Discuors sur mistregns e mistergners en Tujetsch

dil 18 e 19avel tschentaner    

ils 20 da schaner 1959

Car augsegner, preziadas dunnauns e mattauns, cars vischins da Rueras

Senz’auter ha la cumissiun d’instrucziun fatg in grond sbagl da prender mia pauccadad sco referent per questa sera, ed jeu supplicheschel gia ordavon da buca far illusiuns, spetgond da mei enzatgei che stat en cumparegl cun ils referats antecessurs, seigi quei arisguard cuntegn e fuorma dil discuors ni appartenent lungatg. Denton sundel ualti segirs,  da haver silsuenter da quellas varts bien ruaus. Meinsvart vegn jeu ad haver bein enqual sbagl linguistic, ditgond nuot dallas novissimas reglas ortograficas, che pretendan extendi studis per saver duvrar endretg e correct per exempel mo ils plaids de e da. A quels auditurs presents, che han negin interess per la cultura veglia, per vischins gia daditg en fossa, per la moda e maniera da viver e luvrar vegl, astgel maneivel lubir ina cupidada. Essend che quei studi ei fetg munglus, numnel quella lavur mo ina paterlada, in discuors, beinsavend ch’in discuors pretenda meins grondas qualitads e habilitads.

Preziai auditurs.

Pader Placi a Spescha scriva entuorn gl’onn 1805 sur digl art e mistregns en Tujetsch sco suonda: „Jeu anflel en Tujetsch mo il pictur Diogg, il qual ha giu per mumma ina Tschamutra, sco artist e sco mistergners enzacons mo miez empri, zacons lennaris, scrinaris, calgers, cusunzs, cuntschapials ed in fravi. Tujetsch ei en quei grau gnanc cuvretgs per igl agen diever.“

Jeu vegnel a sebasar era aunc differentas gadas sin notizias da pader Placi e tut quellas ha il numnau mess a scret entuorn gl’onn 1805.

Serestrenschend mo sin il pli necessari per orientar sur ils mistergners dil vitg e dil vischinadi haiel rimnau differentas notizias, las qualas ein per gronda part da vischins da nies vischinadi, als quals jeu lessel era cheu engraziar. Nuotatonmeins haiel era interessantas notizias da vischins d’auters vischinadis e perquei tractel era mistergners d’auters vischinadis.

En general san ins dir cun tutta segirtad ch’ei hagi buca dau mistergners tochen el novissim temps, ch’ein seviventai spirontamein mo cul mistregn. Mintga mistergner haveva in’occupaziun accessoria. Bunamein senz’ excepziun tenevan ei per l’alimentaziun dalla famiglia tiers manedels ni silmeins ina vacca. Ei deva lura (sco era aunc oz) tals che exercitavan duas tochen treis differentas clamadas. Tals che fagevan empau il lennari, iseglias e miradurs, vegnevan sco oz numnai umens tschecs, e quels, lura sco oz, ston buca esser dependents per mintga clavella d’in professiunalist.

Tals umens che eran entras la cuntinuada pratica, arrivai sin in scalem pli che mo la media, che havevan in special dun ed inschign en in rom ni l’auter, che vegnevan lura encuretgs e surprendevan las lavurs dalla clientella per fetg bassa schurnada, ein lura daventai ils mistergners. La schurnada era quei che jeu hai saviu eruir el 17avel tschentaner 1 - 2 flurins, pli tard 2 - 3 francs per di. Avon 1850 vegneva pagau cun rentschs (fl.) 1.70 - 2.10 francs. Talers dalla crusch (3.20 francs) numnai Krizzer. Il rentsch (scret fl.) ha 70 bluzghers e ca. 60 crizzers. Rensch vegn dil plaid tudestg Rheinisch-Gulden, respectiv Rhein-Gold. Ch’ei vegneva pli da vegl era buca quintau cul temps, silmeins buca cullas uras sco oz ei segir. Quellas bialas e fetg bialas lavurs da scrinaris per exempel vid scaffas, puffens-stiva, escha-casa, vid vischala-lenn ni irom, ch’ein oz schi encuretgas ed admiradas, havessen mai saviu vegnir acquistadas da mintga singul sch’ ei havessen stuiu pagar las uras impundidas vid quels products, prendend en consideraziun las relaziuns da luvrar da gliez temps. Quellas ovras fussen sil pli stadas mo en possess da mo ils pli beinstonts. Perquei ch’ils mettels (muneida) eran scartezia. Ei vegneva fatg bia lavur en tgami ni per products agricolas per caschiel, pischada per latg e per tschagrun ed aschia vinavon, sco relaziuns da viver pretendevan pli da vegl denton era buca quei dad oz.

En general vegneva quei che appartegn baghetgs e casas baghegiau mal, tuttavia appartenent partiziuns da casas e proporziuns. Rev. sur Camenisch, plevon a Sedrun 1822 -1832, naschius ils 10 da fenadur 1792 a s.Roc/Medel e morts 1847, sia mumma fuva stada ina Maria Catrina Weller da Sedrun, ha fatg gl’emprem empau architect en Tujetsch. Savend sur Camenisch beinavunda, ch’ei dependi fetg bia ella veta dil carstgaun dil habitar ed insumma da cumadeivlas avdonzas, ha el fatg attents ses vischins sil confort d’ina emperneivla habitaziun. Bia gadas hagi el teniu avon ils avantatgs dalla schubradad. Perquei ha el ton a Platta sco a Sedrun declarau l’uiara al sistem da prender en stiva sut pegna en las clutschieras. Era ils purschals che vevien il previlegi da passentar zatgei jamnas en stiva caulda denter la glieud (perqui ch’ei era vin nuegl memia freid), ha el cun tener la dira pudiu bandischar ord stiva. Udeva el ch’enzatgi hagi el senn da baghegiar casa era el cuninaga sissu e s’interessava dalla construcziun e fageva remadura, cussegliava planisond in niev stil pli corrispundend allas relaziuns higienicas, pli aults locals, finiastras pli grondas etc.

Las casas havevan entuorn 1600 pli u meins tuttas la fuorma da quella dalla Maria Gion Resta, pintga baracca, cun ina truaisch dasperas. Igl ei da supponer, ch’il vitg vin Suloms havevi pli u meins la fuorma da quellas casas, denton quasi tuttas casas dublas. Quei ord ina notizia da pader Placi a Spescha che vus vegnis ad udir plitard. La numnada casa duess esser la pli veglia casa originala, buca midada ni engrondida, baghegiada 1630 (?). La casa veglia da Cavegn Duri Vigeli, ussa baghegiada e habitada dil Maurus era digl onn 1663. En quella casa stevi ina femna che savevi dir: Miu bab mistral, miu um mistral e miu fegl mistral. Il fegl ei staus mistral Gieriet 1829, exact 100 onns avon mistral Vigeli Berther, ch’ei vegnius mistral 1929. Las toppas d’uors ch’eran a mia idea in simbol da dignitad, eran sur igl esch casa, ha il Duri Vigeli vegl, priu giu e vendiu al fravi Ernest Huonder da Mustér e duessen oz aunc esser en in museum a Turitg. Medemamein era ina toppa uors sur igl esch casa da mistral Venzin (ussa Sep Beer). Mistral Venzin-Bisquolm ha baghegiau 1830 la casa speras, oz da Gieriet fargliuns, in empau agen sistem, sco per ustria ni hotel. Quella casa ha fetg carteivel in Beer da Sedrun, tgeinin udis pli tard, cun aunc ils meisters da Rueras giu fatg si. Las casas da Lucas Cavegn, Venzin fargliuns, da Berther Franz e da fravis Caduff, (stada da Berther perdavons ord la casa da Crestas, quella dalla metta da fein ni dil Fridolin sco nus schevan) ein baghegiadas 1752. Pia cuort suenter la lavina da 1749. Quellas casas hagien dus frars Condrau che stevan en casa da soras Monn (dalla Zieta) giu baghegiau. Medemamein quellas dils Huonders, dils frars Giger, dils Derungs casa da Margheta Venzin e la davosa quella dil Bianchi, oz dil Sigisbert Giossi. Quei Bianchi fagevi il currier ni pot e marcadont da purschals.

La maniera da luvrar si la lenna era fetg primitiva. Ils pegns vegnevan derschi cun sigir egl uaul. Da resgias d’uaul negin che saveva. Mussaments ei la zona da cauras da G.G. Berther, sper casa Venzin Margheta, che ha ils mugrins tagliai e pinada la lenna cun sigir. Quella zona ei fetg carteivel stada da Gion Victor Pally, bab da Gion Antoni Pally, tier il qual mia mumma ei stada onns ed onns fumitgasa, dil qual ils Alexis han era giu cumprau la casa (oz da Culastia Cavegn) e baghegiau da niev. Quei baghetg dasperas da righel, da frar Giachen Giusep udeva era al Pally, ch’ei vegnius da lez fatgs si alla mumma, alla famiglia dils fravis pils survetschs prestai e va perquei cun la casa dil Pally oz da Giachen Giusep Berther, che ha giu la medema sort ed ierta.

La casa pia da Culastia Cavegn ei baghegiada dil Giusep Alexi Hitz entuorn 1850. El era lura in dils capomeisters dil vitg. La lenna vegneva tagliada cun la sigir aulta, dulada cun la sigir lada ed allura splanada a maun. Per tetgals vegneva mess si entiras buoras cun in diameter cunvegnent. Sper quels uaffens era aunc la corda ed il vischi da titgira, per filar la lenna ils capos utensils. Per guotas deva ei clavellas, per darschuns roma bein scursada, per far serrar plantschius la stertgora catschada atras la preit el plantschiu. 

Quei Alexi Hitz ha era baghegiau la casa da Leci Peder (Leci Martins) a Cavorgia, stada da Mugglis emigrai. In frar dil Giusep Alexi, il Duri ei emigraus en Frontscha, e la feglia ch’el ha giu leu ei maridada en Spagna ed  hagi oz ina fabrica d’autos. Il baghetg a Plaunsutè hagi el giu baghegiau 1855, ils mirs da Talianers ch’eran cheu a caschun ch’il stradun (la via nova) ei vegnius baghegiaus. Ils Talians han lura era fatg ils mirs cun pilasters en accord 1855 a Milar. Insumma vegnan ils biars baghetgs cun pilasters, da quels ha mintga acla in triep, tuts a dattar da circa quels onns. Carteivel eran ils vischins sfurzai da quei temps da baghegiar ton sco pusseivel nuegl e clavau cun crap, essend che la vischnaunca haveva teniu mal casa cun ils uauls ed ei tuccava spargnar enzanua. Cheu sevirificheschan las renfatschas da pader Placi a Spescha visavi la polizia (suprastonza) d’uauls. Gl’aug fravi per exempel raquintava ch’ el havevi buca survegniu lenna ni dalla vischnaunca ni da privats (vender lenna da sort era ina fallonza che custava daners) per far ils posts finiastra ed hagi stuiu cumprar lenna dils da Cunnel oragiu las Cavorgias.

Avon che cuntinuar culs mistergners, lessel dabot aunc dir dus plaids appartenent construcziuns. Ton ei segir che las midadas da lavurs da tuttas sorts ei fetg bia d’attribuir als mistergners progressivs. Gl’ei per exempel buca vegl, ch’ins ha entschiet a baghegiar baghetgs da righel. Gl’emprem baghetg a Rueras da quella specia ei staus il baghetg dils Mariuschs viagiu Satur e quel da Vigeli Gion Flurin (da Deflorins) oragiu Flurinsut. Baghegiai carteivel dil Carliner (Vigeli Beer vegl). Il palancau dalla baselgia fatga 1731 ha giu fatg in Amman da Schattdorf. Quel fuvi ad Andermatt vid la baselgia e tuor sco capomeister e  clamaus dils vischins da Rueras per la construcziun dalla baselgia. El seigi  secasaus cheu e sin giavisch midau schlatteina e perquei ch’el vegneva numnaus Bruggermacher (pervia dallas punts da baselgia e clutgers) priu il num Brugger. Quei pia duess esser igl origin dils Bruggers.

Pader Placi a Spescha numna denton in Brugger ord ina famiglia dalla Rezia sco avat da Mustér igl onn 1498. Pia existeva quella schlatteina gia avon en Rezia.

Enzatgei haiel ussa emblidau da dir dil Giusep Alexi. Quei era in bien vischler. El ha per exempel fatg tut la vischala lenn per la claustra, naven da curtès e broccas d’alp tochen la pli biala vischala da cuschina ed era arcuns etc. Quel fagevi ina bignera gronda, tier ir per ils tscherchels roms en in di.

Da quei temps luvravan da scrinari era il Gion Rest Caduff ed il Gion Rest Riedi, ni Gion Rest Gion Flurin numnaus cuortamein. Per far finiastras, eschas e mobilias duvravan ei il Gion Rest Caduff, enconuschents per in scrinari cun in bien tagl, per aschi da dir precedents da Christ Giachen Giossi arisguard finezia. Per caschners, pinar ora nuegls, per erpschs da lenn, iseglias empau alla groppa mavan ei tier il Gion Rest Gion Flurin. Il Christ Giachen da pia memoria, ha giu fatg gl’emprendissadi tier in Berther da Segnas ad Altdorf. Gl’emprem ha el luvrau en casa digl aug fravi sin combra, preparau e bagehgaiu ora igl areal vi sper l’aua per saver ranschar en maschinas e trer a nez la forza dall’aua. E lura ha el ensemen cun Vigeli Beer, Carliner baghegiau la casa da Cavegn frars, nua ch’el ha lu giu fatg quei accident che ha custau la giugadira el schanugl. Dil temps da Gion Rest Caduff era a Zarcuns sco capomeister il Duri, bab da mistral, a Camischolas-sura il Gabriel ed a Sedrun il Gamboni.

Il Carliner vegl haveva maridau ina sora da Gabriel che steva a Camischolas-sura dadens viadi da Clavaniev, oz prau da Catriners. Quella sora era la Carlina. Il Vigeli Beer haveva carteivel empriu da lennari da siu sir Vigeli Giusep Beer (1857 - 1931). Quei vegn ad esser stau in zun capavel lennari. Ord notizias che quel ha giu fatg sai dir il suandont: 1839 priu giu la crusch e hucla dalla tuor Sedrun. Crusch 5 peis (30 cm) e 6 zolls, cuppa diameter 1 pei e 9 ½ zoll, crusch nova mess si 1839 5 peis aulta, hucla nova 1 pei 7 ½ zoll, periferia 5 peis ½ zoll. Clutger aults da ......... -finiastra 71 pei, sur finistra tochen crusch 44 peis 1zoll plus crusch  e hucla total 122 peis 2 ½ zoll. Quei meister haveva 4 fegls. Treis ein emigrai el Württemberg sco capomeisters e fatg carriera. In descendent da quel ha in biro d’architect Beer a Turitg ( pli tard 1962-1964 baghegiau la scola nova a Sedrun). In hagi baghegiau il tract da casas a Cuera oriental dalla staziun ed il Gabriel empriu da pictur a Glion, maridaus cun ina Berther da Gion Andriu e secasaus a Camischolas-sura. El fagevi sez las colurs e quellas erien fetg cuzzontas. Havend denton memia pauca lavur da pictur, fageva el era il lennari e quei principalmein ensemen cun il Duri Berther, che ha giu fatg il palancau e tetgam da mia casa. Il Duri Berther ha mussau al Manuel Deragisch da far mugrins casa vid casa da Placi Derungs Sedrun, sco el haveva giu empriu igl onn d’emprendissadi a Cumpadials tier il lennari Bass, tat da scolast Bass Cristian.

Il Manuel ha giu empriu da Gamboni, dil qual il bab era vegnius da Calanca. La biografia da quel san ins leger ord Sin Cadruvi da pader Baseli Berther. Gabriel Beer ei setratgs naven a Cuera 1897, la casa vendida a lennari Toni Loretz da Selva, ch’ei havend lennau la lenna giu sper via, emigraus. Quella lenna ei per part en casa da Cavegn frars sura allegada.

Il bab dil Manuel Deragisch steva a Bugnei ed era ligiacudischs. Quel ha scret ni elaborau il cudisch dell’ Olma Pietusa, schau stampar e ligiau en e vendeva tal 1888. Ual avon haveva Bugnei aunc in auter fetg capavel mistergner, il Hafner. Cun l’arschella ch’el purtava el schierl dalla cava en casa, formava el plascheivla vischala, cueva en fuorn e casegliava cun ella e vendeva la rauba en ed ord Tujetsch. Quei era il Vigeli Deragisch, carteivel gl’emprem mistergner tuatschin cun diplom da capacitad. Da quel hai anflau el Glogn 1929 las suandontas notizias: „Quei Vigeli ei staus gl’emprem mistergner tuatschin cun in diplom da capacitad, il qual el ha acquistau cun 19 onns ils 29 da mars 1834 a Wangen egl Allgäu e suttascrets dil „Stadtschulheiss Weber“ e dil „Zunftvorsteher Ambrosi Wolf“ e dil „Werkmeister Almarz“.

Cul diplom en sac tuorna el a Bugnei sco luvrer e fabricant. El ha sez endrizzau sia hafneria. Sut cuschina en ha el baghegiau il fuorn e dasperas sut la stiva en il laboratori, sia „Töpferscheibe“, models per garnituras etc. El haveva era in pign mulin per far glasura. La gasetta da lezzas uras „Igl amitg della religiun e della Patria“ scriva ils 10 da schaner 1838: „Tujetsch. - En nossa cuminonza entscheiva a flurir ina nova frastga d’industria e commerci. Schon dis ed onns ha la patria grischuna tarmess naven grevas summas daners per vischala ed autras facturas da tiaracotga. Ussa aber havein nus ina fabrica da tals artechels denter nus.“ -  E la gasetta appellescha allas autoritads da vuler sustener l’ industria per promover il beinstar public.

Il fegl Sep Antoni ha el giu tarmess o Flüela per emprender. Leu en in laboratori ual schi primitiv sco Bugnei ha el buca empriu bia da niev. Vinavon di il cronist: La tiarza generaziun vul saver nuot da quei mistregn da pauc. Il Vigeli leva era menar en la pegna da hachla, ha denton giu negin success. Negin leva bandischar ni remplazzar la pegna scalegl. Giu fatg la pegna en casia cun sempel ornament.“

Ual avon ch’il hafner ha giu entschiet ed aviert fatschenta, era a Sedrun en casa dadora da Maurus coiffeur in Marti Valier. Quei um cun ina comba lenn ( la comba lenn duess aunc esser en possess dils mats denter ils requisits da teater) fageva la vischala d’irom.  Quei Marti Valier era vegnius ella lavina da Giuf 1839 e piars la comba. Quels buccals e caffetieras cun ventruns, combas fier e biutsch cun nas, duessen haver il Marti Valier sco creatur. Dapli san ins leger ord „Sin Cadruvi“ da pader Baseli Berther.

Casualmein hai anflau ina notizia da pader Baseli che secloma gl’onn 1658 hagi gl’avat Adalbert ensemen cul cumin dalla Cadi schau per tscheins ad in Bandierel Duri Soliva tut ils fuorns da metal sin territori da Tujetsch. Nua eran quels fuorns e tgei anflavan ni encurevan ei en Tujetsch gia 1600? Pader Placi a Spescha scriva: Jeu hai buca anflau en Tujetsch autra specia da crap che gneis e granit da differentas colurs e quantitad. Ei dat denton sur Rueras e sil Calmut serpentin. Sco ins di, scriva el vinavon, han las alps e Curnera in pign cuntegn da Bleierz e sura Sedrun ed el Run aveinas da real plum. Gep (gips) ei tochen oz vegniu anflau negin. Ton (arschella) denton dapertut. Aschi lunsch notizias da pader Placi. Dapli sur da cavar anflassen ins segir egl archiv. Quei studi e retschercas laschel denton sura ad in referent futur. In grep all’entrada dalla cava da Paliz (davos il Tgom) quella cava vegn  oz numnada stolla, porta il datum 1670. La stolla mavi da Paliz nordvest encunter Selva ed eri schi profunda el cuolm ch’ei udevien entadem quella a tuccond da miezdi enta Selva. Quei ei tradiziun. Encuretg vegneva carteivel in cert mineral ni crap che cunteneva metal. Tgeinin? Forsa argien, fier ualvess, bronza ni plum? Ton ei segir che la crappa vegneva transportada a val, vegneva pisada da falluns per gudignar la materia prima. Ils falluns enta Pardatsch vegnevan menai dall’aua da Nalps. Ton ei segir che vid quellas lavurs duvrava ei umens capavels, che savevan arranschar la lavur, drizzar e rugalar uaffens sco puntgas e tradels etc.

Ina industria pli lucrativa era il barschar caltschina ni plitost cement enta Pardatsch, els fuorns. Certins manegian ch’ils fuorns da caltschina seigien schi vegls sco nossa baselgia da Rueras 1491 e Sedrun 1691, baselgias novas, ni forsa schizun schi veglias sco il casti da Putnengia el 12/13avel tschentaner. Calau da barschar caltschina eisi pér circa igl onn 1900. Adolf Schmed, Cavorgia ei aunc staus capoluvrer dalla gruppa da lenna. En scadin cass stueva quella lavur vegnir fatga da professiunalists, umens che havevan gronda pratica e possedevan habilitads meistrilas. Ils davos fuorns hagien ils frars Hendry da Cavorgia giu, Leci calger, Luis calger, aug Giachen ed il Giachen Martin. Era jasters cumpravan caltschina da Pardatsch. Perfin Ursera che mavan cun buots caltschina sur Cuolm a casa. Cun gl’import da cement en sacs ha quella lavur calau.

Las cavas crap-scalegl a Calmut e Nual sco era plaun Miradas (vil Prau) han il bia jasters giu la concessiun dad explotar. Collumbergs, de Castelbergs da Mustér, la pegna en casa da calger Balzer ei fatga 1789 cun si gl’uoppen, Loccatelli, Jacomets e lu il Baselgia. Era indigens han empruau il cletg da far pegnas, sco Gion Rest Gion Flurin, in Schnoz da Tschamut ed in Riedi che ha fatg la pegna en casa Augustin Riedi 1843.

Cotgla sei vegniu barschau vin Suloms cutgnas e si Fontaunas (Plaun de nuorsas?) ha Gion Fidel Hitz giu catglera da draussa, gnanc ton daditg. Jeu seregordel aunc da quella. A Suloms barschavan ils Giohens.

In liung ed interessant discuors ....... il cavacristallas Gion Antoni Hitz da  pia memoria ha raquintau inaga ni l’autra fetg bia e caussas interessantas. Quei era in interessant mistregn. Pli baul mavi massa glieud per cristallas. Ei enconuschevien denton mo paucs minerals e schevien la crappa dalla pli gronda valeta denter il rufid. El sez hagi anflau bia bi denter il scalgiam da fuorns vegls. Gie perfin el vitg, sper casa da Tschamuns, gest sin sulom dil baghetg encunter casa da Gion Antoni Monn-Beer, davart dadora bess da finiastra ora. Quella casa ei translocada vin Suloms entras in Decurtins, perdavons da pader Pellegrino da Bugnei. En quella casa era in Tschamun Decurtins (casa dils Tschamuns) che mavi per crappa ed a casa vegnevi ella zavrada ed il rufid bess da finiastra ora.

Il pli grond fuorn da cristallas en Tujetsch ei staus silla stgeina Culmatsch, da maun dalla Val Milar. Cheu eri egl intern dil cuolm in fuorn schi grond sc’in caplut. El eri endisch meters liungs e treis meters lads e cira 1.50 meters aults. Umens e femnas da Surrein, Selva e Rueras purtavien lenna si digl uaul Malamusa per sgargliar il glatsch egl intern. Inagada entras sgargliar glatsch, seigi il fuorn daus ensemen, satrond lenna ed uaffens. Il liug ha Gion Antoni Hitz giu mussau pér in dils davos onns. Il fuorn udevi ad in Curschellas da Surrein, in Geromini da Selva, perdavons dalla tatta Tina da Tschamut ed in Riedi da Rueras. Ils da Tschamut mavien in per onns quasi tuts per crappa, per fier (alas carteivel) ella Val Curnera e Cavradi. Ord il cudisch da pader Flurin Maissen saiel schar suandar ils nums dils cavacrappa che suondan tenor alfabet: