Uniun de traffic e cura Sedrun/Tujetsch
Fundada 1927

  

1

 Emprem cudisch da protocols dalla Uniun da cura e trafic Tujetsch
06-11-1927 - 11.10.1934		  
      
  Protocol
della radunonza de constituziun per ina uniun de trafic e cura a Tujetsch dils 6 de november 1927 el hotel Alpsu.		 Protocol da fundaziun
  Cun circulara dils 4 de november 1927 envidan ils signurs hoteliers frars Berther e Hans Giachen Decurtins plirs vischins de Tujetsch tier ina radunonza fixada ils 6 de november allas 8 uras della sera el hotel Alpsu. Intent de talla radunonza ei: empruar de scaffir ina uniun de trafic e cura a Tujetsch.  
1. Signur hotelier Hans Giachen Decurtins salida e beneventa ina ualti numerusa raspada, explicond e dilucidond igl intent de talla convocaziun.  
2. Silsuenter pass'ins tiela elecziun d'in president dil di e d'in actuar. Sco president vegn proponius ed elegius signur Hans Giachen Decurtins; sco actuar il cheu alla fin suttascret. Actuar: Monn Gion Felici
3. Il president presenta ina skizza de statutas concepidas per ina sura allegada uniun. Sin general giavisch e per megliera orientaziun en caussa vegnan quellas prelegidas.  
4. Essend quei daventau, arva il sign. president la discussiun giudlunder. El senn da promover e sustener la creaziun d'ina uniun de trafic plaidan ils sequents signurs: Hans Giachen Decurtins, scolast Tumaisch Venzin, Soliva Battesta, Brugger Leci Antoni, Berther Gion Andriu, Soliva Duri Vigeli, Monn Gion Felici e scolast secundar Mudest Nay.
Signur president Vigeli Berther seposta empau skeptics avon la damonda, schebein la fundaziun d'ina uniun de trafic seigi cunvegnenta e necessaria en nossa vischnaunca.		  
5. Per esser segirs sin tgei vart il suffel detschi, lai il signur president votar giu ils presents, schebein ins vomi en principi d'accord de crear ina uniun de trafic ni buc. Unanimamein conclud'ins de sefar vidlunder.  
6. Tschentond il signur president la damonda, schebein ins vegli oz repassar las statutas e lu approbar quellas, ni sch'ins vegli refierer quella caussa per mauns d'ina ulteriura radunonza, s'exprim'ins adaquella de far giud il fatg quei oz.  
7. Repassond e discussionond artechel per artechel conclud'ins las sequentas midadas:  
  a. La taxa annuala per commember vegn fixada sin fr. 3.-.
b. Ellas statutas duei vegnir accentuau, che adual adual seigien ils interess dils commembers dell'uniun de risguardar.
c. Per tals e quals che han in pli grond interess direct ni indirect dall'industria d'jasters, vegn ei fixau ina extra contribuziun de fr. 1.- - 20.-.
d. Proprietaris e fitaders d'ustrias e pensiuns e tals che datan vi letgs ad jasters en casas privatas, pagan ina taxa de fr. 1.- per letg; ils hoteliers ina taxa de fr. 2.- per letg.
e. Tuttas taxas e contribuziuns ein de pagar mintgamai alla fin d'october.
f. La radunonza generala duei vegnir tenida da miez november.		  
8. Sin quei lai il signur president circular ina gliesta, supplicond che tuts quels che seigien sedicidi de daventar commembers dueigien suttascriver quella. Il resultad ei staus cuntenteivels, reunend gia all'emprema botscha 29 commembers.  
9. Ei resta aunc d'elegier la suprastonza della uniun.
Sco president vegn proponius ed elegius sign. hotelier Hans Giachen Decurtins; sco vicepresident ed actuar sign. forester Baseli Huonder; sco cassier sign. hotelier Christian Berther. Sco assessurs laian elegier: sign. Gion Battesta Soliva e  sign. Leci Antoni Brugger. Sco revisurs de quen: sign. Tumaisch Cavegn, seller e sign. scolast Tumaisch Venzin.		 Emprema suprastonza
     
  Engraziond per la gronda attenziun  ed igl interess demussai en caussa ed exprimend satisfacziun e cuntentientscha giud il nunspitgau favoreivel decuors de quella, siara il sign. president la radunonza.
Igl actuar
Monn Gion Felici		  
       

Statutas dell'uniun de trafic e cura Tujetsch

 Statutas

Sut il num: Uniun de trafic e de cura, ei seconstituida oz, cun domicil a Sedrun in'uniun el senn de Art. 60 dil C.C.S.
Quella ha gl'intent de promover trafic e commers ed il scopo d'embelir ton sco pusseivel ils vitgs e la contrada de nossa vischnaunca sco era de promover en emprema lingia ton sco pusseivel ils interess dils commembers entras retrer da quels adual preci lur products.

  
  Maniera d'arivar tier quei intent  
1. L'uniun sesprova de far enconuschenta la biala Val Tujetsch, tras communablas communicaziuns (reclama colectiva)  
2. de far valer ils interess locals de trafic e commers, segi della hotelaria, industria dil mistregn ne dil puresser  
3. d'embelir vitgs ed ucaluns e contuorn cun promover ton sco pusseivel tier la populaziun il senn per uorden per la schubradad e per il bi  
4. d'influenzar sin las auctoritads compotentas de metter e mantener en bien uorden las vias communalas e vias d'uaul existentas, de tener schubras las plazzas publicas, fontaunas etc. L'uniun seza procurescha sin siu cuost per necessari manteniment de sendas e trutgs sin adatadas spassegiadas.  
5. Ella expona en adequats loghens commodeivels bauns e ha quitau che quels vegnien bein deponi sur unviern  
6. ella promova l'extensiun dell'existenta illuminaziun electrica sin las vias.  
  Composiziun dell'uniun ed obligaziuns dils commembers  
1. Scadin e scadina daventa commember dell'uniun, che seoblighescha de pagar annualmein ina contribuziun de frs. 3.00.  
2. Affitaders de commbras e habitaziuns ad jasters, commersants, pasternes, carotschiers, guids de muntogna, scolats de skis, mineralogs, insumma tuts quels che retillan direct ne indirect avantatg dall'industria de jasters pagan ultra della taxa personala aunc ina extra contribuziun de frs. 1.- entochen 20.- tenor convenziun e decisiun della suprastonza.  
3. Proprietaris e fitaders d'ustrias e pensiuns e tals che dattan vi ad jasters letgs en casa privatas, pagan ina taxa annuala de fr. 1.- per letg, ils hoteliers ina tala de frs. 2.- per letg.  
4. Tuttas taxas e contribuziuns ein mintgamai de pagar sin la fin d'october.  
  Dretgs dils commembers  
1. Scadin commember ha il dretg de separtizipar cun ina vusch dellas deliberaziuns ed ils conclus della radunonza generala.  
2. Scadin commember sa vegnir elegius ella suprastonza dell'uniun.  
3. Scadin commember sa surdar ad in auter commember en scret la plenipotenza de sia pepresentaziun.  
4. A scadin commember stat ei liber de passar ord l'uniun, mo sto il commember che vul bandunar tala, communicar en scret alla suprastonza dell'uniun e sa quei daventar per sin la fin digl onn e suenter ch'el ha quei onn adempliu tut sias obligaziuns visavi l'uniun e la cassa de quella.  
5. Ella radunonza generala ha scadin commember che contribuescha frs 3-20 ina vusch. Tgi che paga pli che fr 20 mintgamai ina vuchs.  
6. Igl onn de quen per l'uniun fineshca la fin de october.  
  Organisaziun  
  Ils organs dell'uniun ein ils sequents:  
1. La radunonza generala  
2. La suprastonza  
3. Ils revisurs  
  La radunonza generala  
  La radunonza generala ordinaria vegn convocada mintg'onn sin l'entschatta de Dezember. Radunonzas generalas extraordinarias vegnan clamadas en dalla suprastonza e sin giavisch en scret de 10 commembers.
La radunonza generala tractescha sequentas fatschentas:		  
1. Ella elegia la suprastonza ed ils revisurs de quen cun lur supleants per il decuors de dus onns e quei tras elecziun aviarta. En preschientscha de silmeins 10 commembers po ella tractar valeivlamein.  
2. Ella pren giu dalla suprastonza il raport annual, il budget per igl onn proxim ed il renda quen digl onn vargau.  
3. Ella pren conclus dallas proposiziuns tschentadas davart della suprastonza ne de singuls commembers. tier tutttas deliberaziuns vala il pli absolut.  
4. Las statutas san vegnir revedidas mo dad ina maioritad de duas tiarzas dellas vuschs presentas.  
5. La redunonza generala vegn convocada en scret tras la posta a scadin commember.  
  La suprastonza  
a. La suprastonza consista ord ils sequents commembers:
1. Il president
2. il vicepresident ed actuar
3. il cassier
4. dus assessurs
5. dus revisurs		  
b. La suprastonza representa l'uniun visavi igl exteriur meina atras, ils conclus pri dalla redunonza generala prepara la glesta de tractandas per las sesiuns de quella, meina exact protocol sur las fatschentas, proposiziuns, discussiuns e conclus pri ella radunonza generala ed ellas radunonzas della suprastonza.
Ella meina il quen, tschenta si il budget, reparta prospects, ha quitau per in'adaquata reclama, ect.		  
e. La suprastonza seradunescha tenor basegns sin invitaziun de siu president ne sin giavisch de treis commembers della suprastonza.  
d. Las radunonzas e fatschentas dell'uniun e suprastonza meina il president en sia absenza il vicepresident e fa communicaziun dil curiu e passau alla suprastonza entira.  
  Applicaziun dellas entradas  
  L'administraziun e applicaziun de tuttas entradas ei caussa della suprastonza. La suprastonza dispona ded in importo tochen frs. 100 per expensas extraordinarias, che van sur ils regulars cuosts annuals.  
  Engaschament  
  L'uniun sengascha e seoblighescha ina cun sia propria facultad. Il commember singul sa en negins graus vegnir obligaus per l'uniun.  
  Disoluziun dell'uniun e la facultad de quella  
  Per concluder la dissoluziun dell'uniun drova ei treis quartas dellas vuschs d'in'ordinaria radunonza generala.
Tier ina eventuala dissoluziun astga in activum dell'uniun sut neginas circumstanzias vegnir repartius sin ses commembers, in tal vegn en in semigliont cass administraus dalla suprastonza communala entochen che quel sa puspei vegnir surdaus ad ina nova sozietad de medem caracter ed intent paregl.		  
  Determinaziuns conclusivas  
  Las presentas statutas ein vegnidas acceptadas dalla radunonza generala dils 6 de november 1927 e passa en vigur immediat.  
     
  Sedrun, ils 6 de November 1927  
  Il president:
Hans Giachen Decurtins		 Il vicepresident:
Baseli Huonder		  
     
  1. Protocol
per las tractandas della suprastonza dell'uniun de trafic e cura Tujetsch, ils 13.XI.27 hotel Alpsu		 1. protocol
  Sut il sura datum ha sgr. president Hans Giachen Decurtins per l'emprema gada redunau la suprastonza dell'uniun, tier la qualla gl'ei vegniu tractau e priu conclus sur las sequentas damondas.  
1. Vegn concludiu de procurar per cartas de commembers e cartas d'incassament sco era pil nezesari material de scriver per fatgs dell'uniun de trafic e cura.  
2. Propona sgr. president de schar far dus maletgs de reclama per la val Tujetsch en general. Separschuadend la suprastonza unanimamein ch'il sura numnai maletgs corispundan agl intent dell'uniun, vegn sgr. president incaricaus de procurar per tals e schar reproducir els en ina gasetta de reclama. Maletgs da reclama
3. Anfla la suprastonza per nezesari de taner bein en uorden la via tier la gara, era il temps d'unviern. Per quei intent vegn concludiu de schar far ina schliusa per arver la via (Bahnschlette).
Sgr. Gion Batesta Soliva vegn comissionaus de procurar per quei isegl.
Ei vegn lu era discussionau la damonda d'illuminaziun de quella via, mo vegn adinterim priu negin conclus per aung semetter en contractivas  cun ils vischins de Gonda, ch'ein era coninteressents.		 Via alla staziun
4. Liug e local per las radunonzas generalas vegnen fixai dalla suprastonza ed il liug e local per las sesiuns della suprastonza fixai da sgr. president.  
  Finidas las tractandas, siara sgr. president la sesiun
Baseli Huonder, actuar		  
      
  2. Protocol
per la tractanda della suprastonza dell'uniun el mhotel dell'Alpsu, ils 27.XI.27		  
  Tier quella sesiun metta sgr. president puspei avon la damonda d'illuminaziun della via tier la staziun de viafier.
Sgr. president Gion Felici Monn sco representant della sozietad dell'ovra electrica declara ch'els seigi promts de dar all'uniun de trafic e cura ina glisch gratis sco taxa annuala della numnada sozietad.
Sgr. Gion Battesta Soliva commember de sp.d.u. dat lura raport dil conclus dils vischins de Gonda. Quels seporschan de pagar annualmein in fr. per fiug, per ina perioda de 10 onns cun la condiziun che la via astgi buca duvrada sco ina de sgursalar.
L'installaziun de quellas duas glischs ei caussa dell'uniun, medemamein il manteniment.
Cun plischer ha la suprastonza priu encunaschientscha de quels raports e concluda de schar installas quellas duas glischs, ina sisum Gonda e lautra giudem la via sper casa de scola.		  
  gl'actuar
Baseli Huonder		  
      
  3. Protocol
per las tractandas della suprastonza dell'uniun d. T. e C. S. tier la sesiun dils 2. december 1927 e hotel della Cruna.		  
1. Vegn fatg ina liesta de commembers cun quella caschun anflins era per necesari de manar in cudisch de commembers e quei duegi esser caussa dil cassier.  
2. Lagia sgr. president avon ina bref della direcziun della vaifier della Furka enla quallla quella attestescha sia simpatia per noss'uniun e segirescha de sustener qeulla finanzialmein cun reclama.  
3. Vegn concludiu d'empruar de metter neu ina via de sgursalar, sche quei ei ina interpresa buca memia zun custeivla e las finanzas de nossa cassa lubeschan.  
  Baseli Huonder, actuar  
      
  4. Protocol
per la radunonza della suprastonza dell'uniun de trafic e cura Tujetsch, ils 8. de schaner 1928 el hotel "Alpsura" Sedrun		  
  La numnada sesiun della suprastonza dell'uniun de t. e c. ei stada convocada per prender posiziun ariguard gl'urari della vaifier della Furka resp. quel da Sedrun - Mustér.  
1. Sgr. president d'uniun de trafic e cura Hans Giachen Decurtins beneventescha sgr. president communal Vigeli Berther sco representant della ludeivla vischnaunca e metta la damonda en discussiun.
Suenter haver priu invista digl urari ein ins vegni tier la perschuasiun che ils trens fixai en quel, curseschien buca las uras giavischadas e cumadeivlas, ton per ils indigents sco per ils jasters.
Perquei concludan ins de termetter tier allas competentas auctoritats de viafier ina petiziun cun ils giavischs per las midadas digl emprem urari.		  
  Baseli Huonder, actuar  
      
  5. Protocol
per las tractandas della suprastonza dell' u. T. e C. S. ils 20 de mars 28 el hotel "Alpsura".		  
1. Prelecziun ed aprobaziun dils protocols anteriurs, cun la remarca che l'instalaziun dellas glischs sper la via de Gonda crodi, ina sin quost dell'uniun de T. e. C. e lautra della sozietad electrica.  
2. Vegn concludiu de schar far 8 bauns el liber en loghens adatai per repussar ne cun bialla survista.
Per far quels bauns cuzeivels vegn concludiu de far ils postaments de crap ed il bratsch per setz e pusal de fier.
Per quei intent vegn decretau 200.- frs. e sgr. cassier Christian Berther hotel Cruna  vegn commissionaus de realisar quei conclus.		  
3. Vegn sgr. president Hans Giachen Decurtins cun la damonda schei fussi buca comensurau de schar far ina carta locala per excursiuns pil Revier de Tujetsch ed empau contuorn.
Essent che tallas cartas vegnan  adina tscharcadas da curants e passants concluda la suprastonza de procurar per quellas  cartas e fixar in preci aschi che la uniun vegni ord donn e sche pusseivel far in gudogn.		  
  Baseli Huonder, actuar  
      
  6. Protocol
per las tractandas della suprastonza dell'uniun de trafic e cura Tujetsch tier la sessiun dils 18 de sept. 1928 el "hotel Alpsu".		  
  Sco tractanda prinzipala per quella sessiun ei l'empustaziun definitiv per las cartas locablas "Tujetsch e empau contuorn".
Suenter esser sinformaus tier differents instituts grafics ariguard perci ect. concluda la suprastonza de surdar quella lavur agl institut de Manatschal Ebner a Cuera.
Empustau vegn 3000 exemplars, 2000 per relaziuns d'unviern e 1000 per relaziuns trein stad ect.
Las condiziuns de pagament ein las suandontas: Vegn pagau en rattas de 400 - 500.- Frs. L'emprema croda circa sin la fin de mars 1929 e las autras mintgamai suenter mintga sessiun ded jasters entochen tut ei pagau.
Il preci de cumpra ei 65 Ct. il toc e dadas giu vegnen ellas per 1:50 frs igl exemplar.
  Bas. Huonder, actuar  
     
  8. Protocol
per la conferenza della suprastonza dell'uniun de trafic e cura Tujetsch cun sgr. cusseglier guvernativ Giusep Huonder, ils 5 de Dezember 1928 el hotel "Alpsu".

 
  Sut il sura datum ha sgr. cusseglier guv. J. Huonder fatg ina viseta a Sedrun, per conferir cun ils organs della uniun, ariguard gl'urari della viafier della "Furka Alpsu" per 1929 - 30, v.d. prender encunter nos giavischs per eventualas midadas de quel.
Sgr. cuss. guv. arva la sessiun e surdat il plaid a sgr. capostaziun Ackermann, representant della uniun de trafic de Mustér. Quel dat ina clara orientaziun sur dil menaschi della viafier F.O. e fa lura sias beinfundadas ramarcas.
Sgr. president Hans Giachen Decurtins beneventescha sgr. Huonder cheu en nies miez ed exprima lura nos giavischs arisguard gl'urari.
Quels ein ils suandonts. Il tren della damaun ensiviars temps e stad, dueigi vegnir circa allas 7. enstagl per allas 8.53 sco provediu, el fussi allura era pli survius als indigens.
Alura vegn era giavischau ch'ils trens express spetgien a Sedrun silmeins sin giavisch.
Ei vegn aunc menziunau l'impurtonza dil trafic d'unviern della viafier da Mustér - Andermat e giavischau che quei plan vegni manaus atras cul temps.
Suenter haver priu pruamein notizia de quellas ramarcas siara sgr. cusseglier guvernativ Huonder la sessiun.		  
  Baseli Huonder, actuar  
       
  9. Protocol
per las tractandas della suprastonza dell'uniun de trafic e cura Tujetsch tier la sessiun dils 8. de december 28.		  
1. Prelecziun ed aprobaziun dils protocols Nr. 5 e 6.  
2. Vegn tschentau si il budget per il secund onn de fatschenta dell'uniun.  
3. Preparau e mirau atras ils quens e fixau la radunonza generala sin ils 16 de december el hotel della "Kruna"  
  Baseli Huonder, actuar  
     
  10. Protocol
per las tractandas della radunonza generala dell'uniun de trafic e cura Tujetsch, dils 16 XII 1928 el hotel Kruna Sedrun		 Radunonza generala 1928
1. Sgr. president d'uniun Hans Giachen Decurtins arva la sessiun salidont igl ualti cuntenteivel diember de commembers e passa tier las tractandas:  
2. Vegn elegiu 2 dumbravuschs, sco tals vegnen nominai sgr. Leci Deflorin e sgr. Aluis Gisler. Ils dumbravuschs constateschan ina presenza de 25 commembers.  
3. Prelecziun ed aprobaziun dil protocol della radunonza de constituziun dell'uniun.  
4. Dat sgr. president in detagliau rappor digl operar dell'uniun de t. e c. igl onn 1927-28. Quel dat perdetga che l'existenza d'ina uniun da trafic ei d'interess per il svilup industrial en nossa vischnaunca. El meniunescha e lauda la gronda lavur e la buna contabilitad dil cassier sgr. Christian Berther.
sin giavisch dils commembers orientescha sgr. president aung ils radunai ariguard las cartas de cura per il teritori de Tujetsch ed empau contuorn, las qualas quostan all'uniun 0.60 Frs. e vegnen vendidas per 1.50 frs. il toc.		  
5. Rendaziun de quens tras cassier sgr. Christian Berther.
La bilanza ei la suandonta
intradas 866.00 frs
expensas  642.55 frs
Cassa saldo 16.XII.28 222.45 frs
 
6. Per la comissiun de quens dat sgr. scol. Tumaisch Venzin in clar rapport repassond ualti mintga posta dil cudisch de quens e sin proposiziun dils revisurs vegnen ils quens aprobai unanimamein.  
7. Sut varia fa sgr. president Hans Giachen Decurtins la damonda sch'ei fussi forsa d'interess de formar en vischnaunca duas postas per intermediuar la vendita de tiers e products. Havend discussionau la caussa en senn afirmativ vegn ei elegiu sco intermediader sgr. Hans Giachen Decurtins per Sedrun e sgr. Leci Antoni Brugger per Rueras.  
  Finidas las tractandas vegn la radunonza officiala serada.  
  Baseli Huonder, actuar  
       
  11. Protocol
per las tractandas della suprastonza dell'uniun de trafic e cura Tujetsch el hotel Kruna Sedrun, ils 11.V.29		  
1. Vegn concludiu de dumandar la ludeivla suprastonza communala resp. la ludeivla vischnaunca la concessiun per far ina senda dalla muschna de ira giu entochen tier igl ischi grond e leu far in pign parc de reposiziun pils curants.  
2. Concluda la suprastonza de dar en alla lud. regenza cantonala ina petiziun per far arver ton pli gleiti il stradun sur l'"alp Sura".  
3. Anfla la suprastonza per nizeivel de era procurar per cartas geograficas de Tujetsch e format de quellas digl unviern, era per la stad, de far il text per quellas cartas surpren igl enconuschent philoloc Guglielm Gadola da present a Cuera.
Carta da stad
4. Vegn mess en disposiziun 20 frs. per reclama per loghens de cura alla direcziun de viafier federala.  
  Baseli Huonder, actuar  
     
  12. Tractandas
della rad. della suprastonza de t. e c. Tujetsch, ils 26 X 1929 el hotel "Alpsura".		  
1. Vegn concludiu de metter mussavias si Mises grond Cavorgia che duein survir per entruidament per schiturs che vulan far turs si Quolm Cavorgia. Sgr. Christian Berther Kruna vegn incaricaus de menar ora quella lavur.  
2. Surpren l'uniun ils quosts per mentaner la glisch sur il hotel della Alpsura.  
3. Vegn puspei menzionau e concludiu de far ina via de sgursalar.  
  Baseli Huonder, actuar  
     
  13. Protocol
per las tractandas della suprastonza dell'uniun de trafic e cura Sedrun, redunada ils 7 XII 1929 el hotel "Alpsura" Sedrun		  
1. Prelecziun dils 2 protocols anteriurs cun la remarca che l'uniun de trafic surprendi ils quosts dil manteniment della glisch sur il hotel Alpsura, la contribuziun annuala regulara paga sgr. Hans Giachen Decurtins.  
2. Sin damonda  dil vischninadi de Sedrun concluda la suprastonza de dar a quels 50 frs. sco supsidi per il baghiar ora la via dil vischninadi e de far uorden cun ils begls de quel.  
3. Concluda la suprastonza de dar uon v. d. 1930 puspei 30.- frs. al club de schiturs, ils quals han de vegnir aplicai per cumprar premis per la quorsa de pag dils buozs.  
4. Vegn concludiu de pladir in reportader metrologic, il qual dat mintga venderdis en temps dellas esiun d'unviern part a Bern tras telegram las relaziuns dell'aura en nossa vischnaunca. Las spesas che neschen ord lunder surpren l'uniun.  
5. La radunonza generala vegn convocada ils 15 de Dezember 1929 el hotel Alpsura a Sedrun.  
  Baseli Huonder, actuar  
      
  14. Protocol
per las tractandas della radunonza generala dell'uniun de trafic e cura Tujetsch, ils 15. december 1929 el hotel Alpsura a Sedrun		 Radunonza generala 1929
1. Sgr. president dell'uniun Hans Giachen Decurtins arva la sesiun agurond als presents commembers in beinvegni.  
2. Sco emprema tractanda figurescha l'elecziun de 2 dumbravuschs, sco tals vegnan proponi ed elegi sgr. president Gion Andriu Berther e sgr. gerau Duri Vigeli Soliva, quels constateschan ina presenza de 31 commember.  
3. Prelecziun ed aprobaziun dil protocol della davosa radunonza generalla cun la ramarca che las cartas de cura quostien enstagl 60 cts 65 cts il toc preci de cumpra.  
4. Dat sgr. presiden in detagliau raport digl operar dell'uniun igl onn 1928 - 29. Da tut ils conclus pri dalla suprastonza cun caschun ddellas differentas sesiuns de quella sei vegniu menau protocol.  
5. Rendaziun de quens tras sgr. cassier Christian Berther, la bilanza ei la suandonta:
Intradas 1929 1168.00 frs
Expensas 846.30 frs
Surpli d'entradas 321.70 frs
En cassa 1928 222.45 frs
Total en cassa 544.15 frs
Cheu tier in daver passiv cartas 359.70 frs
Total activ ils 15 XII 29 903.85 frs
 
6. Sco revisur de quen dat sgr. scolast Tumaisch Venzin rapport dils quens. El constatesscha ch'ils quens ein vegni manai fetg bein ed endretg. El propona alla radunonza det aprobar ils quens.
Tras tscharna aprobescha la ludeivla radunonza unanimamein ils quens, expriment cun quella al sgr. cassier in grond engraziament e prendent al'entira suprastonza la responsabladat.		  
6. Discussiun generalla:
Tier quella vegn fatg differentas ramarcas e proposiziuns.		  
I. Vegn giavischau de schar installar ian glisch electrica sin la staziun che sclareschi la via della gara sisum. Sgr. president declara che quella glisch segi gia stada si la gliesta de tractandas della suprastonza e la direcziun della viafier Furka Alpsura ha gia dau nplaid de procurar per ina tala, mo ei aung buca vegniu realisau.  
II. Da sgr. scol. Venzin e sgr. gerau Gion Antoni Venzin, Rueras, postuleschan ch'il hotels duessien prender ton sco puseivel il products dils indigens ed era risguardar las fatschentas indigenas ton sco puseivel.  
III. Vegn proponiu de midar il modus de contribuziun per in ni l'auter commember dell'uniun. De far quei vegn schau sura alla suprastonza cun ils revisurs da quen.  
7. Elecziuns della suprastonza: en tala vegnien confirmai:
Hans Giachen Decurtins, president
Baseli Huonder, actuar
Cristian Berther, casseir
Gion Batesta Soliva, assesur
ed enstagl de sgr. Leci Antoni Brugger vegn sgr. Tumaisch Venzin , scolast, elegius sco assesur.
Revisurs de quen vegnien elegi sgr. Tumaisch Cavegn, satler e sgr. gerau Gion Antoni Venzin, Rueras.		 Elecziuns
  Finidas las tractandas, siara sgr. president la radunonza, engraziont als commembers per l'atenziun ed interess demussai all'uniun e speront sin in ulteriur e prospereivel operar de quella.  
  igl actuar
Baseli Huonder		  
      
  Protocol
per las tractandas della suprastonza dell'uniun de trafic e cura Tujetsch tier la sesiun dils 4 d'avrel 1930 el hotel "Alpsura".		  
1. Sgr. president Hans Giachen Decurtins communichescha che la petiziun dell'uniun de trafic Tujetsch tier la direcziun de viafier della Furka per vuler far sefarmar era ils trens express a Sedrun, segien buca vegnida risguardada.  
2. Vegn concludiu de puspei schar far 2 bauns de campagna.  
3. La via d'uaul suenter la lingia de viafier a Bugnei duegi vegnir rugalada ch'ella sapi vegnir gudida sco via d'excursiuns per ils jasters.  
  actuar Baseli Huonder  
      
  Protocol
per las tractandas della suprastonza dell'uniun de trafic e cura Tujetsch radunada ils 25. X. 1930 el hotel Alpsu.		  
1. L'emprema tractanda per quella sesiun ei, prender conclus con fixar ed augmentar la taxa anualla dils hoteliers per la cassa dell'uniun.
Suenter haver discussionau la caussa sedeclaren ils dus hoteliers, sgr. pres d. uniun Hans Giachen Decurtins e sgr. cassier Christian Berther de pagar in franc depli per letg che entochen uss, pia 3 frs. per letg enstagl 2.- frs.		  
2. Sgr. Leci Antoni Brugger, Rueras, commember dell'uniun, damonda quella per ina indemnisaziun anualla per ina glisch avon sia ustria.
La suprastonza concluda ded indemnisar ils quosts d'instalaziun cun in subsidi de 10 - 20 frs. tenor ils quosts.
Cun quella caschun expriman ils commembers della suprastonza dell'uniun unanimamein l'idea che la sozietad duei en principi subsidiar glisch, aber mo tallas che surveschen al trafic general.		  
3. Ils bauns de campagna restan fermai vid ils posts era sur unviern, priu ora quel ch'ei staus stazionaus entochen ussa a Sumsasi. Lez ei de rabitschar a Sedrun e plazar el en in auter liug.  
4. Vegn concludiu ded aung inagada petizionar tier las auctoritads de viafier per far sefarmar ils trens express della stad a Sedrun.  
  Baseli Huonder, actuar  
      
  Protocol
per las tractandas della suprastonza dell'uniun de trafic e cura Tujetsch dils 7 de december 1930 Hotel Alpsu.		  
1. Tier quella sesiun ha la suprastonza il plischer de salidar per l'emprema gada sgr. Gustav Walty, directur de cura. Gustav Walty
2. Prelecziun ed aprobaziun dil protocol anteriur.  
3. Tras ina bref dat sgr. directur Benner a Cuera part che la direcziun della viafier "Retica" e "Alpsu" segi promta de retener in tren express a Sedrun.  
4. Sgr. Gustav Walty dat alla suprastonza ina detagliada orientaziun sur la carta de cura per la stad dil teritori de Tujetsch. El seporscha de segnar en quella exactamein tuttas vias per spasegiadas e excursiuns.
Sgr. Dr. Guglielm Gadola ei seporschius de concepir in text per quella carta che survescha sco excellent muosavia.		  
6. Sgr. cassier Christian Berther dat sclariment dils quens per 1929-30.  
7. La radunonza generalla vegn fixada sin ils 14 de december 1930.  
  Baseli Huonder, actuar  
        
  Protocol
per las tractandas della radunonza generala dell'uniun de trafic e cura Tujetsch el Hotel Kruna Sedrun ils 14 de december 1930.		 Radunonza generala 1930
  Beneventond in cuntenteivel diember de commembers, arva sgr. president Hans Giachen Decurtins la radunonza e passa imediat tier las tractandas.  
1. Prelecziun ed aprobaziun dil protocol della radunonza generalla de 1929.  
2. Elecziun de 2 dumbravuschs, numnadamein ils sgr. Giachen Giusep Gamboni e Paul Schmed. Present ein 30 commembers.  
3. Sgr. president dell'uniun dat in general raport digl operar dell'uniun pigl onn 1929-30. Da tuts conclus pri dalla suprastonza tier sias diferentas sesiuns ei vegniu manau protocol.  
4. Randaziun de quen per 1929-30. La bilanza ei la suandonta:
Intradas 1233.50 frs.
Expensas 1192.20 frs.
Surpli intradas 41.30 frs.
Kassa ils 15 XII 29 544.15 frs.
Total en cassa 1930 585.45 frs.
 
5. Per ils revisurs de quen dat sgr. gerau Gion Antoni Wenzin in pli detagliau raport. El constatescha ch'il quens seigien manai endretg e che tuttas expensas sapien vegnir aprobadas da radunonza e propona de aprobar ils quens manai da sgr. Christian Berther cun grond engraziament e de prender all'entira suprastonza la responsabladat.  
6. Varia: Bia discusiun ha il criec de neiv caschunau. Quei isegl ei dat ina part vegnius ludaus e da lautra plitost blasmaus. Sgr. Gustav Walty sco um ded exprienza en quellas caussas dat lura giu in pareri co il criec dei esser e co e cura vegnir duvraus. La radunonza concluda alura de procurar per in tal. Quella damonda ha anflau ina favoreivla schligiaziun essend ch'il cantun surpren de schar far il creic sin siu quen cun la condiziun che la lud. vischnaunca furneschi las aissas sco ei era daventau.  
7. Finidas las tractandas siara sgr. president la sesiun recumandont ils commembers per ulteriur operar cun quell'uniun.  
  Igl actuar Baseli Huonder  
      
  Protocol
per las tractandas della suprastonza dell'uniun de trafic e cura Sedrun tier sia sesiun dils 28 de Mars 1931 el Hotel Alpsu Sedrun.		  
1. Sgr. president Hans Giachen Decurtins presenta alla suprastonza la carta de cura per la stad. Sin insinuaziun della stamparia Manatschal Ebner e Cie Cuera che ha procurau all'uniun per quella carta, concluda la suprastonza de perfeczionar quella tras dar ina colur pli clara e rezenta. Quella megliuraziun quosta per 2000 cartas 155.- frs. Il preci de vendita per la carta vegn fixaus sin 2.- frs. il toc.
Carta d'unviern
2. La suprastonza concluda de schar far bauns novs sin plaz Cadruvi encunter la casa caplania, il material de lenn furnescha la lud. vischnaunca.  
  Baseli Huonder, actuar  
     
  Protocol
per las tractandas della suprastonza dell'uniun de trafic e cura Tujetsch tier la sesiun dils 2 de Matg 1931 el hotel Alpsu.		  
1. Concluda la suprastonza d'en conexiun cun l'uniun de trafic de Mustér e la vischnunca de Medel dar en al lud. cussegl pign dil cantun Grischun ina petiziun che ha igl intent de dar liber al trafic ded automobils de sozietad per las treis sura numnadas vischnauncas.  
2. Vegn concludiu de bonificar ils 2 hoteliers, sgr. Hans Giachen Decurtins e sgr. Christian Berther, per spesa de reclama alla zentralla de prospects cun 20.- frs. per in.  
3. Al vischinadi de Sedrun vegn dau in subsidi de 50.- frs. per manteniment dellas vias e fontaunas el vischinadi.  
  igl actuar Baseli Huonder  
      
  Protocol
per las tractandas della suprastonza dell'uniun de trafic e cura Tujetsch, ils 24 de november 1931 el hotel Alpsu a Sedrun.		  
  Suenter ina pli liunga pausa radunescha sgr. president ils commembers della suprastonza cun aung trer tier ils sgr. Gustav Walty e Lucas Berther Kruna per prender conclus de las suandontas tractandas.  
1. Il plaz de reposiziun eregius sper igl ischi a Mira Dulezi vegn exzeptaus dil comite senza oposiziun, essent quei stau concludiu de far en ina radunonza dils 11 de Matg 1929.  
2. Legia sgr. president avon il regulativ cantonal de scolas per skiturs pil cantun Grischun puplicaus el fegl official Nr. 46.  
3. Sgr. president comunichescha che la damonda dils hoteliers per amplificar la reit de telefon per Sedrun segi dalla direcziun de quel vegnida corespondida.  
4. Muort il schliet uorden resp. schliet manteniment della via de Gonda che meina tier la staziun, concluda öa suprastonza ded esser gideivels alla lud. vischnaunca de mantener en bien stan quella via temps de stad ed unviern.  
5. Sgr. president metta en discussiun la damonda ariguard la pasculaziun dils s.v. pors de Sedrun eg uaul Surrhein. Diferentas ga han ils curants dils Hotels a Sedrun reclamau pervia de quella malemperneivla mulesta tras quels tiers sin quels bials plazs sper il lag egl uaul Surrhein. Ei vegn dalla suprastonza concludiu de prender las nezesarias masiras che la pasculaziun de quels tiers vegni sabstenida.  
6. La suprastonza concluda che la taxa de cura dils Hotels hai de curdar dacheu denvi entiramein en la cassa dell'uniun. Quels daners vegnen en disposiziun della suprastonza dell'uniun, mo dueien vegn aplicai ca. 70% per reclama e ca 30% per megliuraziun en vischnaunca.  
  Baseli Huonder, actuar  
        
  Protocol
per las tractandas della suprastonza dell'uniun de trafic e cura Tujetsch, ils 13 de december 1931 el Hotel Alpsu.		  
1. Prelecziun ed aprobaziun dils protocols dellas sesiuns della suprastonza igl onn 1931, cun la remarca de aung menzionar el protocol la projecziun de film de sgr. Gustav Walty cun caschun della radunonza generalla dils 14. december 1930.  
2. Sgr. cassier Christian Berther "Sport Hotel Krone" dat alla suprastonza raport dils quens per 1930-31,  
3. La radunonza generalla vegn fixada sin la gevia ils 17 de december el hotel Alpsu a Sedrun.  
4. Ei vegn concludiu ded en conecziun cun il club de skiturs stegiar mo las turas ded ira cun skis, aber mo en loghens nua che l'orientaziun ei dificultusa, ils quosts surpren l'uniun la mesadat.  
5. Per tener aviert il Bureau de telefon entochen las 9 uras della sera, ston ils coninteresents pagar igl emploiau in ura per sera cun 1.- fr. L'uniun paga 1/3 de quels quosts.  
7. Tier varia vegn sexprimiu l'idea d'en principi sustaner ils commembers dell'uniun, segi entras lavur surdada dell'uniun de trafic e cura ne entras prender en products.  
  Igl actuar Baseli Huonder  
      
  Protocol
per las tractandas della radunonza generala ordinaria dell'uniun de trafic e cura Tujetsch, ils 14 de december 1931 el hotel Alpsura a Sedrun.		 Radunonza generala 1931
  Beneventond in ualti grond diember de commembers arva sgr. president Hans Giachen Decurtins la radunonza. Al'entschatta prelegia el la liesta de tractandas per la radunonza generalla las quallas ein las suandontas:  
1. Prelecziun ed aprobaziun dil protocol della radunonza generalla de 1930, ils 14 de december  
2. Elecziun de 2 dumbravuschs, ils sgr. Lucas Cavegn, postenent e sgr Vinzens Soliva. Present ein 30 commembers.  
3. Sgr. president dat in liung raport digl operar dell'uniun dapi l'entschatta de quella entochen sin il di ded oz. El sa constatar che l'uniun de trafic e cura Tujetsch fundaad tras iniziativa digl actual sgr. president de quella sgr. Hans Giachen Decurtins, hagi secomprovau cuntenteivlamein.  
4. Sgr. cassier Christian Berther dad sclariment dils quens pro 1931. La bilanza ei la suandonta:
Intradas 1718.00 frs.
Expensas 2343.20 frs.
Surpli expensas 625.20 frs.
 
5. Sgr. gerau Gion Antoni Venzin, Rueras, sco sulet revisur present dat raport dils quens, ils quals el constatescha che seigien vegni manai exact ed endretg dal cassier sgr. Christian Berther. El racamonda alla radunonza ded aprobar quels tras tscharna, exprimend cheutras in grond engraziament al cassier e prender la responsabladad all'entira suprastonza.  
6. Elecziuns dil comite:
Suenter detscharta apdicaziun dil sgr. president Hans Giachen Decurtins e dil cassier sgr. Christian Berther vegn elegiu el comite ils suandonts:
president sgr. scolast Tumaisch Venzin
actuar Baseli Huonder
assessurs ils sgr. Hans Decurtins e Christian Berther
revisurs sgr. gerau Gion Antoni Venzin e sgr. Heinrich Schmed.
Per enconuschientscha dils gronds marets che sgr. Gustav Walty directur de cura ha per il svilup dell'industria ded jasters a Sedrun, vegn el numnaus commember d'honur dell'uniun de trafic e cura Tujetsch.		  
7. Sut varia ventilescha sgr. president Gion Andriu Berther la damonda sche bein ei segi buca comensurau ded alzar la taxa anualla a tals commembers che han pli grond interess dall'industria.
Sgr. gerau Duri Vigeli Soliva giavischa ch'ei vegni fatg uorden cun il deponer rumians els vaschinadis Sedrun e Gonda. Sin quella interpelaziun remarca sgr. president che quella damonda segi vegnida tractada pliras ga dalla suprastonza dell'uniun, mo stopi per ver valur legalla vegni lugada dalla vischnaunca entras in regulativ.		  
  Per fei dil sura
Baseli Huonder, actuar		  
      
  Protocol
per las tractandas della suprastonza dell'uniun de trafic e cura Tujetsch tier la sessiun dils 5 de schaner 1932		  
  Sgr. president Tumaisch Venzin scol. arva sco niev elegiu tgau della suprastonza dell'uniun per l'emprema ga la sesiun de quella sperond in ulteriur e prospereivel operar.  
1. Vegn priu invista dil niev urari della viafier Furka Alpsura per la stad 1932. Quel muosa de survir cuntenteivel a nos interess.  
2. Concluda la suprastonza de dar regularmein mintg'jamna part al Radiosender il raport dell'aura per il liug de cura Sedrun e de procurar per ina latta de masirar la neiv ella vischinonza della posta a Sedrun.  
3. Vegn discusionau e concludiu sur la damonda de subsidiar la via dil Tgom. Cheu vegn concludiu de dar 400.- frs. Quels pagen ils hoteliers 200.- frs. ed ils auters 200.- frs. paga l'uniun de trafic.  
4. Sgr. Gustav Walty manegia de rugalar sendas e vias prinzipalmein la senda che meina da Cavorgia sur Stagias a Curaglia. La suprastonza concluda de rugalar la primavera quella via e de marcar la lingia sufizientamein sinaquei ch'ils viandonts mondien buca a barschut (plaid che'ei dat mo en Tujetsch = ir suls confins).  
  Il sura attesta Baseli Huonder, actuar  
        
  Protocol
della conferenza della suprastonza dell'uniun cun ils sgrs. president de vischnaunca Gion Felici Monn, ing. Solca ed ing. Pajarola ed hotel Alpsu a Sedrun		  
  Quels sura numai sgrs. ein seradunai per conferir sur la damonda ded asphaltar il stradun atras il vitg Sedrun. Suenter haver priu in investa ocular navenda Mira dadens il vitg entochen ordador il vitg Sedrun datz sgr. ingenieur Solca il sequent pareri. El propona ded asphaltar il stradun naven della Foppa daor Sedrun entochen enta Mira, total ca. 650 m.
Da quels 650 m ha l'uniun de surprender 350 m, quei fa ina masira de ca. 2000 m2 e quosta 8 - 10.- frs. il m2, pia ina summa de 18'000 - 20'000.- frs. per quei emporto vegn segirau in subsidi de 50% dil cantun.
Suenter haver discussionau la damonda sedeclara la suprastonza pronta de manar atras quei project cun aung resalvar l'aprobaziun dils commembers.		  
  Per verdat dil sura segna
Baseli Huonder, actuar		  
     
  Protocol
per las tractandas della suprastonza dell'uniun de trafic e cura Tujetsch el hotel Alpsu a Sedrun, ils 24 de Matg 1932.		  
1. Prelecziun ed aprobaziun dil protocol digl 1. de Mars 1932.  
2. Sgr. president comunichescha che la damonda della pasculaziun dils salvanporis egl uaul Surrhein segi sligiada en buna favur, aschi che quels tiers mulestan buca pli ils jasters.  
3. En caussa de finanziaziun dils quosts per igl asphalt ha sgr. president Tumaisch Wenzin clamau tuts ils interessents q.v.d. ils pli maneivel vischins dil stradun per presentar a quels il project. En general ein quels stai cuntents cun sias dottas aschi che la caussa sa vegnir empalada vinavon tier la radunonza generalla per leza aprobaziun.  
4. Sgr. directur Gustav Walty ha elaborau in regulativ per las taxas de cura. Quel ei concepius conform igl regulativ cantonal per taxas de cura.
Quel duei vegnir translataus en romontsch e presentaus alla radunonza generalla per l'aprobaziun.		  
  Igl actuar
Baseli Huonder		  
      
  Protocol
per las tractandas della radunonza generala extraordinaria dell'uniun de trafic e cura Tujetsch ils 9 de zercladur 1932 el hotel "Kruna" a Sedrun.		  
  Sgr. president dell'uniun Tumaisch Venzin scolast arva la sesiun agurond als commembers beinvegni e giavischond buna sera speront sin buns e nizevels conclus.
Las tractandas ein las suandontas:		  
1. Metta el avon la damonda ded asphaltar il stradun atras il vitg Sedrun ina lunghezia de 350 m. Sgr. president dat raport digl operar della suprastonza conzernent quella damonda. El sa constatar ch'il cantun segirescha 50% supcidi per il quost de 18 - 20'000.- frs. che quella lavur quosta aschi ch'ei resta aung 9 - 10'000.- frs. per l'uniun. Da quella summa han ils hoteliers, fitschentas e vischins surpriu miez ne pli che miez. Pia resta ei all'uniun aung ina summma de 4000 - 4500.- frs. El metta la caussa en discussiun schebein ils commembers vulan aprobar il project ni buc. Sgr. hotelier Hans Giachen Decurtins racamonda en siu votum la caussa per aprobaziun, el dat aung ulteriiur sclariment dil curiu e passau en quella caussa. Sgr. Lucas Cavegn cassier dell' uniun dat sco minister de finanzas sclariment della forza finanziara dell quella ch'en scadin cass la damonda cardinala per manar atras quella ualti gronda interpressa.
Sgr. Vigeli Monn-Decurtins e sgr. Batesta Soliva-Cavegn giavischan che la lavur stetti toc sco puseivel en vischnaunca. Quei giavisch vegn la suprastonza ton sco puseivel a corispunder.
Sgr. president communal Gion Felici Monn racamonda d'axeptar il project.
Havend discusionau mla damonda detagliadamein vegn passau tier la votaziun. Tras tscharna vegn concludiu unanimamein de manar ora quella lavur sut las condiziuns avon alegadas.		  
2. Sco secunda tractanda metta sgr. president avon als commembers il regulativ per taxas de cura per Tujetsch. Quel ei elaboraus da sgr. Gustav Walty, directur de cura a Sedrun. La translaziun ha sgr. president Gion Felici Monn procurau, respectiv sez fatg.
Suenter haver prelegiu il regulativ artechel per artechel vegn quel cun entginas midadas acceptaus dalla radunonza. Il verbal definitiv vegn stampaus per ramontsch e per tudestg ed alura presentaus alla radunonza de vischnaunca per leza aprobaziun.		  
  Il sura attesta
Baseli Huonder, actuar		  
      
  Protocol
per las tractandas della suprastonza dell'uniun de trafic e cura Tujetsch, ils 19 de Fenadur 1932 el hotel Alpsu a Sedrun		  
1. Per la festivaziun digl 1. d'uost vegn conclodiu de procurar dell'uniun de trafic e cura anora de far fiugs sin ils suandonts quolms: Culmatsch, Tgom, Quolm Val, Quolm Cavorgia, Rodunda e Calmut. L'organsiaziun della fiasta a Sedrun vegn procurada da sgr. directur Gustav Walty.  
2. Muort malentelgientscha resta las taxas de cura per jasters pro 1932 sin 20 cts per persuna per notg en ils hotels e casas d'albiert e sin 15 cts per persuna en casas privatas. A sgr. Florentin Cavegn, Passhöhe Oberalp veg era fixau ina contribuziun de 2.50 frs. per letg, sco auters hotels e casas d'albiert..  
3. Ariguard la spediziun dils prospects vegn priu il sequent conclus: La spediziun daventa entras sgr, directur Gustav Walty e las spesas de spediziun surpren l'uniun.  
  Il sura attesta Baseli Huonder, actuar  
       
  Protocol
per las tractandas della suprastonza dell'uniun de trafic e cura Tujetsch tier la sesiun dils 3 de Sept. 1932 el hotel "Kruna a Sedrun".		  
1. Legia sgr. president scolast Venzin ina bref de sgr. Boner directur del'uniun de trafic cantonala concernent la reclama en ina fanestra d'ilustraziun a Turitg. Essent ch'igl exponer maletgs de reclama en talla fanestra vegn ualti car, concluda la suprastonza de schar curdar quell'expensa.  
2. Persuenter vegn concludiu dalla sup. ded empustar 10'000 prospects de vallada, zavar per relaziun de stad e d'unviern. Quels vegnên empustai dalla firma Manatschal & Ebner a Cuera.  
3. Dals quosts per la mischeida (ina specia de teer) per asphaltar provisoricamein il stradun atras il vitg Sedrun per la stad 1932 surpren l'uniun de trafic ina tiarza, ca. 7o.- frs,, ils auters 140.- frs. pagan ils hoteliers.  
  Per fei dil sura Baseli Huonder, actuar  
      
  Protocol
per las tractandas della suprastonza dell'uniun de trafic e cura "Tujetsch" tier la radunonza dils 19 de Sept. 1932 el hotel "Alpsu" a Sedrun.		  
1. Prelecziun ed aprobaziun dils protocols dils 24. de Matg, dils 9 de zercladur e dils 19 de Fenadur o. c.  
2. Sgr. Lucas Cavegn-Paly, cassier dell'uniun, dat raport della situaziun finanziala de quella. Tenor siu raport vegn la cassa gravegiada considerablamein schon igl onn 1932.  
3. La suprastonza concluda de crear in biro de trafic per Tujetsch. La direcziun da quel vegn surdaus a sgr. directur Gustav Walty cun dimora a Sedrun.  
4. Il preci per las cartas de cura vegn fixaus dat ussa neven sin 1.20 frs. il toc. Al vendider vegn concediu ins provisiun de 20 cts. il toc.  
5. Tras conclus della suprastonza vegn incassau dat ussa naven era da passants ina taxa de 25 cts per persuna.  
6. Sco cassier per il manaschi per igl asphaltar il stradun vegn numnau sgr. scolast Tumaisch Venzin.  
  Il sura attesta igl actuar
Baseli Huonder		  
     
  Protocol
per las tractandas della suprastonza dell'uniun de trafic e cura Tujetsch ella "stiva de caffe" de sgr. Albert Cavegn a Sedrun Gonda, ils 16 de november 1932.		  
1. Prelecziun ed aprobaziun dils protocols dils 3 e dils 14 de Sept o. c.  
2. Orientescha sgr. president Tumaisch Venzin ils commembers della suprastonza co, ed a tgi igl ei vegniu surdau la lavur de far e manar sin il platz de baghiar la crappa per asphaltar il stradun.  
3. La taxa per passants vegn tenor conclus della suprastonza quintada igl entir onn. Igl incassar entscheiva cun igl 1. de december o. c.  
4. Ariguard las contribuziuns per letgs vegn concludiu de star vid las statutas, pia per hotels e casas d'albiert 2.- frs. per letg e per casas privatas 1.- frs. per letg.  
5. Il segerar il credit per ils daners che ston vegnir pri si dalla banca cantonala per asphaltar il stradun vegn surdau a sgr. president Tumaisch Venzin. El vegn a procurar per las nezesarias segeronzas.  
6. La suprastonza concluda de puspei postular tier la direcziun de telephon che quella prolungheschi las uras per telephonar il temps de sesiun entochen las 9 u. della sera.  
7. Tras conclus della suprastonza asista sgr. Gustav Walty tier las sesiuns della suprastonza dell'uniun de trafic e cura Tujetsch cun viûsch cuseglionta.  
  Per fei dil sura
Baseli Huonder, actuar		  
     
  Protocol
per las tractandas della suprastonza dell'uniun de trafic e cura Tujetsch dils 13 de Dezember 1932 el hotel Alpsu a Sedrun.		  
1. Prelecziun ed aprobaziun dil protocol anteriur.  
2. Sgr. president Tumaisch Venzin comunichescha ch'el segi seconvegnius cun la suprastonza comunala de pladir in um che hagi quitau che la via tier la staziun vegni mantenida gl'entir onn en bien uorden, l'uniun paga ca. 1/3 dellas spesas.  
3. La direcziun de telephon dat part ch'ella sapi buca corispunder al giavisch dell'uniun de trafic Tujetsch, concernent la damonda de prolungir il temps per telephonar entochen las 9 della sera. Cun seza surprender ils quosts per il personal. La suprastonza concluda ded aunc inagada spluntar tier la direcziun per quella caussa. Per cas che vegn buca corospondiu a nies giavisch vegnan las spesas per tener aviert il bureau de telephon pagadas 2/3 dils hoteliers ed 1/3 dall'uniun de trafic e cura.  
4. Sgr. Lucas Cavegn, cassier dell'uniun dat in clar raport sur la finanza dell'uniun.  
5. Vegn tschentau si il budget pro 1933.  
6. La radunonza generalla vegn convocada ils 20 de december el hootel Kruna.  
7. La suprastonza concluda de reveder a certs comembers la contribuziun anualla.  
  Il sura attesta Baseli Huonder, actuar  
      
  Protocol
per las tractandas della radunonza generala ordinaria dell'uniun de trafic e cura Tujetsch disl 20 de dezember 1932 el hotel Kruna a Sedrun.		 Radunonza generala 1932
  Augurond a tuts commembers presents in beinvegni, arva sgr. president Tumaisch Venzin la sesiun. El prelegia la liesta de tractandas las quallas ein las suandontas:  
1. Apell dils commembers: Ei seresultescha ina presenza de 30 commembers, sco dumbravuschs vegnan ils signurs Gion Battesta Giger, Selva e Gion Battesta Soliva-Cavegn, Sedrun Gonda elegi.  
2. Prelecziun ed aprobaziun dils protocols dellas radunonzas generallas dils 17 de Dez 1931 e dils 9 de Zercl. 1932.  
3. Sgr. president Tumaisch Venzin dat in detagliau rapport digl operar della suprastonza, resp. dell'uniun. En buca meins che 10 sesiuns ha la suprastonza deliberau las fatschentas dell'uniun de trafic e cura. La gronda lavur ha senz'auter las preparativas per il project ded asphaltar il stradun caschunau. Cheu comunichescha sgr. president che ils quosts per talla lavur segien calculai sin 22'000.- frs. tenor plan.  
4. Rendaziun dils quens entras il cassier sgr. Lucas Cavegn-Paly.
La bilanza ei la suandonta
Intradas 3286.25 frs.
Expensas 3270.79 frs.
Surpli intradas 15.46 frs.
 
5. Per ils revisurs de quen dat sgr. gerau Gion Antoni Venzin, Rueras in detagliau raport. El sa constatar ch'ils quens segien manai exemplaricamein. El exprima che sgr. Lucas Cavegn mareti in grond engraziament per sia gronda bregia enten recavar daners ordeiver da firmas e fatschentas jastras. Sin proposiziun dils revisurs vegnan ils quens aprobai e pri all'entira suprastonza la responsabladat.  
6. Sgr. president presenta il budget pro 1933. Quel vegn senza oposiziun aprobaus.  
7. Igl anteriur prs. sgr. Hans Giachen Decurtins legia avon las statutas de uniun per cheutras trer en memoria als commembers las determinaziuns de quellas.  
7. La suprastonza manegia ch'ei segi comensurau ded alzar ad entgins comembers che gaudien pli grond gudogn dall'industria ded jasters la taxa anualla. Sinquei che quels segien orientai vegn scadin legius giu sin la radunonza generalla.  
8. Sgr. president recamonda ch'il plaz de reposiziun sper caglia a Mira vegni schaus el temps de seisun de jasters en disposiziun de quels e buca duvraus sco curtin de bargialers.  
9. Varia: Sco emprem votant pren sgr. Lucas Berther, Kruna il plaid per exprimer sia cuntentientscha cun igl operar  dell'uniun de trafic e cura Tujetsch. El giavischa cun quella caschun che la suprastonza fetschi il puseivel che la staziun de Sedrun vegni numnada el prospect della viafier federala per bigliet de sport cun preci reduciu.
Sgr. Gustav Walty dad en quella caussa entgin sclariment, essend ch'el ha da sia vard bgia priu posiziun tier la direcziun della viafier federala per quella caussa.		  
9. Sgr. Gustav Walty anunziescha ch'ei segi petizionau tier la direcziun de viafier per meter en funcziun in tren per manar ils skiturs da Sedrun si l'"Alp su" essend da present scart de neiv giu ella vallada. Alla petiziun ei vegniu corispundiu.  
9. Sgr. president beneventescha il niev comember dell'uniun sgr. Derungs-Tomaschett, hotelier a Tschamut.  
10. Sgr. gerau Gion Antoni Wenzin recamonda ch'ils hoteliers resgiuardien en emprema lingia ils producents indigens entras retrer da quels ils products.  
  Per fei dil sura
Baseli Huonder, actuar		  
      
  Protocol
per las tractandas della suprastonza dell'uniun de trafic e cura Tujetsch tier la sesiun dils 21. de Favrer 1933 el hotel Kruna a Sedrun.		  
1. Tier quella sesiun concluda la suprastonza de sabstener dalla contribuziun che l'uniun de trafic de Tujetsch paga mintgon alla uniun de trafic Sursilvana. Quels daners egl importo de 220.- frs. vegnen impundi per pagar ils prospects generals de vallada.  
2. Vegn concludiu de surprender adinterim la realisaziun per in Film per la val Tujetsch, sco era stau concediu ils 6 de Schaner 1933.  
3. Essent che igl urari della vaifier Retica pro 1933-34 corispunda buca als inters de nies liug de cura e sport concluda la suprastonza de petizionar tier las direcziun de viafier per ina cunvegnenta midada de quel.  
  Per fei dil sura
Baseli Huonder, actuar		  
     
  Protocol
per las tractandas della suprastonza dell'uniun de trafic e cura Tujetsch tier la sesiun dils 12 de mars 1933 el hotel Alpsu.		  
1. Vegn concludiu de termetter 6 maletgs de reclama al Consulat schwizer a Cologna (Köln) Tiaratudestga.  
2. La suprastonza, ensemblamein cun sgr. Gustav Walty, discusioneschan ditg e liung sur il program de la scola de skis "Skischule" e sur ulteriuras caussas ch'ein combinadas cun quella.
Ei vegn priu en quella caussa negin conclus essent quei ina damonda che va tier plitost mo als hoteliers.
La suprastonza exprima aber il giavisch ch'ils hoteliers seuneschien e tschentien si in project ensemblamein.		  
  Baseli Huonder, actuar  
       
  Protocol
per las tractandas della suprastonza dell'uniun de trafic e cura Tujetsch redunada ils 20 d'uost 1933 el hotel Alpsu a Sedrun.		  
1. La suprastonza concluda ded indemnisar a sgr. Decrusch per lavar e schubergiar il toc asphaltau dil stradun cun 1.50 frs. per di.  
2. Vegn concludiu de cumprar ca 30 m schlauchs per far diever dell'aua dils hiderants per lavar il stradun.
Sgr. cassier Lucas Cavegn-Paly vegn comisionaus de procurar per quei material.		  
  Per fei dil sujra
Baseli Huonder, actuar		  
       
  Protocol
per las tractandas della suprastonza dell'uniun de trafic e cura Tujetsch tier la sesiun dils 14 de december 1933 el hotel Kruna a Sedrun.		  
1. Prelecziun ed aprobaziun dils 2 protocols anteriurs.  
2. Raport dils quens tras sgr. cassier Lucas Cavegn-Paly.
Sgr. president Tumaisch Venzin dat raport dils quens dil project per asphaltar il stradun.		  
3. Vegn tschentau si il budget pro 1934, il qual vegn mes avon  alla proxima radunonza generalla per aprobaziun.  
4. A sgr. Gustav Walty vegn concludiu de dar 100.- frs. per sia lavur prestada all'uniun, medemamein  ei la suprastonza dil meini de dar al cassier dell'uniun ina paga de 50.- frs. per onn.  
5. Vegn tschentau si la liesta dellas tractandas per la radunonza generalla. La radunonza generalla vegn fixada sin ils 17. de december 1933 el hotel "Alpsu".  
  Il sura attesta
Baseli Huonder, actuar		  
      
  Protocol
per la radunonza generalla ordinaria dils commembers dell'uniun de trafic e cura Tujetsch el hotel Alpsu a Sedrun ils 17 de december 1933.		 Radunonza generala 1933
  Sgr. president Tumaisch Venzin scolast augurescha a tuts comembers presents ina emperneivla sera.
El prelegia la liesta de tractandas per la hodierna radunonza las quallas ein las suandontas:		  
1. Elecziun de 2 dumbravuschs: sco tals vegnan proponi ed elegi ils sgrs.: Placi Soliva e Vigeli Monn-Decurtins; presents ein 33 commembers.  
2. Sgr. president dat in detegliau rapport dils quens caschunai entras il project per asphaltar il stradun. Quels ein manai dapersei, pia independentamein dils auters quens dell'uniun. Ils quosts totals per quella lavur muntan sin 20'284.24 frs.  
3. Raport dils quens dell'uniun entras sgr. cassier Lucas Cavegn-Paly.
La bilanza ei la suandonta:
Intradas 4625.53 frs.
Expensas 4454.04 frs.
Surpli intradas pro 1933 171.49 frs.
 
4. Vegn surdau il plaid als revisurs de quens per ils quals sgr. gerau Gion Antoni Venzin dat in detagliau rapport. El constatescha ch'els segien i atras ils quens  detagliadamein e cun peda e anflau quels manai fetg exact e bein.
Tras tscharna vegnan ils quens aprobai cun exprimer al cassier in grond engraziament ed el madem temps prender all'entira suprastonza la responsabladad.		  
5. Il budget pro 1934 vegn prelegius ed acceptaus dalla radunonza. La radunonza va era d'accord cun la proposiziun della suprastonza ariguard l'amortisaziun dil deivet caschunaus entras asphaltar il stradun. Quei deivet duei vegnir amortisaus enteiver 5 - 6 onns.  
6. Elecziuns per in bieni 1934 - 36.
President: sgr. Christian Berther, hotelier
Actuar: sgr. Giachen Giusep Gamboni
cassier: sgr. Lucas Cavegn-Paly
Assesurs ils sgrs. Hans Giachen Decurtins, hotelier e Placi Soliva, ustier.
Sco revisurs ein elegi sgr. gerau Gion Antoni Venzin e sgr. directur Gion Antoni Monn.		 Elecziuns
  Per fei dil sura attesta
Baseli Huonder, actuar		  
      
  Protocol
per las tractandas della suprastonza dell'uniun de trafic e cura Tujetsch dils 22.XII.1933 el hotel Kruna a Sedrun.		  
  Sut sura datum ei la supra. stada radunada e deliberau las suandontas fatschentas  
1. Sco survigilader per la via della staziun vegn sgr. Placi Soliva elegius. El ha de procurar che talla via segi en bien uorden, per pli grondas lavurs ha el de schar saver il tierz gerau, il qual ha de dar ils necessaris umens.  
2. Sin giavisch de plirs curants vegn schau metter on Curtin enzacons bauns per schar far diever de tals.  
3. Sut Nr.3 vegn la damonda pervia d'in glatsch damonda. Sgr. hotelier Hans Giachen Decurtins ha schau baghegiar in plaz per far in glatsch sut sia casa nova e gia uss entschiet cun las lavurs vid il glatsch, ed uss ei la damonda cheu, schebein la uniun de cura e trafic vegli surprender sin agen quen il glatsch per quest unviern. La damonda ei vegnida discurida ditg e liung ed igl ei era vegniu priu en egl il cuost e las intradas che talla lavur pudessen purtar e la finala va la supratsonza d'acord de surprender il glatsch per quest unviern. Ils cuosts vid il glatsch quentan ins sin 900.- frs. Quels 900.- frs. serepartan ins sco suonda. Il survigilader dil glatsch, Bruno Hendry 150.- frs. per meins, priu 3 meins 450.- frs. a H. Decurtins tscheins pil plaz 250.- frs., 100.- frs. vegnen quintai per cas de gronda nevadas, sch'ins duvras plirs umens de alontanar talla. Quels umens han ina paga de 70 rps per ura, 20.- frs. per glisch, 50.- frs. requesists e diversa 30.- frs., pia ina summa de 900.- frs.. per finansiar tals cuosts vegn schentau si suandontas normas. Tuts jasters che prenden albiert els Hotels Kruna ed Oberalp pagan ultra della Curtaxa ina Sporttaxa de 15 rps per di, quei vegnes cun ina suma, priu sco las curtaxas che eran vegnidas en onn 250.- frs. Dapli pagan tuts ils jasters ch'ein els hotels ni era nossa glieut che vulan far diever de quei sport las suandontas taxas: per in di 50 rps, per in'jamna 2.50 frs. e per in meins 5.- frs.
Tuts auters jasters ch'ein en Villas, Pensiuns ni privat pagan per in di 80 rp., per in'jamna 3.- frs., e per in meins 7.- frs. Schei vegn fatg diever enpau de quei sport, sche vegnan las intradas a survargar in bien ton las expensas.		  
4. Ei vegn aunc concludiu de schar far ina scafa per nos requesits.  
5. Siara  sgr. president la sesiun e declara che lautra radunonza hagi liug tier Placi Soliva, ustier dil Krislipass.  
  Per fatg dil sura attesta
Gamboni Giachen Giusep, actuar		  
     
  Protocol
per la II sesiun della suprastonza della uniun de cura e trafic Tujetsch, 20.I.34.		  
1. Prelecziun ed aprobaziun dil protocol della I sesiun.  
2. Davart igl urari dils trens ual compari vegn dau en alla direcziun de viafier entginas midadas, il principal giavisch fus ch'il tren della sera che vegn aunc a Sedrun, restas sco igl ei vegniu dau ora igl urari 1932/33 e buca sco igl onn vargau.  
3. Sgr. president Christian Berther legia avon il contract ch'el ha fatg cun Bruno Hendry pervia dellas lavurs vid il glatsch. Sgr. Bruno Hendry surpren de mantener en bien stan il glatsch, sche las relaziuns lubeschan ed era d'incasar las taxas stabilitas e da temps en temps dar giu quen al casier della uniun de trafic.  
4. Ei vegn presentau ils quens pervia della reclama ch'ei vegnida fatga per la sesiun de quest unviern. Ils quens dellas diferentas firmas representan la suma de 2319.- frs. dals quals l'uniun surpren 1500.- frs., igl auter surprendan ils hoteliers.  
5. Sgr. president manegia chei fusi forsa cunvegnet de dar en allas direcziuns de viafier Furka e Retica ina petisiun de far arver il Oberalp quels dis della fiasta de Skis Schwizera a Ursera. Dalla causa vegn schau sura a sgr. president, denton crei ins de buca ver gron suces. Cun quei ein las tractandas stadas finidas e sgr. president siara la sesiun.  
  Il sura attesta
Gamboni Giachen Giusep, actuar		  
      
  Protocol
della III sesiun della suprastonza della uniun de cura e trafic Tujetsch, ils 5 de matg 1934		  
1. Prelecziun dil protocol anteriur, il qual ei vegnius approbaus.  
2. Sgr. casier Lucas Cavegn-Paly prelegia ils quens menai pil glatsch, ils quals han la suandonta bilanza: Intradas 987.95, expensas 960.80, avanzament 27.15. Las Churtaxas pigl unviern han purtau en 1619.45, mo maunca aunc las Churtaxas de Florentin Cavegn, Alpsu. Sgr. Florentin Cavegn selamenta che sgr. Walty segi mai vegnius sun sia glieut tier el si Alpsu e perquei seigi el era buc obligaus de pagar las Churtaxas, sch'el vegni mo risguardaus aschi pauc. Tala causa vegn schau sura a sgr. president de seconvegnir cun Florentin Cavegn.  
3. Il scuar e lavar vias vegn puspei marcadau cun sgr. Decrusch, il qual haves bugen in tec paga dapli. Sgr. president ha retratg offertas pervia d'in bien cuntrez de lavar las vias, il qual vegneis si n ina summa de 390.- frs. Ei vegnera concludiu de regular era uonn autras vias e sendas.  
4. Ils posesurs dil prau a Sontget, ils quals ein aunc adina buca cuntens cun il donn ch'ei vegnius fatgs ora ad els pervia della crappa, vegn schau sura a sgr. P. A. de regular quei ina ga giud il fatg.  
5. Las glisch suenter la via della staziun vegn concludiu de schar arder sur onn aschi ditg sco il vischinadi pagi in fr per fiug, era vegn concludiu de schar instalar odem il vitg Sedrun ina cazzola, denton ils glas haves ins bugen sch'ils vischins leu damaneivel pagasen.  
6. Sgr. president legia avon ina bref de sgr. Thomas Cavegn satler, il qual salamenta ch'el vegni privaus de sia lavur entras sgr. Walty, e ch'el sco commember dela uniun de trafic giavischi remadura en quella causa.  
7. Sco davosa tractanda declara sgr. president che nus haveien l'honur de retscheiver ils 22. e 23. de Zercladur l'uniun de trafic Grischuna cheu a Sedrun tier sia radunonza anualla generala. Sgr. president surpren d'organisar in tec pulit quella fiasta cun era envidar en il chor viril e musica sin ils 22 la sera e schar purtar avon in per producziuns. Cun quei ein las tractandas stadas finidas e sgr. president siara la sesiun.  
  Per fei dil sura attesta
Gamboni Giachen Giusep, actuar		  
      
  Protocol
della IV sesiun della suprastonza della uniun de cura e trafic Tujetsch, ils 13 de Zercladur 1934.		  
1. Sgr. president plegia avon ol program della uniun de trafic Grischuna per sia radunonza generala a Sedrun ils 22 e 23 de zercladur. Ei vegn fixau las necesarias preparativas per retscheiver endretg quels amitgs della uniun de trafic Grischuna. Per scadin delegau vegn concludiu de dar in maletg de nosa valada en bauna regurdienstcha de nosa uniun.  
2. Autras tractandas ein ord munconza de 2 umens della suprastonza vegnidas refretgas.  
  Per fei dil sura attesta
Gamboni Giachen Giusep, actuar		  
     
  In pin memorandum
sur la radunonza d'ustiers grischuns, ils 22 e 23 de zercladur a Sedrun.		  
  Ils 22. e 23. de Zercladur ha Sedrun giu l'honur de retscheiver ils hoteliers Grischuns tier sia radunonza generala. Da miezdi arivan ils commembers della uniun de trafic Grischuna a Sedrun. Allas 2 a mesa ha giu liug el hotel Cruna la radunonza de delegai della uniun de cura e trafic Sursilvana. Sgr. Hans Giachen Giachen Decurtins president della uniun de trafic, ha giu gron plischer de saver tener giu ina ga cheu quella radunonza. Allas 8 della sera eis ei vegniu tschenau el hotel Alpsu e duront tscheina tegn sgr. Christian Berther en num de nossa uniun in flot e bi plaid de beinvegni. Suenter tscheina han chor viril e musica dau ina producziun avon il hotel. L'uniun de cura Sedrun ha alura envidau en las 2 societads tier in bien glas vin, aschia ei la fiasta ida vinavon ensemen cun ils ustiers grischuns en in emperneivel decuors. Il bien vin dellas buteglias ha schligiau la liunga als ustiers, aschia che ils biars han priu il plaid, era il toc humoristic Michael in grand hotel, ha leventau biaras risadas. Menziun lesel jeu era far che la radunonza hagi giu en lur miez 5 mistrals della Cadi. Legher vinavon ha la fiasta cuzau tochen encunter la damaun. Ils 23 avonmiezdi ha giu liug la radunonza generala della uniun de trafic Grischuna el hotel Oberalp. Suenter la radunonza eis sei alura vegniu gentau en hotel Kruna cun in bien appetit. Duront il gentar ha ins surdau a scadin commember che  ha priu  part della radunonza ina regurdientscha entras in bi maletg de nosa val, il qual ei vegnius axceptaus cun grond plischer.
Suentermiezdi han ils biars aunc fatg ina excursiun cul tren ad Ursera ed alura turnai spperonza saunamein a casa sia.		  
  Per fei dil sura attesta
Gamboni Giachen Giusep, actuar		  
       
  Radunonza
dils 25 de Zercl. 1934 el hotel Alpsu		  
  Igl intent de questa radunonza ei stau la damonda pervia d'ina nova scola da skis. Sgr. Lucas Berther, il qual era ual cheu presents, ha era priu part della radunonza. El dat in detagliau rapport sur dil curiu e passau dils ons vargai en causa scola de skis. El manegia che sgr. Walty segi buc igl um per menar atras sco ei vegn giavischau ozildi ina scola de skis ed ins segi sfurzaus de mirar per ina autra persuna sco menader della scola de skis. Suenter haver tedlau giu ils meinis vegn ins tiel suandont conclus.
L'uniun de trafic stat pia en per ina nova scola de skis, denton sto il menaschi de quella vegnir menaus dapersei, e sch'ei haves de dar in eventuel deficit, sche ston ils hoteliers surprender quel. Perquei intent vegn pia elegiu ina suprastonza la quala consista ord president, actuar e casier. Sco president vegn elegius Hans Giachen Decurtins, actuar Lucas Berther, cassier Christian Berther. Sco niev menader della scola de skis vegn priu en egl sgr. H. Zogg, in capavel ed enconuschent um dil sport de skis. Per buca privar sgr. Walty de lur fadia va ins d'acort de surdar ad el, sco era a sia feglia ed eventual era a sia dunna a scadin ina classa della scola de skis.
Ils commembers digl aquaduct Fontauna Sogn Gion damondan ina bonificaziun de 10.- frs. per onn per duvrar l'aua de levar las vias. Las Churtaxas per la stad vegnen alzadas sin 40 rps per cumis e pasants 25 rps sur tut onn, pensiuns e privats resta ei sco tochen da cheu 25 rps.		  
  Per fatg dil sura attesta
Giachen Giusep Gamboni, actuar		  
       
  Protocol
della sesiun della suprastonza, ils 11. october 1934		  
1. Sgr. Tumaisch Venzin prelegia ils quens menai per finansiar d'asfaltar il stradun. Ils quens ein vegni menai en uorden, mo ins manegia de schar ira atras ils revisurs de quen della unin de trafic e preleger els silla radunonza generala.  
2. Per ils bials begls ch'ein vegni baghegiai a Sedrun vegn ei concludiu de dar ina bonificaziun de 400.- frs.  
3. Il glatsch vegn ei concludiu sco igl onn vargau. Il plaz vegn uonn marcadaus per 200.- frs. cun H. Decurtins.  
4. Sgr. Hans Giachen Decurtins vegn cun la suplica che la uniun de trafic duesi dar 50.- frs. ad onn per arver ad uras la primavera il quolm Ursera al trafic per ils autos. Aschinavon che autras uniuns e firmas han dau plaid de dar sia quota, va ins era unanimamein d'acord de dar quels 50.- frs. per quei intent.  
  Per fei dil sura attesta
Giachen Giusep Gamboni, actuar		  
     

2

 Secund cudisch da protocols dalla Uniun da cura e trafic Tujetsch
28-10-1934 - 26.04.1942		  
      
  Protocol
della radunonza dils 28 d'october 1934 cun la suprastonza ed ils proprietaris e fitaders de pensiuns, habitaziuns e hotels		  
1. Il president fa attens, che las liestas de habitaziuns che vegnen termesas ora als interesents segien alla fin e stopien vegnir renplazzadas. Avon che quei daventi duein eventuallas midadas dil text ect. vegnir anunziadas, sco era novas habitaziuns. Ins surlai al president de puspei schat stampar ca 300 tocs.  
2. In autra tractanda apertegn co ins savesi aranschar tier in niev modus de reclama per nossa valada. Quei sa daventar mo entras ina unitad dils hoteliers, proprietaris de pensiuns e habitaziuns, cun sespruar de menar atras ina reclama colectiva. Il menar atras e finanziar talla reclama, duei esser in menaschi per sesez, sco era menar quen separau per talla. Il president meta era avon co ins saves finanziar la reclama sin ina giesta moda e maniera. Quei sa daventar cun fixar ina taxa per mintga notg e letg ocupau. Suenter ina discusiun ha ins priu sequent conclus. Hotels pagan per mintga letg e notg ocupada ina taxa de 20 cts. Pensiuns e habitaziuns ina taxa de 10 cts. La taxa dils letgs sco tochen ussa de fr. 2.- per ils hotels e fr 1.- per habitaziuns e pensiuns croda naven, mo buca aber la taxa personala sco commember dell'uniun de cura e trafic.
En cassa de reclama vegn pia contribuiu tuttas taxas fixadas tenor il diember dils logis, la contribuziun della uniun de trafic per reclama, ina contribuziun ord cassa della scola de skis Sedrun. Tal conclus ei adinterim mo per in onn d'emprova ed entscheiva cun igl 1 XII 1934.		  
  Igl actuar Gamboni Giachen Giusep  
      
  Protocol
per la sesiun della suprastonza, ils 16 de december 1934		  
  Prelecziun ed aprobaziun dils 2 davos protocols. Pervia d'ina musica sil glatsch vegn schau sura a president ed actuar de far sco els anflien per bien. Ei vegn alura repasau ils quens e paregliau quels cul budget digl onn passau ed ins sto constatar ch'igl ei buca svariau bia. Ei vegn alura tschentau si il budget per 1935, il qual vegn alura mes avon alla proxima radunonza generala per aprobaziun. Era vegnen las corespondenzas miradas atras ed ins sto constatar ina gronda e biala lavur davart nies sgr. president Ei vegn tschentau si la gliesta de tractandas per radunonza generala. La radunonza generala vegn fixada sin ils 18 de december el hotel Cruna.  
  Il sura attesta Giachen Giusep Gamboni, actuar  
      
  Protocol
per la radunonza generala della uniun de trafic e cura Sedrun Tujetsch, ils 18 de december 1934		 Radunonza generala 1934
  Sgr. president Christian Berther agurescha a tuts commembers ina emperneivla sera. El prelegia la liesta de tractandas per la hodierna radunonza, las quallas ein las suandontas:  
1. Elecziun de 2 dumbravuschs, sco tals vegnen proponi ed elegi sgr. Tumaisch Venzin e sgr. Vigeli Monn, presents ein 32 commembers.  
2. Prelecziun dil protocol della davosa radunonza, il qual ei vegnius approbaus.  
3. Sgr. president dat in detagliau rapport de tutas fatschentas digl onn vargau.  
4. Rapport de quens entras sgr. Lucas Cavegn. La bilanza ei la suandonta:
Intradas 5975.89 frs.
Expensas 5943.95 frs.
Surpli intradas 13.94 frs.

Vegn surdau il plaid als revisurs de quen, per ils quals gerau Venzin dat in detagliau raport, sco era dils quens menai per asfaltar il stradun. El constatescha ch'ils quens seigien menai exact ed en uorden. Tras tscharna vegnan ils quens approbai cun exprimer al casier in grond engraziament, ed il medem temps prender all'entira suprastonza la responsabladad. Il budget per 1935 vegn prelegius e approbaus della radunonza.

  
5. Sur varia vegn sgr. Derungs cun la damonda. Ei seigi vegniu tschentau si dapertut placats sco muosavias. A Dieni segi vegniu mes si placats che muosien de ir sur Alpsu sur Milez, mo che ins sapi era ira sil Alpsu tras Tschamut, de lezs placats hagi el viu negins ed el lesi in tec sclariment sur de quella causa.
Sgr. president dat il suandont sclariment, ch'els hagien saviu de quei per cura ch'ils quens segien vegni a nus, quei segi tut vegniu procurau da Cuera anora.		  
  Cun quei ei la radunonza vegnida serada e sgr. president agurescha a tuts ina cordiala buna notg.  
  Per fei dil sura attesta
Giachen Giusep Gamboni, actuar		  
         
  I Protocols
per las radunonzasdella uniun de trafic e cura Sedrun Tujetsch 1935.		  
  Protocol
dils 14 d'avrel 1935 el hotel Oberalp.		  
  Dat sgr. president sclariment sur il menaschi della scola de skis duront la sesiun 1934/35. Senza igl inventari ch'ei vegnius mes neu semuosa ei in deficit de frs. 469.40, il qual ei vegnius repartius e pagaus dals hotels e pensiuns. Gl'inventari consista ord diferents plakats, fanas per quorsas de skis, sco era madaglias de premi e cartas d'intrada. Quellas causas ein deponidas tier il president dell'uniun de trafic.  
2. Dat sgr. president rapport sur della reclama colectiva della valada, la qualla vegn finanziada entras las taxas dils letgs ocupai.  
  Gamboni Giachen Giusep, actuar  
      
  II Radunonza
dils 15 de fenadur Kruna		  
1. Ei vegn tractau e discusionau a tgi surdar il scuar e lavar il stradun. Sin ina pretensiun de sgr. Decrusch de 4.- frs. per di va ins buca d'acort, ins duei mirar de secunvegnir sin ina pli raschuneivla moda.  
2. Sin las reproschas de frars Cavegn a Sedrun, che l'aua penetreschi entras lavar las vias en siu jert e caschuni schi donn, vegn ei schau su al president de mirar suenter, co ins savesi impedir quei.  
3. Per curants che pasentan sias ferias tochen 2 meins e dapli, duei vegnir fatg ina reducziun sin las taxas de cura de 20%.  
4. Per la fiasta digl 1. uost conclud'ins de aranschar talla sco usitau e de surdar il procurar e vender ils lampions pils affons a Teofil Schmed.  
  Gamboni Giachen Giusep, actuar  
      
  III Radunonza
dils 26 de fenadur, Hotel Oberalp		  
1. Vegn concludiu de pagar a sgr. Decrusch per scuar e levar il stradun silmeins entochen ils 15 d'uost di per di 2.50 frs e suenter per mintga ga scuar era il medem.  
2. Sin reclamaziuns de turists, pervia della via sur il Kreuzlipass e Mittelplata vegn ei surdau a sgr. president cun aung trer tier in um, de marcar quels 2 pass pli detagliau.  
3. Fa sgr. president atens ch'ins stopi patertgar de metter neu in prospect della vallada sin la sesiun proxima d'unviern et ins surlai a sgr. president de s'interesar per offertas.  
4. Tschenta sgr. president la preposiziun sch'ins lesi buca surdar a sgr. Pacholski la controlla d'jasters e sin fundament de quella medemamein schar incasar tal las taxas de cura. Suenter viva discusiun ha ei pegliau il pli de star tier il sistem veder e de buca surdar quei ad in um jester.  
5. Prend'ins lura aunc conclus che las taxas de cura de hotels e pensiuns, stopien vegnidas dadas giu mintga meins.  
  Igl actuar
Gamboni Giachen Giusep		  
          
  IIII Radunonza
ils 14 d'uost, Hotel Kruna		  
1. Tier quella radunonza han era priu part Lucas Berther e Batesta Soliva.  
2. Sgr. pres. metta avon e dat sclariment sur dallas preparaziuns ed offertas dil prospect d'unviern, termesa tier della firma Müller a Turitg. essent l'offerta per nus memia aulta ha ins concludiu de schar termeter tier autras preposiziuns et era dumandar si ina offerta tier la firma Manatschal Ebner Cuera.  
3. Det ina reclama sin las fanestras, tenor ina skiza de sgr. Pacholski che presenta las turas de skis de nossa valada, vegn ei priu conclus d'asister de talla.  
4. Fa il pres. atents sur della liesta de finanziaziun dil deficit della vaifier della Furca termesa tier a nossa uniun cun ina taxaziun annuala de 900 fr. Sin quella pretensiun va ins absolut buca d'acord e surlai al pres. de far enconuschent alla direcziun della viafier, nies conclus
Igl actuar
Gamboni G. Giusep		  
      
  V Radunonza
ils 4 de Sept. Rest. Kreuzlipass		  
1. Il pres. dat danovamein sclariment sur dellas offertsas dil prospect della vallada de Manatschal Ener Cuera sco era de G.Müller Turitg. Ins ha lu concludiu de surdar la furniziun e stampa dils prospects alla firma G.Müller de Turitg en in diember de 30'000 tocs a 63.50 fr per melli, cun pagar en 3 ratas, en gl'interval de 2 onns.
Gamboni G.Giusep
actuar		  
      
  VI Radunonza
ils 23 de Sept. Rest. Kreuzlipass		  
1. En quella sesiun eis sei vegniu concludiu de vegnir encunter alla viafier della Furka e contribuir per 2 onns ina taxa annuala de fr 300.- cun la condiziun che talla quota vegni repartida sin ils letgs dils hotes, pensiuns e habitaziuns, per cass ch l'uniun de trafic possi buca vegnir suenter il pagament.
Igl actuar
Gamboni G. Giusep		  
      
  VII Radunonza
ils 24 de Nov. hotel Oberalp		  
  Sin la radunonza della suprastonza dils 24 XI ei vegniu tractau il sequent.  
1. Pres. Christian fa enconuschent che ils prospekts della vallada segien conpari e quels anflien generala cuntentienscha, els vegnan sin 6,3 rp il toc.  
2. Wegn concludiu de tremeter 100 placats gronds a Sgr. Auttweiler e 60 tocs a SBB Bern per repartaziun ein las staziuns federalas.  
3. Il menaschi dil glasch vegn puspei menaus vinavon aschia sco igl onn vargau. Il scheins per plaz haves ins bugen sche sgr. Decurtins mas puspei in tec anavos. Sgr. Decurtins fa d'acord de ira anavos 30 - 50 fr, secund sco il deficit semovi. Era sto ei vegnir mes neu schlauchs il qual ins surlai a sgr. pres. de progurar pil necesari. Il glasch vegn puspei surdaus a Bruno Hendry per cas de malsogna ha el de progurar per il substitut. Sgr. Bruno Hendry retila ina paga de 5 fr per di. Davart musicka e glisch sil glasch vegn schau sura a sgr.pres. de progurar per il necesari. axas vegn ei schau las mademas.  
4. Sgr. Präs. fa de saver che la scafa avon posta vegni probabel naven ord motiv ch'il contract cul possesur della reclama seigi alla fin, tras quei vegni il urari della aura era buca a comparer pli. Sgr. cassier surpren de contrahar cul posesur della scafa. Sco casier manegia fusa sgr. Ulbrich posesur della eventual vendider de quella per 150 fr. Ad interim vegn il urari della aura abonaus texa 5 fr per meins.  
5. Il survesch de telephon vegn prolungius per 1 ura la sera naven dils 15 XII 35 entochen 15 III 36 senza suschlag per encunter vegn Lucas Cavegn (postenent) bonificaus cun 1 fr per di per 3 meins dalla uniun de trafic.  
6. Placi Soliva sedeclarar de buca surprender pli la survigilonza della via della staziun, en siu stagl vegn B.Soloiva (viturin) elegius.  
7. Manatschal Cuera ei soferius de vuler schar comparer ensaconts maletgs de Sedrun el Fremdeblatt gratuitamein. Maletgs e dretg de reproducir sto l'uniun procurar. Ei vegn priu notizia sur de quei.
Igl actuar
Gamboni G.Giusep		  
     
  VIII Radunonza
dils 11 de dez. 35 el hotel Kruna		  
1. Prelecziun ed aprobaziun dils protocols anteriurs.  
V Rapport dils quens entras sgr. Lucas Cavegn.  
3. Vegn tschentau il budget per 1936, il qual vegn mes avon alla proxima radunonza generala per aprobaziun..  
4. Era vegn la gronda lavur de sgr.pres. mirada taras ch'el ha giu cun sia corespondenza.  
5. Vegn tschentau si la liesta dellas tractandas per la radunonza generala, talla vegn fixada sin ils 15 de Dez. alpsu.  
6. Sut varia fa sgr. H. Decurtins menziun che la reclama colectiva ch'ins hagi fatg uon hotels, pensiuns e habitaziuns hagi buca giu il giavischau sucese. ils hotels hagien stoviu pagar dapli ch'ils privats ed il  intres gron hagien ils privats giu, ed el fusi dil meini de calar si cun quei e star sin il sistem vegl.
Per fei dil sura
Gamboni G. Giusep		  
       
  Radunonza generala della uniun de cura e trafic, ils 15 de Dez. 1935 el hotel Alpsu Radunonza generala 1935
1. Sgr. pres. Christian Berther agurescha a tuts comembers ina emperneivla sera. El prelegia la liesta de tractandas per la hodierna radunonza, las quallas ein las suandontas.  
2. Elecziun de 2 dumbravuschs:  sco tals vegnan proponi ed elegi ils sgr. B. Soliva e Placi Jakumeth, presents ein 33 commembers.  
3. Rapport de quens entras sgr. cassier Lucas Cavegn-Paly. La bilanza ei la suandonta:
Intradas 5674.44 frs.
Expensas 5599.98 frs.
Surpli intradas 74.96 frs.

Ei vegn surdau il plaid als revisurs de quen per ils quals sgr. gerau Venzin dat in detagliau raport. El constatescha ch'els segien i atras ils quens detagliadamein e cun peda e anflau quels menai fetg exact e bein. Tras tscharna vegnan ils quens aprobai cun exprimer al cassier in gron engraziamen ed el medem temps prender alla entira suprastonza la responsabladad.

  
4. Sgr. pre. dat in detagliau rapport sur dil cusiu e pasau digl onn vargau e prelegia il budget per 1936. Talla vegn aprobaus della radunonza.  
5. Elecziuns dell suprastonza per il bieni 1936 - 38:
Pres. sgr. Christian berther
Actuar sgr. Viegli Monn-decurtins
Cassier sgr. scolast A.Hendry
assesur ils sgr. H. Decurtins e B. Soliva
Sco revisurs de quen ein elegi: sgr gerau Venzin e sgr. direc. Gion Antoni Monn.		  
6. Sut varia ei aunc vegniu discussionau 2 damondas. La reclama colectiva ei general giavisch de buca far pli. Denton vegn tschentau si las suandontas normas. Hotels pagen dacheudenvi 2 fr per letg, pensiuns 1.50 fr e privats 1 fr. per letg.
Davart il regulativ della uniun de trafic vegnan entgins commembers cun la pretensiun ch'els pagien mo 15 rp taxa de cura, malgrad che stat scret sil regulativ 20 rp taxa de cura. Ei vegn schau sura a sgr. pres. de regular giu quei cun quels tals, u che tuts pagen 15 ne era tuts 20 rp.
Per fei dil sura attesta
Gamboni G. Giusep, actuar		  
      
  Protocols per las radunonzas de la suprastonza della uniun de trafic e cura Sedrun Tujetsch 1936 1936
  I. Radunonza dils 6 de Schaner 1936
Restaurant Krützlipass		  
  Il Sgr. Präs. comunichescha als commembers della suprastonza ch'el hagi enflau ussa in cassier adatau per l'uniun de trafic, numnadamein Sgr. scolast Hendry Anton. El segi sedeclaraus de surprender quei uffeci per la medema paga sco il cassier d'avon, pia 50 fr.
Tuts ein contents cun quei e cun quei ei la radunonza stada finida.
Igl actuar
Vigeli Monn-Decurtins		  
        
  II. Radunonza dils 15 da matg 1936 Hotel Cruna  
1. Sgr. Präs. arva la radunonza beneventond specialmein il niev sgr. cassier, scolast Hendry.  
2. Dat Sgr. präs. sclariment da vart ils prospects de stad. Ei fussi bien de posseder tals, mo per inaga stoppi ins desister de far si novs,s chi ditg sco quesl digl unviern segien aung de pagar.  
3. Dat Sgr.präs. in rapport sur ils quens della scola de skis. Quella ha luvrau igl unviern vargau fetg bein. Il recav netto ha tunschiu de pagar il defficit digl onn avon ed igl ei eunc restau circa 100 Fr. (121.20)  
4. L'uniun de trafic sto puspei haver in che scua las vias duront la stad. Ins va d'accort de turnar a surdar quei paun a Sgr. Martin Decrusch. Il far giu cun el pervia della paga ect. vegn surdau al sgr. präs.  
5. Differentas vias ston puspei vegnir segnadas. Quella lavur vegn surdada al Sgr. cassier ed a Tumaisch Berther (cuschhanier) Cruna.
Cun quei ei stau finiu
Igl actuar
Vigeli Monn		  
      
  III. Radunonza dils 8 d'october 1936 Hotel Alpsu  
1. Sin giavisch de Sgr. Decurtins ei la suprastonza dell'uniun de trafic seradunada ensemen cun la suprastonza dil clup de skiturs quei di el Hotel Alpsu. Sgr. Decurtins di cheu, ch'el e Sgr. Lucas Berther hagien aunc buca saviu secunvegnir, tgi prender sco instructer della scola de skis per il proxim unviern. El segi per Zogg, Lucas per Pacholski ed el vegli ussa era udir, per tgi las suras uniuns seigien, essent ch'el manegia che quellas astgien era dir lur pareri en quella damonda. Suenter haver discussionau quella causa, ein tuts stai per Zogg. Avon che dar en denton alla regenza per ina concessiun per quel, vul ins denton aunc far enconuschent quei a Sgr. Lucas Berthered in surdat il scriver a lez al cssoier dell'uniun de traffic.
Cun quei ei la radunonza stada finida.
Actuar
Vigeli Monn		  
     
  IV. Radunonza dils 30 d'october 1936 Hotel Alpsu  
  Per quei di ei la suprastonza dell'uniun de trafic ensemen cun ils possessurs dellas duas pensiuns puspei rededunai sin giavisch de Sgr. Decurtins en il Hotel Alpsu. Sgr. Decurtins fa cheu enconuschent ch'el hagi ussa era dau plaid a Sgr. Lucas Berther de prender sco instructer Sgr. Pacholski. Mo el segi intenzionaus de tschentar las suandontas condiziuns arriguard la commisiun della scola de skis ed el vegli tedlar era nos meinis da vart quellas cundiziuns.