Felici Diogg, il pictur da Tschamut da Gion Benedetg Venzin, cumpariu el CR 1922

Il material per quella lavur hai jeu anflau en entginas broschuras e cudischs d'artists ellas bibliotecas da Cuera ed Altdorf, els cudischs baselgia Tujetsch e Rapperswil. Per pliras indicaziuns engraziel a rev. pader Baseli Berther ed archivar Schnellmann da Rapperswil; al davos era per la fotografia digl auto-maletg da Diogg.

Introducziun Sche ti eis gia staus a Sedrun, has ti franc observau igl interessant maletg silla fatscha septentrionala dalla maiestusa tuor-baselgia. El representa in gigantic s.Gieri, il qual smeina giud siu cavagl la lontscha encunter in stermentus drac. Quei maletg che stat cheu exponius a tuttas auras dapi circa 140 onns, ha per auctur Felici Maria Diogg, il qual ei carschius si a Tschamut, igl emprem uclaun sper las rivas dil Rein, ed ei staus in grond artrist cun renum europeic. Nus havein en uras da recreaziun rimnau entginas notizias sur sia veta, la quala presenta a nus buca mo il maletg d'in bien e niebel caracter, mobein muossa era co in sempel um sa cun diligenza e premura vegnir tier enzatgei sil mund.

1. Il pign Felici da Tschamut
Felici Maria Diogg ei naschius igl onn 1762 (1-7) ad Ursera/Andermatt el cantun Uri. Siu bab senumnava Gion Columban Diogg e fuva scrinari. Ils Dioggs fuvan denton buca burgheis d'Ursera; tenor pader Placi a Spescha eran els oriunds dalla Val Formazza, che schai sin territori talian denter il Tessin ed il Valleis-sura. - La mumma senumnava Maria Catrina Deflorin (*7-6-1735; feglia da Gion Battesta e Venzin Anna Maria)e fuva da Tschamut. - Siu talen d'artist ha Felici artau dil bab, il qual luvrava era sco sculptur, principalmein vid ornaments d'altars e haveva entgina habilitad el malegiar, sularar ed argentar.

Gl'onn 1766 ei il vitg d’Ursera daventaus ina unfrenda dallas flommas, ed era la casa de Diogg ei barschada. Per puspei baghegiar ina habitaziun en ina cuntrada senza, uaul tonschan ils mieds buc. Columban Diogg seresolva da bandunar Ursera e seretrer sur l'Alpsu a Tschamut, liug nativ da sia dunna. Dils geniturs da quella survegn el ina habitaziun, enzatgei prau cun in pign muvel. La rendita ord questa pintga facultad e la fadigia ord siu mistregn tonschan per il susteniment dalla famiglia, che vegn pli e pli numerusa. Dad Ursera fuva el vegnius cun dus buobs: Gion Giusep e Felici. A Tschamut ein naschi: 1767 Onna Maria Regula, 1769 Placi Fidel, 1770 Maria Nescha e 1772 Maria Catrina.

Tschamut schai 1650 m. sur mar. La cuntrada representa ina sceneria imposanta e plein variaziun. El nord sesaulza il Crispalt cun sia greppa grischa, dadens la rodunda dil Calmut; encunter sera vegn la val serrada dil maiestus Badus, il fil da Tuma ed il Péz Nurschalas, dil qual ins survesa l’entira val engiuviars ed ina part dil marcau da Cuera. Visavi Tschamut sesarva encunter miezdi la selvadia val Curnera cun sias stermentusas preits-crap. Il vitg sez schai per la gronda part sin in crest e pliras casas ein fundamentadas sin grep. - Il pievel sto cun stentusa lavur recaltgar dalla selvadia tiara il sempel da viver. - Cheu ha nies Felici Diogg passentau sia giuventetgna. Quei contuorn, aschibein dalla cuntrada sco dil pievel, ha influenzau il spert dil giuven artist ed imprimiu ad el il tschaffen per la lavur e sempladad.

La mort dalla mumma ha fatg sin Felici gronda impressiun e ha imprimiu a sia olma quella grevadetgna e malenconia che ha accumpignau el tras si'entira veta. El fuva in affon plein cor e sentiment. Fetg receptivs per il bi ed imposant, mo era per la dolur e tristezia, qualitads, che manifestan igl artist: il ver art schai ella profunditad dil sentiment.

2. Il giuven emprendist
Felici ei probablamein restaus a Tschamut plirs onns suenter la mort dalla mumma. Mo prest ei sepurschiu ina caschun, che ha menau el tier sia propria clamada. Siu bab luvrava sco scrinari ella claustra da Mustér. Aval Columban Sozzi (1764-1785) fageva numnadamein far entginas reparaturas en clasutra ed haveva perquei clamau neutier plirs luvrers ed era artists. Felici cumpogna siu bab giu Mustér. Cun grond interess admira el il luvrar dil pictur Bioggi, che renovescha entgins maletgs. Avat Columban fa cheu enconuschientscha cul svegliau giuven da Tschamut, il qual schenghegia ad el in di in Ecce homo, malegiaus sin glas. Encurschend ord quella lavur fastitgs d'in grond talent, secusseglia il bab cugl avat, ed ei vegn priu conclus da tarmetter Felici a scola tier il pictur Wyrsch da Buochs NW, il qual fuva professer sin l'acadamia da pictura a Besancon en Frontscha, e gudeva da gliez temps grond renum.
Plein entusiasem per igl art, al qual el vuleva sededicar dacheudenvi totalmein, cun 20 renschs retschards digl avat en sac, cun ina scartira da recumendaziun, che procurava ad el igl albiert en las claustras, semetta Felici sin via encunter la Frontscha. Suenter in stentus viadi arriva el a Besancon. Wyrsch retscheiva amicablamein il giuvenot grischun e sedat gronda breigia per sia cultivaziun. Felici ei in diligent scolar; spert survarga el en dessignar e malegiar tut ses cumpogns. Dasperas sto el menar ina veta ualti pupratscha, pertgei sia buorsa ha adina il trer anavos. Suletamein ill tat tarmetta dad Ursera da temps en temps dus raps. Plein commiseraziun recamonda Wyrsch il pauper giuven ad ina nobla signura da Besancon sco mussader ad dessegn per siu fegl. La mudestiadad da Felici gudogna sper la benevulienstcha da quella signura. In di lai ella purtar en sia habitaziun ina cofra emplenida cun vestgadira. Tgei surstada per il pauper Tschamuter!
Tras cuntinuau diligent exercezi fa Diogg gronds progress en siu art. Sia habilitad semanifestescha oravontut el malegiar persunas, il qual el elaborescha en colurs da ieli. Sia emprema lavur da pli gronda valeta ei stau il portret da siu amitg svizzer. Siu mussader sez exprima, el seturpegiassi buc, da scriver siu agen num sut quei maletg. En cuort vegn Felici enconuschents el contuorn e survegn plaunsiu era occupaziun e fadigia.  Perfin igl arzuestg d'Urfurt, che vegn leu atras, cloma el sin siu casti "Gy" e surdat ad el l'elaboraziun da plirs purtrets ed entgins maletgs d'altars. - Las lavurs da Diogg el casti da Gy ston haver anflau viv applaus, pertgei cuort suenter vegn el engaschaus sco instructer da dessegn per la scola, che sesanflava el casti. El pudeva haver buna speronza d'anflar cheu cuzzonta occupaziun; mo gleiti ha ei dau ina viulta en sia veta d'artist.
Siu bab fuva morts gia el secund onn da sia dimora a Besancon. Il tat, che fuva pli daditg staus schuldau en Frontscha, temeva che siu biadi vegni infectaus dil spért libertin disl Farnzos. Perquei rugava el en mintga brev, da vegnir a casa, e lai ad el negin ruaus, entochen che Felici seresolva da vegnir suenter al giavisch dil tat. Siu retuorn po curdar circa igl onn 1785.
Per circa in onn stat el ussa baul a Tschamut, baul ad Ursera. En quei temps ha el probablamein scaffiu il s.Gieri sil clutger a Sedrun. Che quei seigi daventau avon ch'el mondi en Frontscha, sco nus vein legiu en ina scartira, ei strusch pusseivel, pertgei, schegie che l'ovra ei buca fetg perfetgta, eis ella tonaton buca la alvur dad in nunscolau. Era a Breil sesanfla in maletg da Diogg sin la fatschada d'ina casa (habitada dapresent da Nicolaus Cavegn), il qual representa la encorunaziun da Nossdunna.

3. Grevas emprovas
Propriamein haveva Felici banduna la Frontscha cun il plan da serender ell'Italia, il paese della bell'arte, e cuntinuar leu ses studis. Animaus leutier e sustenius da siu fautur avat Columban Sozzi semett'el sin via encunter l'Italia. Il viadi meina sur Milaun e Florenza encunter Ruma, il centrum digl art europeic. Las ovras gondiusas dils artists talians fan sin el in'impressiun cuntraria a quei ch'el haveva spitgau. Enstagl da vegnir alzaus ed animaus sesenta el profundamein deprimius. Pertgei, pér ussa vesa el, ch'el ei sper quels genials artists mo in scolar. Igl ideal digl art ch'el veva en siu spert, vegn alzaus en ina distanza, ch'el mai po contonscher quel. Da natira inclinaus tier malenconia, vegn el surprius dad ina stgira grevadetgna. Treis jamnas eis el buca habels da prender enta maun ils utensils da pictur. El va entuorn cul patratg da turnar a casa e dar si igl art.
Quella depressiun spirtala, ch'ei semanifestada era tier auters artists dil nord, ch'ein vegni ell'Italia, ei denton buca da cuoz. Disaus empau vid ils novs maletgs e las ideas novas, peglia Felici puspei curascha e semetta vid la lavur. El malegia suenter ils exempels dils vegls artists e studegia lur fuormas e lur ideas. Raphael, Domenico, Annibale Caracci e Guido Reni ein ses ideals. - A Ruma habiteshca el tier in parent da sia mumma e fa amicezia cul marcadont Giuseppe Sozzi, frar digl avat da Mustér. Suenter in onn suonda ina secunda emprova. La lavur e la melaconia havevan ruinau sia gnarva. El vegn malsauns. Il miedi cusseglia da serender a Neapel. L'aria marina ed il ruaus restabileschan puspei sia sanadad, aschia ch'el sa spert puspei sededicar alla lavur. Suenter liung temps entscheiva el danovamein cun il purtret. Paregliond las ovras novas cun las anteriuras sa el cun legherment constatar in grond progress. In oreifer maletg da siu amitg major Renner dad Uri, che fuva a Neapel, rasa ora siu maun el contuorn. En pign temps ha el ils mauns plein lavur. Schizun igl arzuestg da Neapel, che fuva confessur dalla regina Maria Carolina (Neapel formava da gliez temps in agen reginavel), lai far el in purtret; quel croda ora aschi bein, ch'igl artgusetg recamonda Felici alla regina. El haveva aspects da vegnir pictur dalla cuort rojala. Mo igl avanzar da quei jester leventa odi e scuidonza d'auters cocurrents. El vegn persequitaus taluisa, ch'el ei strusch segirs dalla veta, aschia che major Renner sto prender el sut protecziun e survigilonza. Quellas peniblas melemperneivladads caschunan puspei donn a sia sanadad e cun la malsogna retuorna era la stgira melanconia. Ils miedis cusseglian da turnar els cuolms dalla Svizra. L'aria sereina dalla patria vegni a refrestgentar tgierp e spert. Igl arzuestg lai menar nies Felici sin ses agens méls a Ruma. Leu pren el cumiau da ses amitgs e semetta cun la tresta depressiun el cor sin vaidi sur Milaun el Tessin encunter il Gottard.

4. En claustra
Sin il Gottard pren Felici albiert tier ils paders dil hospezi. La melanconia ha aunc buca bandunau sia olma. La veta da quels umens claustrals fa sin el gronda impressiun. El vegn sin il patratg, ch'el savessi anflar ventira e ruaus en quei uorden religius. Aschia s'annunzia el per il noviziat. Ils paders, vesend sia abnormala disposiziun spirtala, discusseglian ad el da far quei pass. Mo insistend el sin quei desideri vegn el prius el noviziat e vestgius cun il habit claustral. Con ditg el ha purtau quel savein nus buc. In di vegn el sin viseta neu el Grischun. Tgei smarvegl quei ha dau a Tschamut sur il niev "Bruder" Felici san ins cumprender. El fa ina viseta a siu parens sur Giusep Antoni Apporta plevon a Domat. (Sur Giusep Antoni Apporta da Sumvitg haveva la mumma da Tujetsch. Maria Catrina Venzin; el ei staus a Domat 1789-1789.) Quel vesa gleiti che Felici ei buca sin la dretga via: En claustra vegni sia grevadetgna mo pli gronda e porti ad el la mort. El dueigi buca returnar sil Gottard, mobein sededicar agl art. Felici suonda siu cussegl. Sia sanadad corporala e spirtala serestabilisescha empau alla gada. El setegn si in temps ad Ursera e lavura cuntinuadamein. 18 ovras da Diogg dateschan ord quei temps. Silsuenter serenda Diogg a Nossadunnaun, nua ch'el scaffescha ils dus purtrets dils avats Beat e Conrad, ch'ins sa ver aunc oz en quella claustra.

5. En la nova patria
Suandond l'invitaziun da scarvon Fuchs serenda Diogg a Rapperswil sper il lag da Turitg, nua ch'el anfla ina nova patria e passenta il rest da sia veta en lavur, ventira e cuntentientscha. Siu emperneivel caracter gudogna ad el biars fideivels amitgs, ils quals gidan el tier ina solida existenza. Igl onn 1791 vegn el burgheis da Rapperswil. Sia ventira fundescha ina ventireivla maridaglia (ils 19 da fevrer 1792) cun Anna Elisa Francisca Michelina Curti, la feglia dil tribun (Zunftmeister) Curti da Rapperswil. Diogg ha giu quater affons. In da quels, Felix, ha acquistau in num en la historia da Rapperswil. El fuva staus officier en Frontscha e daventa els anno 1830 menader dils democrats, che derschan la veglia constituziun e regenza dils liberals. El fuva in um da fin spért e da magnifica eloquenza, malgrad il verset, che ses amitgs han dedicau ad el:
Von Rapperswil der kleinen Stadt,
Kommt Diogg als Verfassungsrat
Mit Heldenaug' und Felsenstirn,
Mit viel Geschrei und wenig Hirn.
Per il pictur entscheiva a Rapperswil la pli fritgeival epoca. A Turitg scaffescha el in oreifer maletg da siu amitg dr. Kaspar Hirzel, il qual ha pli tard scret ina cuorta biografia sur Diogg. Plinavon fa el amicezia cun igl enconuschent Lavater. Igl onn 1797 vegn el ensemen a Stäfa cun il grond poet tudestg Goethe, il qual demuossa gronda simpatia per Diogg. Differentas empustaziuns da lavur meinan el sin pli liungs voiadis sco a Neuchatel, Basel, Bern, S.Gagl, Winterthur, Strassburg, Mühlhausen e Frankfurt. Igl onn 1814 vegn el clamaus a Karlsruhe per malegiar leu l'imperatura dalla Russia, consorta da zar Alexander. Era il zar sez dueva el malegiar, mo ils embrugls dall'uiara cloman el pli lunsch, avon che quei sappi daventar.
Diogg haveva survegniu sco artist in renum europeic. Differentas gadas survegn el invitaziuns da Paris e Vienna e schizun da Petersburg. Malgrad ils avantags, che seschavan spitgar, per el e sia famiglia en quels marcaus, refusescha el quellas offertas; el preferescha da restar ella patria, per la libertad dalla quala el ei fetg entusiasmaus. Era cunvegn il ruaus e la tgeuadad meglier a siu caracter, che la rueida dils gronds marcaus.
Ils davos onns da sia veta passenta el en miez da sia famiglia. Cheu scaffescha el aunc sco ina da sias davosas ovras siu agen portret, che sesanfla ella casa cumin da Rapperswil. Igl onn 1834 concluda el sia veta terrestra. Sia fossa sesanfla a Rapperswil.

6. Felici Diogg sco artist
Nies intent ei stau da porscher in amletg biografic sur Diogg. Da scriver pli bia sur sias ovras surschein nus ad ina plema pli cumpetenta. Nus mettein vitier paucs plaids sur siu art. Professer Hardmeyer di: "Felici Diogg ha schau anavos in grond diember ovras artisticas, che portan il bul da perfetga meisterilitad, sche era autras surpassan buca ils cunfins digl ordinari." Las biaras da sias lavurs ein purtrets. El capescha meisterilmein d'exprimer en ses maletgs il caracter dallas persunas, da scriver lur spert sil frunt e schar tarlischar quels ord ils egls. Quei ei il grond talent dil purtretist. El careza il natural ed enquera buca da plascher. Beinduras ein sia persunas idealisadas. - Gronda peisa metta el sin exact dessegn; cunzun els davos onns dessignava el cun scrupulusa exactadad. Sia forza schai el colorit. Cun la variaziun e harmonia dallas colurs exprima el en ses maletgs ina tut atgna bellezia. Ses maletgs han in caracter amureivel, che gudogna la simpatia digl aspectatur.
Diogg ha duront sia veta scaffiu in immens diember ovras artisticas. Da sias lavurs a Besancon ei pauc enconuschent. Biars maletgs da pli tard sesanflan en muesume e colecziuns, principalmein a Tujritg. La gronda part ei en possess da famiglias privatas ad Ursera, Nossadunnaun, Rapperswil, Bern, Thun, Wintethur, Mühlhausen etc.
Diogg sez numnava sco sias meglieuras ovras il purtret da siu sir Curti, da statalter Bühler da Rapperswil, dil capuciner Julius Kunz e da siu fegl major Diogg. Enconuschents ein era ils maletgs da Greith, cumponist dalla canzun dil Rütli e dil renomau politicher sogngagles Müller von Friedberg.

7. Siu caracter

Diogg fuva in um d'emperneivla statura, haveva, gronds egls stgirs e cavels tschuors. Qualitads fundamentalas da siu caracter fuvan rigurusa recliadad e giustia e profunda religiusadad. In sincer e profund senn religius ha cumpignau el dalla tgina tier la fossa, ed ei stau sia pli ferma ustonza els biars embrugls da sia veta. L'oraziun  fuva il remiedi, cun il qual el scatschava la grevadetgna e melanconia, che surprendeva savens siu spért. Quella religiusadad haveva sia pietusa mumma plantau e siu cor; leu haveva ella tschaffau fermas ragischs, sco tut auter, ch'el haveva fatg atras el selvadi vitg da Tschamut. Aunc en ses vegls dis schav'el encrescher e plidava bugen da sia emprema patria si en ils cuolms. Da menziunar mereta era sia carezia per il lungatg romontsch, la viarva da sia mumma. Nua ch'ei sepurscheva ina caschun plidava el romontsch. Sias oraziuns fagev'el adina per romontsch, aunc sin pugn da mort. Diogg ei adina restaus in um sempel, in idealist che encureva buca il mammon.  Ei vegn raquintau ch'el hagi pretendiu per il maletg dalla zara il medem prezi, sco per ils auters ordinaris maletgs, e vulend ella pagar dapli, hagi el strusch vuliu acceptar. El fuva in um gest e recli, malgiustia hassegiava el, e perquei fuv'el adina beinvesius e ha schau anavos buca mo il num d'in grond artist, mobein era, quei ch'ei aunc dapli, d'in bien e niebel carstgaun.

Ovras da Felix Maria Diogg (1762-1834)
S. Gieri sil clutger baselgia a Sedrun,	B.Ulysses von  Salis-Marschlins, 1794	General Johann Weber v.Brüttelen (1752-1799)
Herrenbildnis	Autopurtret	General Johann Weber v.Brüttelen, (1752-1799)
Karl Müller von Friedberg, (1802)	Hans Caspar Hirzel, dattau 1792	D. Lavater (1743-1826), litografia tenor Diogg
Jakob Anton Müller, 1777-1848 (mistral 1817-1819), sco buob, dattau 1785	Rosa Nager-Curti, 1772-1812, dunna dil mistral Jost Anton Curti	Elisa Franzisca Diogg-Curti, 1772-1849, dunna da Felix Diogg, dattau 1830
Franz Josef Nager, 1709-1786,  mistral dad Ursera ad Andermatt, dattau 1784	Dorothea Nager, 1712-1792; dunna dil mistral Franz Josef Nager; dattau 1784	Pader Archangelus Wolleb, 1799-1817, plevon ad Andermatt, dattau 1812
Autopurtret, dattau 1825	Famiglia Müller, Altdorf, entuorn 1785
Autopurtret	Avat Beat Küttel, dattau 1790	Anna Barbara Lindinner-Escher; dattau 1791
Regula Lavater-Usteri cun fegl Diethelm; dattau 1792	Famiglia Esslinger-Escher; dunna Magdalena; feglias: Regina, Magdalena, Esther, Anna Maria; dattau 1793
Johann Caspar Lavater; dattau 1794	Jakob Zellweger; dattau 1794	Barbara Zellweger-Zuberbühler; dattau 1794
David von Wyss; dattau 1795	Autopurtret	Anton Oberli; dattau 1796
Amantia Oberli-Natsch; dattau 1796	Leonhard Nüscheler; dattaua 1796	Anna Nüscheler; dattau 1796
Johannes von Müller; dattau 1797	Josef Büeler; dattau 1797	Heinrich Krauer; dattau 1799
Signur da Neuenburg	Catherine Eck-Hirt	J.H. Sulzer von Wart
Zara Elisabeth Alexeiewa	Elisa Diogg-Curti	Franzisca Diogg
J. R. Forcart-Weiss	Johanna Osterrieth	Franz Bachmann
Signur da Turitg	Anton Gäwiler	Johannes von Müller

La schlatteina Diogg en Tujetsch
La suandonta survesta presenta tut ils Dioggs ch'ein naschi e morts en Tujetsch!

Naschientschas 1664-1900

Mortoris 1664 - 1879