirigent, rev. sur plevon Giachen Antoni Fetz, per il prosperar dil chor viril, al qual el appartegn dapi l’entschatta de sia pastoraziun en Tujetsch (1922) sco premurau cantadur, e cunzun della gronda stenta e premura applicada de copiar promtamein a nies chor tontas e tontas canzuns. Sur Giachen Antoni Fetz siara aschia vengonzamein la retscha dils augsegners cantadurs e nus selegrein de sia affecziun al cant ed al chor, considerond quella era per in bien attestat al spert che regia denter ils cantadurs.

Els dis che questa cronica stat per ir en stampa arriva la legreivla nova d’in generus e bi regal, fatgs ils davos dis al chor viril. Signur Teofil Locher de Dübendorf, in vegl hosp della Cruna ed amitg della Val Tujetsch e nies cumpatriot Placidus Berther della Cruna han schau recamar en argien dus bellezia corns e dedicau quels al chor per sia fiasta giubilara. Ils corns ein vegni mess en disposiziun als preziai donaturs dad in vegl cantadur, Maurus Berther a Sedrun. A tuts treis amitgs dil cant in sincer Dieus paghi era en las «Regurdientschas» dil chor per la beinvuglientscha ed affecziun demussada.

Alla fin de questas regurdientschas sto il cronist aunc menziunar las numerusas producziuns dramaticas, dadas dal chor sez u cun siu cooperar. En Tujetsch han ins produciu els davos decennis in bi diember de dramas, senza dumbrar ils concerts, las cumedias ed autras producziuns humoristicas. Nus lein numnar cheu «Il zenn miraculus» (daus el temps de scolast Deragisch). Sut forester Gion Antoni Monn: «Paulinus de Nola», «Igl aunghel della pasch» da pader Maurus Carnot e «Sogn Willibald». De remarcar eisi, ch’ils cantadurs de lezs onns fagevan buca teater cun la speciala mira de «far cassa». «Nus vevan ni president, ni cassier, ni cassa», ha igl instructer Gion Antoni Monn detg inaga, «nus fagevan daven tut. Mo che nus savevien far teater e star si empau legher da buna cumpignia». Aschia seresda ei, ch’ils acturs fagevien alla fin dellas producziuns quasi adina legras ventschidas, vul dir ina legra sera e stevan ensemen da bien humor e da buna peda. Gie in onn han els perfin envidau a tscheina l’entira cumpignia de mats de Tujetsch. Denton han ils acturs savens era dedicau in ton dils fretgs de lur savurs e stentas dramaticas a caussas pias, aschia per exempel per in artg sigl altar de Nossadunna ed igl onn 1916 igl entir recav de «Garcia Morena», producius cun special success, per il tetg niev de S.Vigeli. - Il chor viril ha pli tard era cooperau als dramas «S.Willibald», «Venantius» ed «Igl aunghel della pasch», ch’ein vegni dai dalla ludeivla cumpignia de mats (ils dus davos tocs en favur de s.Giachen e de s.Antoni). En uniun cun la societad de musica ha il chor viril produciu ils dus dramas da F. N. Achermann «La garda svizzera» ed «lls herox de Nidwalden», translatai per il chor da scolast Sep Modest Nay. Ei fuss buc endretg d’emblidar ils gronds merets de nies capavel e premurau «regissur», deputau Gion Felici Monn, che ha instruiu cun pazienzia e senn veramein artistic dapi diember ded onns ils acturs tuatschins ed al qual quests han d’engraziar per gronda part il bien gartetg e success de lur producziuns dramaticas.

Aunc dus plaids de conclusiun. Questas reminiscenzas, fussen strusch cumpletas senza ils nums dils cantadurs vegls e giuvens, che han apparteniu zacu al chor viril. Nus essan sespruai de recaltgar ils vegls commembers d’avon varga in miez tschentaner, il qual ei stau ina caussa ualti difficultusa, essend che mo paucs paucs de quels venerabels veterans ein pli en veta. Tonaton vein nus la speronza d’haver rabitschau ensemen tuts; sch’enqualin duess tonaton muncar, sche veglien ins perstgisar la munconza. Questa stedia raccolta vul esser in act d’engrazieivladad enviers quels che han fundau nies chor, cultivau il cant onns ed onns cun amur ed ardur e relaschau a nus la ierta dil bi cantar per perdetga de lur senn e sentiment ideal. Quels venerabels vegls che han priu quasi tuts la via per la perpetnadad e ruaussan en santeri della patria, il laud della quala els han cantau, ein stai ils purtaders d’in bien spert denter nies pievel, dil spert d’unitad, d’ina sereina harmonia e buna concordia. Artavels che nus giuvens essan, havein nus il duer de purtar tras nos dis quei medem spert de nos buns vegls e suandont lur tarlischont exempel, tener ault la bandiera dil cant per Diu e per la patria, per nies deletg e solaz dil cor en dis bials ed uras grevas e per legria de tut quels, ils quals portan en sesez il dultsch sentiment de resonanza per la harmonia dils cors e dil chor. Ed il cronist less metter per tierm final de questas «Regurdientschas» il motto, ch’el ha anflau all’entschatta d’ina lavur de pader Baseli, il qual secloma:

Commembers d’honur
Deputau Gion Felici Monn
Dr. med. Stiafen Berther
Gion Antoni Monn, forester
Rev. sur plevon Giachen Antoni Fetz
Rev. sur plevon Tumaisch Berther
Rev. segner pader Baseli Berther
Scolast secundar Sep Modest Nay
Hotelier Hans Giachen Decurtins
Lucas Cavegn, Cadruvi
Duri Vigeli Soliva
Gion Battesta Soliva
Giachen Antoni Soliva
Tumaisch Beer, USA
Tumaisch Berther, Cruna
Lucas Berther, Cruna
Onna Maria Derungs

Perioda 1869-1895
Rev. sur G. Antoni Casanova, dirigent 1869-70
Scolast Fidel Caderas 1871-73
Rev. sur A. Augustin 1874-78
Scolast Stiafen Schmed 1879-80
Rev. sur Tumaisch Berther 1881-85
Scolast Stiafen Schmed 1889

Stiafen Beer
Leci Huonder
G. Antoni Monn (Grond Madlainer)
Bruno Soliva
G. Antoni Soliva
Lurenz Jacomet
Placi Jacomet
Christian Muggli
Gion Antoni Schmed (Sten)
Duri Battesta Muggli
Sep Antoni Balzard
Sep Flurin Huonder
Gion Paul Berther
Giachen Antoni Berther
Sigisbert Berther
Gion Michel Monn
Gion Antoni Soliva, scolast
Vigeli Monn (Pign Madlainer)
Vigeli Giusep Schmed (Pign Paul)
Giachen Antoni Beer (Pign Vic)
Giachen Antoni Paly (Pign Paly)
Felici Monn, Zarcuns
Gion Bistgaun Beer, Gionda
Giachen Giusep Deflorin
Giachen Martin Schmed (Sten)
Rest Valentin Beer, Camischolas
Sep Martin Monn, Rueras
G. Andriu Monn
Paul Soliva
Gion Fidel Caduff
G. Fidel Hetz
Rest Antoni Gieriet
Gion Andriu Berther
Vigeli Venzin
Ignazi Beer
Vigeli Beer
Giachen Antoni Huonder

Perioda 1895-1914
Scolast Gion Antoni Deragisch, dirigent 1895-1897
Scolast Antoni Paly, dirigent 1897-1900
Scolast A. Camartin, Breil, dirigent 1900-1903
Gion Antoni Monn, forester, dirigent 1903-1908
Scolast Hans Giachen Decurtins, dirigent 1908-1914

Lucas Cavegn (Cadruvi)
Alfons Beer
Tumaisch Beer
Vigeli Beer, Surrein
Maurus Berther
Manuel Deragisch de Vigeli, Bugnei
Fidel Curtins, Zarcuns
Martin Paly
Sep Antoni Decurtins, marc.
Sep Antoni Decurtins, Bugnei
Hans O. Berther
G. Battesta Berther
G. Antoni Venzin, pign
Gion Antoni Monn, m.
Gion Antoni Deragisch
Christian Deragisch
Sep Antoni Deragisch,
P. Placi OC
Gion Felici Monn, deputau
Vigeli Berther, mistral
Sep Antoni Monn
Gion Battesta Soliva
Duri Vigeli Soliva
Paul Schmed
Sep Antoni Schmed
Leci Loretz
Stiafen Monn
Vigeli Monn
Giusep Flepp
Giachen Antoni Soliva
Vigeli Soliva
Giusep Monn (Peppi)
Gion Michel Monn, Gionda
Placi Monn
Battesta Monn
Giachen A. Berther, Vigeli pigns
Vigeli Berther
Paul Livers scolast
Rest Valentin Monn
Clau Huonder
Gion Antoni Beer
Gion Antoni Soliva
Baseli Berther, Dieni
Tumaisch Berther, Rueras
G. Fidel Berther, Rueras
G. Flurin Riedi, Rueras
Sep A. Muoth, scolast
Eugen Maissen, Rabius

Perioda 1914-1930
Scolast Bistgaun Bundi, dirigent 1914-1918
Scolast Barclamiu Coray, dirigent 1918-1920
Scolast Sep Modest Nay, dirigent dapi 1920

Christian Gieriet 1914 (onn d'entrada)
Lucas Berther, Cruna 1914
Lucas Soliva 1914
Giusep Deflorin 1914
Martin Werth 1916
Luis Curschellas 1916
Vigeli Jacomet 1916
Gion Ant. Monn-Venzin, Surrein 1916
Flurin Monn 1916
Placi Jacomet 1916
Luis Monn 1916
Stiafen Cavegn 1916
Toni Gieriet 1916
Vigeli Monn 1916
Placi Giger, scolast 1916
Tumaisch Venzin, scolast 1917
G. Antoni Schmed, scolast 1918
Albert Cadalbert, scolast 1918
Sep Antoni Monn, Rueras 1919
Baseli Huonder 1919
Nazi Soliva 1919
Giochin Berther 1919
Tumaisch Cavegn 1919
Placi Cavegn 1919
Albert Cavegn 1919
Bistgaun Cathomen, scolast 1919
Benedetg Deflorin 1919
G. Giusep Gamboni 1920
Rev. sur Callist Simeon 1920
Baseli Deflorin 1920
Tumaisch Curschellas 1920
Clau Antoni Beer 1920
Luis Jacomet 1920
Vigeli Valier 1920
Christian Bass, scolast 1920
Bruno Hendry 1920
Valentin Berther 1920
G. Casutt, scolast 1920
Christian Berther, Cruna 1921
Ludivic Paly 1921
G. Martin Berther 1921
Duri Berther de Gion Andriu 1921
Clemens Berther 1921
Rev. sur Giachen Antoni Fetz 1922
G. Andriu Berther 1922
Tumaisch Berther, Cruna 1922
Vigeli Beer, scrinari 1922
Lucas Cavegn d’Adolf 1922
Luis Hendry 1923
Giusep Berther, Camischolas 1925
Martin Paly 1925
Gion Paul Berther 1925
Christian Soliva 1925
Benedetg Schmed 1925
Barclamiu Peder, scolast 1926
Gion Michel Peder, scolast 1926
Placi Soliva 1926
Giachen Martin Valier 1926
Gion Antoni Hendry, scolast 1926
Augustin Paly, scolast 1926
Bernard Cavegn 1927
Alfons Berther 1927
Christian Berther, Camischolas 1927
Fidel Monn 1927
Gion Andriu Monn 1928
Luis Valier 1928
Leo Beer 1928
Duri Berther de Vigeli 1928
Felici Monn, giuven 1928
Maurus Berther, Camischolas 1928
Placi Deragisch 1929