Ei
era in di da settember, che nus sesanflavan ella Val Tujetsch ed havein leu aunc
tard encunter sera fatg ina pintga excursiun sin Giuv. Biars onns eran spirai,
dapi che nus havevan visitau la davosa gada quei liug isolau. Nossa uratta,
Maria Catrina Venzin, era da Giuv, e perquei havein nus aunc adina empau
simpatia per quei tec tratsch leusi sin quei crest. Nus eran serendi da Rueras a
Dieni, da leu a Muschnatscha e da Crusch da Giuv si. Oragiu sut la caplutta sper
ils faners havein nus fatg ina pausa e mirau empau entuorn. Ins ha da cheu anora
ina stupenta survesta sur l’entira Val Tujetsch, priu ora dadens gl’uaul, Selva
e Tschamut. Gl’entir di ora havev’ei pluiu e draccau, ch’ins ha stuiu star en
stiva, e beinenqual cumar haveva giu mess fiug en pegna; e buca per nuot,
pertgei si dad ault er’ei bess la neiv. Denton ussa vi encunter sera er’ei
puspei setratg si ed ei pareva da far bial’aura danovamein. Il sulegl mava da
rendiu, l’umbriva era gleiti damaneivel dalla riva dil Tgom; ils cuolms entuorn
nus purschevan in magnific aspect. Leu ora giudem vesein nus il Muraun cun ina capetsch’alva, che para da tener guardia sur il far e demanar dils da Tujetsch. Nua che nus stein, tratgan ins, mirond encunter Mustér, ch’ins serabetschi buca pli lunsch che Garmischeras, ni sil pli entochen la Val Franzosa, essend ch’ils uauls Cavorgia e dil Bostg seuneschan leu, sco sch’els lessen serrar giu tut transit; en certs graus fuss ei enqual ga fetg surviu! – Mirein nus da maun seniester, sche crodan il Cuolm da Vi e Caschlè en egl. Ina curiosa cumparsa fa quei Cuolm da Vi cun sias spundas, pilver sco in pèr caultschas, ch’ein cuntschadas sil pli ault grad. Silla Pala gronda ina tarmenta scrotta, sisum Cungieri in’autra e lu sin Vons tut gagl. Tgei ei quei? Schegie ch’ils Tuatschins han giu uonn ina buna raccolta da fein, sche han els tonaton buca piars temps e puspei rimnau da tuttas varts ina massa fein a pastg; ina excellenta perdetga da lur activitad e da lur spargnar. Il fein vegn scarts uonn e lu, avon che scugliar naven ils tiers per nuot ni per pauc, lein nus segidar sco nus savein. Quei ei lur calculaziun. Jeu creiel strusch, ch’il Fistatg da Vons seigi vegnius isaus ora enzacu schi fetg sco uonn. Tscheu e leu havevan ins era serrau la faultsch pulit, ins veseva quei lunsch naven.
Il medem aspect porsch’era il Caschlè cun siu barlot da veglia memoria. Las palas da Londadusa, ch’ins veseva mo la part sisum, ils Trutgs aults, la Foppa verda, dapertut era ei vegniu raccoltau. – Grad sut la Foppa verda giu schai il mises Mila, il qual, mirond cheu encunter, leventa si beinenqual legreivla reminiscenza ord nos giuvens onns. Siu schinumnau Crap gries dess ora beinenqual buccada da metter el caffè, sch’el fuss – da zucher. En quei liug havein nus era fatg nos emprems studis el lungatg tudestg. Nus buobs havevan mintgamai in agen tschaffen, cura che in ni l’auter tudestg vegneva sul Rizli dalla Val Mila oragiu, cun sias caultschas stgir-verdas, cun in tschiep aschi cuort sco il libroc e la liunga capetscha da seida cun in hazer tingalin. Cheu devan nus bein adatg, cura che quels tschintschavan culs umens dil mises e bein gleiti savevan nus era dir: «Wo gehnt ihr hi? Uf sant Jakob aba, süli go reicha!»
Grad sur nus si, sisum la spuretga Pulanera sesaulza ina tarmenta meidia, sco sch’ella less pertgirar en quei dartguir il spért da lavina, che ha gia fatg beinenqual ga sterment als habitonts da Rueras. – Sevulvein nus sin maun dretg, sche croda gl’emprem igl uaul Tschuppina si. La campagna, che nus havein giu fatg anno 1882 culla brigada XV da Cuera entochen Hospental ei tier nus e tier tuts da Tujetsch aunc en buna regurdientscha. Nus seregurdein aunc bein, co nossa partida era postada en quei uaul quasi in entir di ora, spetgond sin in vehement cumbat, ferton che las mattauns da Rueras purtavan da beiber a nus. Ils menaders da l’autra partida han cun quella caschun giu mussau pauca enconuschientscha dil terren dalla Val Tujetsch, e cun quei havein nus giu biala veta e spargnau la puorla. Dil rest haveva nossa battaria da muntogna, che era postada si Planatsch fatg ina bravura cun arver il fiug sigl inimitg, che bandunava tut en colonnas serradas il vitg da Sedrun. En cass dad uiara havess in tal s’avanzar digl inimitg giu ina tresta consequenza per el sez. Per l’emprema ga havein nus era saviu valetar la muntada dall’artigliaria da muntogna cun ses méls, che mavan dil Calcogn enagiu schi segirs sco las cauras. Segiramein fagess la Svizra meglier, sch’ei sto inagada tonaton esser – da tener in tec pli bia sin l’artigliaria da muntogna che sin quella da campagna, che semova schi vess ella planira, nundir sin nos cuolms. Denton fuss il survetsch tier l’artigliaria da muntogna in tec pli fadigius, e lu – cun méls ei buca tut che vul sedar giu. Basta, ussa havein e survegnin nus nossas fortezias e cheu duvrein nus ni méls ni cavals – denton daners, stagn biars per nossa paupra Svizra.
Per Tujetsch san las fortezias dil Gottard esser d’avantatg, silmeins en certs graus. Per gl’emprem han els obteniu cun quella caschun in flot stradun naven dils cunfins entochen sper las tegias dall’alp Tiarms, aschia che mintga pur sa ussa ir e vegnir cun siu carret rauba sco da durmir cun aunc haver la buna caschun da prender in refrestg: «Zur Rheinquelle». Per l’autra san ils Tuatschins haver buna speronza, che la Confederaziun metti ussa inaga neu sin siu agen quen in telegraf sur l’Alpsu, e forsa che quei pass vegn cul temps era tenius aviarts duront gl’unviern, che dess lu bia fadigias. Digl avantatg, che quellas fortezias han purtau e portien per hotels ed ustrias en nossa vallada, stuein nus schar tschintschar auters.
Sur igl uaul Tschuppina vi sesaulza la liunga tenda dil Tgom e Nual; giu da funs pastira da casa, per miez ora bostga e caglias, sisum treis alps: Tgom, Nual e Mut. Tenor nies manegiar fuss quella costa per miez ora in excellent terren per plantar en niev uaul. Da maun sut creschan ils pegns pli dabot ed ei dat pli biala lenna. Semenein nus cun nies egl pli alla dretga, sche pudein nus aunc grad ver sur Planatsch e Milez vi il Pez Cavradi ed il Badus, che tarlischan ella splendur dil sulegl cun lur nova neiv, sco sch’els fussen dad aur. Sil Cuolm Val havevan ei gia catschau a stavel ed ei ha num ir per nus, sche nus lein aunc mirar giu Giuv.
Strusch che nus havein fatg enzacons pass anavon, salidan nus dus robusts umens. Ei eran vid il segar risdiv, ch’era plitost cuorts, mo da ton megliera fixiun. Schegie ch’ei haveva giu pluiu quasi gl’entir di ora, quels dus umens havevan tonaton luvrau tudi. Malgrad lur vestgadira bletscha eran els aunc da bien humor. E sco els havevan aunc biars luvrau leuoragiu pils plauns entuorn, bein seregurdond dils plaids ch’ins auda en Tujetsch: Gl’atun san ins buca durmir giu; da s.Mattiu, pur, pren quei ch’ei tiu, e per esser pli segirs stauscha quei ch’ei odem gl’iral entochen entadem! S.Mattiu er’ei gia l’auter di, e da quei tschupi alv pils aults entuorn sehanavan ins aunc pauc; denton ei era in’enzenna, in’admoniziun, ch’in auter signur vegni gleiti sur il Rizli.
Nies pign discuors, che nus havein menau cun quels dus umens, era sur il pagament dils tiers. Quei ei adina la questiun gronda en Tujetsch. Quei che nus havein dils tiers – auter havein nus nuot. «Uonn paia ei pauc, aber nus spetgein tochen nos Baiers vegnan; sch’enzatgi paia enzatgei, sche paian quels; dil rest vein nus da biè fain; de quora giu on ei biè mender». –
Raschun havevan ei e lur calculaziun era buca mal. Ferton che nus scrivin questas lingias ein ils prezis tonaton pli aults e cul temps vegn ei, speronza, aunc meglier, mo pazienza! «Dius pertgiri!» era lur cordial salid, ferton che nus eran gia daditg endisai mo cun bien di e buna sera.
Avon nos egls stat ussa Giuv cun sia caplutta dedicada a s. Bistgaun. Giuv dumbra ussa circa diesch baghetgs pigns ni gronds e duei esser stau tenor veglia tradiziun in dils emprems uclauns en Tujetsch, sche buca gl’emprem. Dapresent sesanfla leu negina casa pli, mo ch’ei existevi leu pli daditg in vischinadi, havein nus plirs arguments. Il num Giuv deriva dil plaid latin «jugum», che vul dir ton sco giuv, crest. En veglias scartiras anflein nus perquei aunc savens scret Juf enstagl Giuv. Era la posiziun dil liug muossa, che quei num hagi sia gesta significaziun. Sco ei vegn raquintau, era la sola dalla Val Tujetsch dad in temps in spess uaul. Pliras casas dil vitg da Rueras, sco per exempel quellas nua che Duri Riedi, Martin Peder e Giachen Antoni Venzin stattan ussa, dueien esser baghegiadas cun lenna dils Plauns Flurin. Igl ei fetg natural, ch’ils emprems habitonts hagien fatg si lur habitaziuns sin crests suleglivs, ordvart dils spess uauls, nua che da tuttas sorts animals selvadis avdavan.Tals loghens eran segiramein Giuv e Caspausa, che vegnan teni per ils emprems logs habitai en Tujetsch.
Danunder ils emprems habitonts da Tujetsch ein vegni, savein nus buca dir, denton fetg probablamein sutsi e buca sur il Cuolm d’Ursera. Schebein s.Sigisbert seigi vegnius surenneu ed aschia tras la Val Tujetsch ni buc, lein nus buca decider. Ei exista arisguard la vegnida da s. Sigisbert a Mustér treis ideas. Ina part pretendan, ch’el seigi vegnius sur il Cuolm d’Ursera (Crispalt), auters dian, ch’el seigi vegnius sur il Lucmagn, e puspei auters manegian, ch’el seigi vegnius sutsi, la quala pretensiun savess forsa esser la pli probabla. Cun raschuns e motivs lein nus buca seschar en per oz, forsa in’autra gada. Historicamein anflein nus igl onn 1251 notizias sur il casti da Putnengia, ord il qual la renomada schlatteina Pontaningen deriva, che ha dau alla venerabla claustra a Mustér in famus avat cul num Pieder ed alla Surselva il fundatur dalla Ligia Grischa. Dil num Tujetsch (Tivez) vegn ei fatg menziun pér igl onn 1300 e quei en ina scartira digl avat Nicolaus I da Mustér, nua ch’el surlai en moda da regal alla claustra da Wettingen, Cantun Aargau, ils dretgs sur ina certa brava dunna – honestam mulierem Berchtam – sco era sur ses affons. La schlatteina Berther (Berchter) existeva cumpatg gia da gliez temps en la Val Tujetsch.
Sur Giuv sez havein nus, malgrad tutta breigia, anflau mo paucas notizias positivamein historicas. La davosa casa, ch’eri leu, sesanflavi en quei fiep dadens il baghetg da frars Hetz. In’autra stevi entadem, nua ch’ins va enagiu tiel flum. In ton dils mirs stattan aunc uss, sche nus sbagliein buc. Ord quella casa vegn ina certa Liberata Schmed, che steva pli tard a Rueras. Da quella femna vegn ei raquintau, ch’ins havevi mess inagada ella da pign affon avon casa en in carret d’affons, e che quei carret seigi ius cun ella dalla plaunca giu tochen giu ell’aua senza far enzatgei. Pilver, quei affon sto haver giu in bien aunghel pertgirader!
Gl’onn 1805, aschia raquenta pader Placi a Spescha, stevien aunc duas casas a Giuv. Dil rest anflein nus aunc oz leu puozs, chischners e clavaus vegls cun irals, in’enzenna ch’il graun ed il glin vegnevi cultivaus e rugalaus leu. Ils trutgs, che meinan dadens Giuv videnagiu ella Rufna e da leu anenasi encunter Mulinatsch, survevan senza dubi per las cauras ed auters tiers da casa dil vischinadi. A Mulinatsch mava la pastira da casa per Giuv entochen en sco Plibiala dat neu. Fetg probabel gudeva Giuv era Liets sco pastira da casa ni sco mises, sco quei ch’ils differents trutgs, che meinan dil crest dalla Vallabuscha si, laian sminar.
Duas persunas da Giuv havein nus aunc enconuschiu, numnadamein Tschamun Decurtins e Giachen Francestg Berther, che stevan omisdus silsuenter a Rueras. Il davos era staus cavrer a Giuv e sedeva giu pli tard cul mistregn da calger. Nus savein aunc seregurdar bein da quei brav um cun siu tschiep mantschester, co el vegneva a cuser tier uns, co el metteva si siu spieghel grond la sera da cazzola. Temps d’unviern vegneva ei numnadamein aunc adina luvrau in pèr uras suenter tscheina. Quei bien vegl calger era nies vischin, e ton sco nus seregurdein haveva nossa mumma bugen quei um. Nus savein buca tralaschar da raquintar cheu in per anectodas da quei remarcabel calger. In da nos frars, che haveva in tec argien viv da pli che ordinaris buobs, era inagada cun in auter legher cumpogn si en ina pala dils praus Mila e mava da quellas palas giu, buca en costas, mobein pli en plat. Tut da rabia vegn nies bien calger tier la mumma e di: «Uardei co se quels dus, quai è dus vairs lumps! Sè quai fatg cun resti!» Tgei aura igl ei stau quella sera a casa sai jeu nuota pli. Vegneva el a cuser tier uns, sche schabegiav’ei bein enqualga, ch’el prendeva nos calzers, ch’eran matei tarschinai malamein, en ses mauns, fageva vegnir nus avon el e deva ina seriusa admoniziun: «Sè quei co puspè manau cazès! Ju sa bétga tgé gianter vus fagiais!» Il meglier fagevan ins da quescher murtgiu e lu fageva el puspei in brav pèr calzers «sullabransulla» e catschava aunc si in hazer piogn persuenter. Quei bien um e davos calger da Giuv, el ruaussi en pasch!
En ina scartira digl ordinariat da Cuera digl onn 1765 vegn ei lubiu als vischins da Rueras e Giuv da metter neu ina scola per instruir la giuventetgna en leger e scriver. Il beneficiat u caplon da Rueras, che haveva da tener quella scola, retargeva sco pagaglia da mintga fiug, hagien els affons ni buc, u ina vaulta lenna ni 20 rizzers, pressapauc 56 raps. Avon temps havein nus era giu la caschun da mirar atras in tec igl archiv dalla pleiv a Sedrun. Per tala favur havein nus, d’engraziar al present sur plevon da leu. En quellas interessantas veglias scartiras havein nus denter auter era anflau ina gliesta dad ina certa confraternitad da s. Giachen (Fratres sancti Jacobi), che datescha digl onn 1616. Senza dubi ei quella confraternitad, dalla quala ins seregorda dapresent pauc pli en Tujetsch, stada eregida ella baselgia da s. Giachen a Rueras, il qual liug vegneva dad in temps era numnaus semplamein a S. Giachen. Entras entginas notizias e cumbinaziuns essan nus cun quella caschun era vegni sil patratg, che Rueras pudessi haver giu gl’emprem en Tujetsch in spiritual e che quei vegl foliant egl archiv a Sedrun, che cuntegn quei register savessi forsa esser staus cumponius e salvaus si all’entschatta a Rueras. Denton per nus ei ad interim mo quella gliesta dils confrars d’impurtonza. La confraternitad sco tala era seformada gia gl’onn 1609, denton s’organisada ni previlegiada pér 1616. Denter ils commembers da gliez onn, che pudevan esser en tut circa 40, sesanfla-va era in schit diember ord il vischinadi da Giuv. Ils nums ein: Gilli Jon, Genet Gilli, Jon, Jacob, Christ del Gilli, Griatta Genet, Onna Cians, Jon Reget, tuts da Giuv. Quei ei in mussament, ch’ei eri da gliez temps pliras casas a Giuv.
Cul vischinadi da Giuv sa forsa era l’alp Val Giuv esser stada all’entschatta en connexiun, silmeins sesanfla quella damaneivel e confinescha culla pastira da casa da Giuv, numnadamein Mulinatsch, Craps e Liets e porta ultra da quei era il medem num. Las alps Val Giuv e Val Val udevan, aunc en quei tschentaner, alla claustra da Mustér, e quei entochen gl’onn 1861, nua che la vischnaunca da Tujetsch ha cumprau giu ni pagau ora il tscheins fier per quellas alps per adina cun il capital da 7650.– frs. Tenor nies saver existan en fatgs da quellas duas alps aunc quater documents egl archiv da Tujetsch, ils quals nus havein entras buontad da signur president Soliva saviu mirar atras.
Gl’emprem datescha da1597e dilucidescha ina dispeta sur ils tscheins che la vischnaunca, respectiv ils pursanavels da quellas alps, stuevan pagar mintg’onn alla claustra. Ils pursanavels han giu declarau, ch’els sappien buca dar ton, numnadamein 5 centners caschiel grass (guot feist gesalzen Khess), ei seigi nunpusseivel. La fatschenta ei vegnida rugalada giu dil mistral regent da gliez temps Menicus Buldet. Da vart dalla claustra era cumpariu Christian Castelberg, avat, cun in advocat «L’urau von Gieriet, Seckelmeister zu Medels». En num dalla vischnaunca da Tujetsch «die ehrsamen und wisen Stadhalter Deg Durschey und Jacob Berchter alter Seckelmeister in namen deren Nachburen mit Fürsprecher Stadhalter Merens von Brigels.»
Igl ei vegniu stabiliu, ch’ils da Tujetsch hagien da pagar il tscheins cun 5 centners caschiel grass sco avon; ch’els stoppien mintgamai schar saver la claustra in di avon che la rauba vegni partida, sinaquei che la claustra sappi tarmetter in fumegl cun ina gesta stadera (mit einer grossen gerecht und gewerig Wag, die da gerecht syge). Duess ei dar difficultads, sche sappi il fumegl dalla claustra recuorer tier il salter dalla vischnaunca da Tujetsch. Il caschiel sappi la claustra encurir ora sin las crunas en tschaler da mintga tegia, stoppi denton lu ir vinavon sin quella cruna, entochen ch’ella hagi il quantum fixau.
Ord quellas notizias stuein uns concluder, ch’ei vegnevi dad in temps caschau grass en quellas duas alps; denton sco nus havein enderschiu, mo in cert temps, per aschia saver cuntentar la claustra, gl’auter temps vegnev’ei caschau magher. Dapresent vegn ei caschau magher en tuttas alps da Tujetsch. Dil pieun da «fessli» savevan ins aunc avon paucs onns nuot en Tujetsch. Tgei havessen nos vegls detg sur da quei fabricat, els che caschavan aunc grass ed havevan aschia aunc pli pauc pieun? Els tenevan pli bia sin in bien caschiel, che era grass ni che haveva aunc en enquala flur e spargnavan tons cuschinems dad ozildi. Dad in pur sin Giuv vegn ei raquintau, ch’el havevi aschi bia caschiel caura en tschaler, ch’in miradur havessi saviu far in entir di mir cun tal magnuc! Plinavon savein nus concluder, ch’il caschiel vegnevi da gliez temps salvaus si en tschalers entochen descargar dad alp. Ton sco nus savein, vegneva il caschiel da quellas duas alps salvaus si a Rueras en quellas truaschs sper la casa da Giachen Antoni Venzin, en quella da frars Cavegn e lu en il grond tschaler dalla casa nua che Duri Riedi stat, che ha aunc ussa ina porta dubla. La rauba vegneva purtada sin bast ord las duas alps, e zuar Val Giuv vegneva dil maun da Giuv, Val da Sudada giu. Ils cavals, ch’ins duvrava leutier, stuevan haver si in bucseigl, ina specia da buccari. – Dapresent va ussa mintga pur sez ell’alp a caschar e meina ni porta lu sia rauba immediat a casa e rugalescha en siu tschaler. Signuns han ins negins pli. Biars vegnan a sesmarvegliar sur tal cundrez, mo nus savein dir, che mintga caussa ha duas varts e ch’ins hagi pli daditg era giu signuns en Tujetsch. Tgei che seigi meglier lein nus schar dad in maun e mo far la damonda: Savess Tujetsch buca haver pli gronda rendita ord il latg da tontas vaccas e cauras in entir onn ora? Quasi tut pieun e caschiel vegn consumaus ella val sezza. Cun star ensemen, silmeins ina alp cun cauras e vaccas, caschar grass e rugalar endretg, dess quel in famus product, ch’era gronds signurs schassen plascher; il transport fuss aunc buca schi lunsch entochen Caschinutta. Per tal intent savess ins schar liber in’alp, e mintga pur pudess metter en quella ina ni duas vaccas e far aschia in’emprova. Denter biaras ideas ei quei era ina, e nus lein tuttavia buca haver detg, che quei seigi la megliera.
Il secund document en caussas da quellas duas alps ei da 1804. En quel vegn ei determinau, ch’ils pursanavels hagien da dar mintg’onn sco tscheins, avon che parter la rauba, 600 crenas caschiel grass (wärschaften fetten Käs). Arisguard il pesar ora valan las medemas reglas sco sura. Cheu encunter s’oblighescha la claustra da surschar las alps vinavon, ed en cass da midadas hagien ils da Tujetsch adual adina gl’emprem dretg. Suttascrets ein en quella scartira, ch’ei puspei concepida en lungatg tudestg, da vart la claustra: Anselmus, avat, pader Basilius Veith, decan. Da vart dalla vischnaunca ils geraus: Christian Joseph Venzin, Thomas Josephus Beer ed Ulrich Venzin.
Da quei temps datescha probablamein era igl usit dalla claustra da retrer enstagl il caschiel en natura il daner persuenter e zuar 18 rizzers la crena. Ei steva denton liber alla claustra. Ils davos onns vegneva ei adina pagau ora en daner e quei il di da s. Martin dil statalter dalla vischnaunca.
Gl’onn 1861 ei vegniu fatg la convenziun, nua che Tujetsch s’oblighescha da pagar giu il tscheins fier dallas alps Val Val e Val Giuv, consistent en 600 crenas u 850 funs caschiel grass, annuala grevezia alla claustra da Mustér, cun il capital da 7650.– frs. en diversas ratas, suenter la quala liquidaziun Tujetsch seigi lu sligiaus per adina da tuttas grevezias visavi la claustra. Suttascret han: P. Martin Andreoli, administratur claustral, e da vart dalla vischnaunca ils geraus: Hans Giachen Beer, J. A. Berther e Duri Venzin.
En ina nova e davosa scartira sur quels fatgs da 1866 vegn ei stabiliu, che la vischnaunca da Tujetsch cedi da sia pretensiun sin il gentar da s. Martin. Persuenter lai la claustra anavos 2000.– frs. dil capital, sco era il restont tscheins da 100.– frs., ed aschia calan tuts dretgs e grevezias da mintga vart si. Quei gentar da s. Martin per il plevon, ils geraus e calusters, che la vischnaunca pretendeva sco per in dretg, ferton ch’ei era mo ina isonza ni abus, era vegnius si cheutras che la claustra ha giu entschiet a dar ord atgna voluntad e per creanza enzatgei gentar als cautegias da quellas duas alps; silsuenter ei la respectiva suprastonza vegnida vitier e pli tard tut quels ch’eran enzacu stai en uffeci da vischnaunca, aschia che la tablada dumbrava entochen 26 persunas.
Suenter haver fatg quella pintga excursiun sur las bialas alps Val Val e Val Giuv lein nus puspei turnar anavos a Giuv ed avon che prender cumiau aunc visitar sia baselgia. Dador la baselgia stat sper il mir si ina sempla crusch da lenn, che porta il num da Jesus ed igl onn 1836. Nies cor vegn penetraus da dolur, essend che quella enzenna dil salit regorda nus vid la disgrazia, ch’ei succedida cheu la sera dalla fiasta da Nadal entras ina lavina. Quater giuvens perveseders ein vegni suten; dus da quels han aunc pudiu vegnir spindrai, mo ad in han ins stuiu prender giu ina comba, ferton ch’ils dus auters ein daventai l’unfrenda dalla mort; denter quels sesanflava in bien aug, che steva en ses 28 onns. Tgei dolorusa nova ei quei mintgamai per geniturs e fargliuns!
Suenter haver recitau in De profundis per il ruaus da quellas olmas e rugau Niessegner, ch’el pertgiri la Val Tujetsch da talas disgrazias, essan nus serendi en baselgia.
La presenta baselgia da Giuv ei dedicada a s. Bistgaun e sa esser vegnida baghegiada aschia entuorn 1650. Fetg probabel existeva leu avon in’autra caplutta, e sin quei patratg ha il datum dil zenn menau. El pign clutger sesanfla mo in zenn. Vul ins vegnir tier quel, sche ston ins seruschnar dil tetg enasi. Quei survetsch ha in bien amitg fatg, ughegiond sias caultschas cun la resca d’aunc far in per sgreffels. Il resultat ha denton cuntentau la breigia ed era la marveglia. Il zenn cun sias numerusas furclettas egl ur para gia dalunsch d’haver fatg atras dabia. Sper l’inscripziun: Sancta Maria, ora pro nobis, porta el las figuras dil crucifix, da Nossadunna e, sche nus sbagliein buc, era da s. Onna. Plinavon anflein nus il vegl datum da 1780 e sutvi la remarcabla suttascripziun dil meister: «Joseph Bonifaz von Walpen von Rekigken fon Wallis.» Senza dubi ei quei zenn in dils pli vegls en Tujetsch e lu la interessanta nova ch’el vegni ord il Valleis! Quei sto esser stau in fadigius transport dil Valleis si, sur la Furca, tras la val e sur il Cuolm d’Ursera, d’in temps ch’ins saveva aunc nuot da vias. Gl’onn vargau havein nus legiu ella Gasetta Romontscha, che l’ura dalla baselgia da Rueras, che funcziunescha aunc ussa stupent, vegni ord il Valleis. Era il zenn grond da leu cul datum 1490 vegn probablamein dil medem liug e forsa era il zenn grond da Tschamut, che ha gronda semegliadetgna cun quel da Rueras. Il zenn grond da Selva da 1788 cun sia ruosna ed il pign da 18(2)2 portan medemamein il num dalla firma da Walpen da Reckingen ord il Valleis sura. Ei sto esser, che Tujetsch haveva dad in temps empau communicaziun cun ils Vallesans ni Vallesanas, buca mo cun schar cular zenns e bransinas, forsa era en auters fatgs.
Igl altar dalla baselgia da Giuv ha in pulit maletg, che representa enamiez Niessegner vid la crusch; da maun dretg grad sper la crusch Nossadunna e s. Bistgaun; da vart seniastra s. Roc e s. Carli Borromeus. Davon il maletg sesaulza ina bufatga scaffa da glas cun ina nova, biala statua da s. Bistgaun; pli daditg sesanflava en quella scaffa Nossadunna dallas dolurs, che vegneva venerada leu en particulara moda, sco la tabla votiva pendida si sper gl’altar muossa. Ella porta il datum 1774 e representa, co Nossadunna dallas dolurs ed ils auters sontgissims patruns da Giuv han giu conservau in um, ch’ei ruclaus enasi Val Mala da far nitschuns, sco ei vegn raquintau.