Cudisch de Protocols
della sozietad de tratga de cauras per Sedrun-Gonda

Archiv communal Tujetsch sut cudischs nr. 15.43. / Nudau cronologicamein.
Igl archivar Tarcisi Hendry.
 

  Fundaziun 1948
       
1948 Protocol della radunonza dils vischins Sedrun-Gonda dils 13 de Mars 1948
1. Sut sura datum ein ils vischins de Sedrun e Gonda stai radunai per ponderar, sche bein ins lesi fundar ina sozietad de cauras (de tratga). Suenter ina viva discussiun sur ils avantatgs e disavantatgs de quella sozietad de tratga, pasan ins tier la tscharna, la quala ei unanima de fundar ina sozietad de tratga de cauras.
2. Pasan ins tier las elecziuns dils funcziunaris della sozietad, che vegnan mintgamai elegi per dus onns.
Sco pres. vegn elegiu Hendry Fidel, meina cudischs Caveng Cristian, che funcziunescha en medem temps sco actuar e vice president, cassier, Caveng Ambrosi, revisurs de quen Baseli Huonder e Schmid Heinrich.
3. Experts vegnan elegi, Berther-Huonder Tumaisch e Monn Lucas. Ils quals vegnan elegi cun la condiziun che tier la cumpra dils bucs stopien ils experts ira e mirar las cauras de tals bucs.
Supleants dils experts, Gamboni G. Giusep
4. Vegn concludiu dentscheiver de niev cugl uorden de tener bucs
Igl actuar de quei di
Schmid Heinrich
   
  Protocol della radunonza dils 21 de mars 48
Sut sura datum ein ils commembers della soz. de tratga de cauras Sedrun-Gonda stai radunai per l'empremaga e tractau il suandont.
1. Sgr. pres. Fidel Hendry arva la radunonza beneventond ils com. presents e gaivischond in enperneivel decuors della hodierna radunonza.
2. Vegn passau tier la emprema e principala tractanda ded oz, numnadamein tier la repasaziun ed aprobaziun dellas stattutas. Quellas vegnan entras sgr. president prelegidas e tier mintga artechel vegn tras libra discussiun dau caschun a novas propostas e midadas. Cun pintgas midadas ein quellas suenter ina generala discussiun finala vignidas approbadas unanimamein. Mes el schuber las differentas midadas dueien quellas vignir admessas al lud. cussegl pign per approbaziun.
3. Ei vigniu concludiu en connex cun artechel 2 punct 8 dellas statutas de gia uon sche pusseivel cargar ad alp de cuminonza bucs ed anseuls. La soz. bonifichescha ord cassa ils catschaders de quels tiers en l'alp sco era igl ira per els.
4. Suenter entgina discussiun en caussa vegn expresivamein concludiu de schar sura la cumpra dils anseuls bucs als experts numnai dalla sozietad.
5. Vegn repasau igl uorden spezial de bucs. Suenter entgina discussiun e differentas midadas vegn era quel approbaus unanimamein.
6. La damonda ded eventual era prender ils vischins de Bugnei en nossa spz. ei suenter pintga discussiun veignida surschada alla suprastonza per liquidaziun cun  fixar ad els in termin ded 8 dis dad oz naven.
7. Per conclusiun ein ils pervesiders dils bucs per 1948/49 vegni tratgs ora cun la sort. Tals ein: Sedrun: Gamboni G. Giusep, Venzin Tumaisch e Monn-Beer Gion Antoni, Gonda: Soliva Battesta e Cavegn Cristian.
Possessurs de bucs ded 1 onn che ston aung envernar quels 1 onn ein: Sedrun: Flepp Giusep, Decrusch Martin, Monn Gion Andriu, Cavegn Gaudens. Gonda: Berther Vigeli e Deragisch Crist.
8. Essend la soz. per oz seconstituida remeta la suprastonza de preparaziun ils uffecis els mauns della lud. sozietad engraziond per la confidonza e suplicond de far novas elecziuns ord il miez della sozietad. Tuts funcziunaris ein danovamein vigni confirmai: president Hendry Fidel, vice pres. e scarvon dils cud. de tratga Cavegn Crist., cassier Cavegn Anbrosi, Experts: Berther-Huonder Tum. e Monn Lucas, rev de quen Huonder Baseli e Schmed Heinrich, supl d'exp. Gamboin G. Giusep.
Cun quei ei stau finiu e la radunonza ei vignida serada.
Igl actuar: Cavegn Christian
      
  Statuts Societad tratga de cauras 1948
Regulativ de bucs per soz. tratga Sedrun-Gonda
    
  Protocol della radunonza dils 24 d'october 1948
Sut sura datum ein ils commembers della soz. de tratga de cauras stai radunai e tractau il suandont.
1. Prelecziun ed approbaziun dils protocols anteriurs.
2. La damonda per intrar ell'uniun svizzera de soz. de tratga de cauras vegn refretga.
3. Orientescha sgr. pres. ils commembers davart la punctaziun che ha liug ils 29. d.q. all'ina suenter miezdi. Cun tscharna vegn concludiu d'entscheiver uonn gl'emprem a Sedrun e ca. allas 3 uras a Gonda.
4. Vegn concludiu de rimnar las cauras il di avon la punctaziun entras 2 - 3 mattatschs e pagar quels ord cassa della sozietad, priu ora il cavrer che sto far quei sco cavrer dil vischinadi.
Cun quei ei stau finiu e sgr. pres. ha saviu serar la radunonza.
Igl actuar: Cavegn Christian
    
1949 Protocol della radunonza generala dils 5.3.49
Sut sura datum ein ils com. della soz. de tr. d. cauras stai radunai e tractau il suandont.
1. Prelecziun ed aprobaziun dil protocol anteriur.
2. Rapport dil president e meina cudischs sur dil menaschi e statuts della sozietad
3. Rendaziun dil quen cun ina intrada de frs 291.95 viers ina expensa de frs. 339.95 che resulta in deficit e deivet de frs. 48.-. Essend che havein aung debien tuts subsidis de cantun e confederaziun ei il manco de quen zun capeivels.
Per ils revisurs de quen rapporta sgr. Baseli Huonder recumandont alla radunonza d'approbar ils quens cun engraziament e render a tuts funcziunaris d'escharschar, il qual daventa entras unanima tscharna.
4. Entras sort vegn destinau ils pervesiders de bucs per 1949/50, sco suonda:
Sedrun: Monn-Beer Placi, Caveng Tumaisch, Huonder Baseli. Gonda: Deragisch Emanuel, Hendry Giachen, Monn Gion Michel.
5. Suenter viva discussiun vegn fatg differentas midadas vid il regulativ de bucs e concludiu sco suonda: Ils anseuls bucs vegnan cumprai dals experts aschi favoreivel sco puseivel e reparti entras sort sils pervesiders e quei per il preci current da maz. Sco indemnisaziun per tener buc retscheivan ils pervesiders de quels 40.- frs per onn ord cassa della sozietad. Per encunter va la sozietad cun tuts ils daners de puncts e premis. Il pervesider ei obligaus de far tut pusseivel de haver il buc sin la punctaziun e premiaziun, cass cuntrari sa ei vignir snegau ad el la contribuziun de frs. 40.- ord cassa della sozietad.
6. Las proposiziuns della suprastonza de pagar ina taxeta per anseuls de tratga e per menar las cauras sin la punctaziun ein vignidas renviadas entras tscharna.
7. Vegn entras sgr. Baseli Huonder revisur de quen tratg a strada de fixar ina indemnisaziun als funcziunaris il qual ei daventau sco suonda. President 20.- frs, casseir 30.- frs ad onn, meina cudisch 30 cts per tier punctau ad onn e 50 cts per marca e 50 cts per attest de derivonza. Experts de bucs 8.- frs a di plus las spesas de viadi. Entras tscharna ei vigniu concludiu de pagar ord cassa las sura taxas per marcas ed attests de derivonza dils anseuls.
8. Finalmein vegn aung fatg appel, il qual resulta ina presenza de 45 comembers.
Cun quei ei stau finiu e sgr. pres. siara la rad. engr. per la pazienzia.
Per il sura
Cavegn Chr. actuar
       
1950 Protocol della radunonza generala dils 5.3.1950
Sut sura datum ein ils commembers della soz. d. tr. d. cauras stai radunai e tractau il suandont.
1. Suenter avertura e beneventaziun entras sgr. president, suonda la prelecziun ed approbaziun dil protocol anteriur.
2. Prelegia sgr. cassier il quen digl onn passau cun ina intrada de frs. 1013.25 viers ina expensa de frs. 935.60 che resulta in avanzament de frs. 77.95. Per ils revisurs rapporta sgr. Heinrich Schmed, recumandont l'aprobaziun e d'escharscha a tuts funcziunaris il qual daventa entras unanima tscharna.
3. Ei suonda cuorts rapports sur il menaschi e status della sozietad, entras sgr. president ed actuar. Cheu vegn spezialmein punctuau che mintga commember seigi obligaus de  menar sias cauras sin la punctaziun, cass cuntrari sappi tal vegnir sclaus dalla sozietad.
4. Vegn mes en discusiun gl'uorden de bucs e suenter viva discusiun concludiu de midar tal regulativ sco suonda. Dacheunaven vegn pagau a tuts pervesiders de bucs, sut las medemas condiziuns sco dacheu, 30.- frs ad onn ord cassa della sozietad. Piarda in pervesider siu buc avon il premi vegn quel bonificaus cun 20.- frs egl emprem onn ch'el enviarna quel e 30.- frs el secund onn.
5. Finalmein vegn tratg ora ils pervesiders de bucs per 1950/51. Sedrun: Monn Gion Batt., Monn-Berther Vigeli, Monn Rest Valentin. Gonda: Berther-Huonder Tumaisch e Schmed Tumaisch.
6. Vegn passau tier las elecziuns. Tuts funcziunaris remettan cun engraziament lur uffecis en mauns della sozietad. Essend ch'ei dat neginas deffinitivas demissiuns vegnan ils veders entras tscharna confirmai per ina perioda de dus onns.
7. Per conclusiun suonda gl'appel che resulta ina presenza de 50 commembers.
Cun quei ei stau finiu e sgr. president siara la radunonza engraziond per la premura e pazienzia.
Gonda 10.3.50
Christian Cavegn, actuar
     
1951 Protocol della radunonza generala dils 25.2.51
Sut sura datum ein ils commembers de nossa sozietad stai radunai e tractau il resultat.
1. Sgr. president arva la radunonza beneventond ils presents e giavischond in enperneivel decuors de quella.
2. Prelecziun ed aprobaziun dil protocol anteriur.
3. Suonda la principala tractanda ded oz, numnadamein la rendaziun de quen. Il quen de 1950 muosa ina intrada totala de frs. 981.75 viers ina expensa de frs. 763.42 che dat in avanzament per 1950 de frs. 218.33. La facultad munta oz sin 296.28 frs. Ils quens vegnan suenter in clar rapport dils revisurs approbai unanimamein e cun prender tutta responsabladat.
4. Vegn mes avon ina eventuala midada digl uorden de bucs, respectiv dil pagament als pervesiders de quels. Sin proposiziun della suprastonza vegn suenter entgina discusiun concludiu de turnar a midar quella taxa da 30.- frs sin 40.- frs ad onn. Pia obtegn mintga pervesider de buc che sesprova mintgamai de vegnir cun quel sin la premiaziun 40.- frs ad onn sco indemnisaziun dalla sozietad.
5. Suonda la tratga dils pervesider de bucs per 1951/52. La sort croda per Sedrun sin: Monn Stiafen, Schmed Giachen Ant. art, Schmed Teofil. Gonda sin: Schmed Heinrich, Hendry Toni e Cavegn Thomas satler, plus 1 per Bugnei, che resulta la cumpra de 7 anseuls bucs.
6. Finalmein vegn fatg appel che muosa ina presenza de ... comembers.
Cun quei ei stau fiiu e sgr. pres. siara la rad.
Per fei dil sura.
Igl actuar Cavegn Christian
    
1952 Radunonza generala dils 19.3.1952
A l'ura fixada sa sgr. pres. arver la radunonza beneventond ina pulita roscha commembers.
1. Vegn prelegiu il protocol anteriur, il qual vegn approbaus unanimamein.
2. Suonda la rendaziun de quen. Il quen per 1951/52 muosa ina intrada de frs. 1091.10 viers ina expensa de frs. 953.45 che resulta in avanzamen de frs. 137.65. La facultad munta oz sin frs. 433.93.
3. Sgr. revisur Baseli Huonder rapporta sur la revisiun de quel. Senza ulteriuras remarcas vegn quel aprobaus unanimamein e concediu decharge a tuts funcziunaris.
4. Essend che il pervesider de buc Heinrich Schmed ha dismess sias cauras, vegn mes en discusiun il co e tgei far cun tal buc. Suenter viva discusiun vegn entras tscharna concludiu de deliberar sgr. Heinrich Schmed dalla grevezia d'aung tener in onn siu buc e schar liber ad el de vender quel.
5. Vegn tratg la sort dils pervesiders de bucs che tuca sco suonda: Sedrun, Cavegn Giusep, fravi, Cavegn Placi art., Cavegn Albert.; Gonda, Berther Giusep e Beer Gion Ant.
6. Suonda la rendaziun d'uffecis ed elecziuns. Presiden Hendry Fidel, actuar e meina cudischs Monn Vigeli, cassier Cavegn Ambrosi. Experts, Berther-Huonder Tumaisch e Monn Lucas, revisurs de quen Soliva Ignazi e Berther-Soliva Tumaisch. Brischa-corns Beer Ignazi.
7. Al niev ufficial brischa-corns vegn concludiu de dar ina paga de frs 5.- ad onn.
8. Finalmein suonda gl'appel che resulta ina presenza de 38 commembers.
Cun quei ein las tractandas stadas lugadas e sgr. presiden sa serrar la radunonza.
Gonda 20.3.1952
gl'actuar, Cavegn Chrsitian
     
1953 Protocol della radunonza generala ils 10.3.1953
Sut il sura datum ein ils commembers de nossa soziettat stai redunai e tractau il suandont.
1. Arva sign. Presiden la radunonza e giavischa a tuts in cordial beinvegni.
2. Prelecziun dil protocol ed aprobaziun de quel.
3. Raport dil presiden.
4. Rendaziun de quen entras il casier Cavegn Ambrosi
Expensas 1239.05 Fr.
Intradas 936.60 Fr.
Surpli intradas 302.45 Fr.
La Facultat munta oz sin 736.38 Fr.

Sil suneter dat sign. revisur de quen in detagliau raport sur il quen, il qual vegn lu tras tscharna aprobaus cun surprender tutta responsabladad visavi. il casier e funcziunaris.
5. Suonda la tratga dils pervesiders dils bucs per 1953/54. La sort croda per Sedrun sin: Jacomet Vigeli, Berther-Schmid Giusep, Gonda: Schmid Benedigt, Bugnei: Monn-Decurtins Vigeli.
6. Finalmein vegn fatg appel ei semuossa ina presensa de 25 comembers.
7. Varia. Sut varia vegn ei discusionau schebein ins vulesi buca metter en marca alas cauras enstagl beschar els corns. Suenter liunga discusiun vegn ei proponiu de schar sura quei alla suprastonza il co far.
Cun quei ei stau finiu e sign. Presiden siara la radunonza engraziont per la premura e pazienzia.
Sedrun 15.3.53
Igl actuar Monn Vigeli
    
1954 Protocol della radunonza generala ils 23.3.54
Sut il sura datum ein ils commembers de nossa sozietad stai radunai e tractau il suandont.
1. Arva sign. Presiden la radunonza beneventond ils presents e giavischont in emperneivel decuors de quella.
2. Prelecziun dil protocol anteriur, il qual vegn approbaus unanimamein.
3. rendaziun de quen entras il casier Cavegn Ambrosi
Expensas 1802.40
Intradas 1485.88
Manco della casa 316.52
La Facultat munta sin 946.26

Ils quens vegnan suenter in detagliau raport dils revisurs approbai unanimamein e cun prender tutta responsabladad visavi tuts funcziunaris.
4. Metta sign. Presiden avon schebein ins vulesi buca pagar ensitgei ord cassa per ils anseuls ch'ins tili. Sin proposiziun della suprastonza vegn concludiu de dar 2 Fr. per ansiel.
5. Finalmein vegn tratg ora la sort dils pervesiders de bucs per 1954/55. sedrun: Monn-Flepp Giusep, Monn-Wenzin Ant. Gonda: Soliva Lucas e Hendry Bruno.
6. Suonda la rendaziun dils uffezis ed elecziuns: presiden Hendry Fidel, actuar e meina cudisch Monn Vigeli, cassier Cavegn Ambrosi, experts Berther-Huonder Tumaisch e Monn Lucas, revisurs de quen Soliva  Ignazi e Berther-Soliva Tumaisch.
7. Vegn fatg appel ei resulta ina presenza de 52 comembers.
Cun quei ein las tractandas stadas lugadas e sgr. presiden sa serrar la radunonza
Sedrun 24.3.54
Igl actuar Monn Vigeli
    
1955 Protocol della radunonza generala d'ils 2. mars 1955
Sut il sura datum ein ils commembers della soz. de tratga de cauras stai radunai e tractau il suandont.
1. Prelecziun ed aprobaziun dil protocol anteriur.
2. Prelegia sgr. cassier il quen digl onn passau cun ina
 
Expensa 1144.30
Intrada 1018.05
defizit en casa 126.25
Facultat 23.3.54 946.26
Facultat 2.3.55 1131.11
Carschament d'ella Facultat 184.85

3. Ils quens vegnan suenter in clar rapport dils revisurs aprobai unanimamein cun surprender tutta responsabladad visavi il cassier e tuts funcziunaris.
4. Dat sigr. Presiden in clar rapport pervia della controla de latg. Quei dat debia discusiun, ins ha empau tema che nossas cauras posien buca dar il quantum latg ficzau. Mo sil suenter vegn fatg la propposiziun de schar sanunziar tgi che vegli, ei stopi denton vegnir silmeins 6 tocs per survegnir il supsidi.
5. Finalmein vegn tratg la sort per ils pervesiders dils bucs 1955/56. Sedrun: Monn Ignazi, Cavegn Stiafen, Beer Clau Antoni. Gonda: Soliva Vigeli. Bugnei in.
6. Varia. Sut varia vegn ei discusionau pervia d'ina segirada de cauras, la qualla fus segir de beneventar. Entgins vischins manegian che quella fusi de far per cauras e nuorsas, mo quei ei ualti dificultus, pertgei ch'ins sto saver mirar il tier curdau. Suenter liunga discusiun vegn surschau quella causa alla suprastonza.
7. Finalmein vegn fatg appel ei semuosa ina presenza de 41 commembers.
Cun quei ei stau finiu e sign. presiden siara la radunonza engraziont per la pazienzia.
Sedrun 5.3.55
gl'actuar Monn Vigeli
    
1956 Protocol della radunonza generala ils 28.2.56
Sut il sura datum ein ils vischins de Sedrun-Gonda della soz. de tratga de cauras stai redunei e tractau il suandont.
1. Vegn prelegiu il protocol anteriur il qual vegn approbaus unanimamein.
2. Rapport dil persiden
3. Rendaziun de quen entras sign casier Cavegn Ambrosi:
Intradas 1297.00
Expensas 1268.60
Cassa surpli 28.40
Facultad 29.3.55 1131.11
Facultad 28.2.56 1273.00
Carschenta 141.90

4. Sil suenter daten ils revisurs in detagliau raport sur dil quen. Suenter cuorta discusiun vegn fatg la tscharna d'aprobaziun dils quens ils quals vegnan aprobai unanimamein cun surprender tuta responsabladad visai casier e tuts funcziunaris.
5. Sign presiden metta avon schebein ins vegli termetter in sin la radunonza de delagai a Briasaco. Suenter cuorta discusiun vegn concludiu de termetter in sin la radunonza cun surprender las spesas de quella.
6. Vegn tratg la sort per ils teniders dils salvanori botschs per Sedrun: Monn-Berther Fidel e Monn Gion Ant. meist. Per Gonda: Berther-Soliva Tumasich e Beer Ignazi.
7. Sign giavisch della suprastonza vegn discusionau pervia della paga dil meinacudisch. Suenter pli liunga discusiun vegn concludiu de dar 40 cts. per caura e ere ils anseuls marchei 1 fr.
8. Elecziuns presiden Fidel Hendry, act. Vigeli Monn, casier Berther-Soliva Tuamisch, revisurs de quen Hendry Toni e Decurtins Adelbert, experts Monn Lucas e Schmid Giusep, suplean Gamboni G. Giusep.
9. Varia. Sut varia vegn tschentau la proposiziun schebein ins lesi buca pagar ensitgei per las cauras che vegnan menadas sin la punctaziun. Suenter liunga discusiun vegn concludiu de pagar per in onn la tacza de 50 cts il toc che vegn menaus si. Cun schar stavlar sco igl usitau.
10. Vegn fatg apel ei semuosa ina persensa de 43 comembers.
Silsuenter siara sign presiden la radunonza giavischont a tuts in emperneivel retuorn a casa.
Sedrun 1.3.56
Igl actuar Vigeli Monn
     
1957 Protocol della radunonza generala ils 28.3.57
Sut il sura datum ein ils comembers de nossa sozietad stai radunai e tractau il suandont.
1. Sign presiden arva la radunonza beneventont ils resents e giavischond in emperneivel decuors de quella.
2. Prelecziun e aprobaziun dil protocol anteriur.
3. Rendaziun de quen entras il cassier Berther-Soliva Tumaisch
Intradas 1270.31
Expensas 990.10
en cassa 280.21
Facultad 15.3.57 1131.21
Facultad 28.2.56 1273.01
fatg anavos 141.80

4. Raport dils revisurs de quen. Ils revisurs daten in clar e detagliau raport sur il quen, il qual ei vegnius menaus bein ed en uorden dal sign casier. Suenter pintga discusiun vegn ei pasau tier la stcharna d'aprobaziun dil quen il qual vegn aprobaus unanimameiin cun surprender tutta decharge visai casier e tuts funcziunaris.
5. Meta signr. president avon schebein ins vegli cumprar bucs grons. Ei dat ina brava discusiun sur de quei, mo ei vegn tutina buca priu ina dezisiun schebein ins vegli cumprar grons. Suenter liunga discusiun vegn ei concludiu de schar pagar il privat per buca bucs gronds 60 fr e per ils pigns 40 fr il toc ala sozietat.
6. Vegn tratg la sort per ils teniders dils salvanoris botschs, Sedrun Beer Vigeli, Soliva Vinzens, Cavegn Anbrosi, Gonda Soliva Lucas, Bugnei Deragisch Giusep.
7. Varia. Sut varia vegn ei discusionau pervia dil curnar. Ei duesi vegnir curnau schia che tuts ils proprietaris de cauras audien.
8. Vegn ei fatg apel ei semuosa ina presenza de 40 comembers.
Silsuenter siara sign. presiden la radunonza e giavischa a tuts in emperneivel retuorn a casa.
Sedrun 1.4.57
gl'actuar Monn Vigeli
      
1958 Protocol della radunonza generala ils 30.3.58
A l'ura ficsada sa sigr. pres. arver la radunonza beneventond ina pulita roscha commembers.
1. Vegn prelegiu il protocol anteriur, il qual vegn aprobaus unanimamein.
2. Suonda la rendaziun de quen. il quen per 1957/58 muosa ina
Intradas 1267.71
Expensas 1105.81
Rest en cassa 161.90
Facultad 15.3.58 1112.90
Facultad 15.3.57 1131.21
Fatg anavos 18.31

3. Sign. revisur Toni Hendry raporta sur la revisiun d'il quen il qual segi menaus endretg. Senza ulteriuras remarcas vegn quel aprobaus unanimamein e concediu decharge a tuts funcziunaris.
4. Vegn tratg la sort per ils teniders dils salvanoris botschs. Sedrun Jacomet Placi, Monn Baseli
   
   

'