Historia(s) e maletgs da Tujetsch - quei ei igl essenzial cuntegn da mia(s) pagina(s). Ti anflas ina massada informaziuns sur da Tujetsch. 

 
Giu Las Rueras. Antruras ina cuntrada da numerus faners, il Rein aunc buca curregius.

La pagina Genealogia presenta las numerusas famiglias tuatschinas naven dil 17avel tschentaner tochen l'entschatta dil 20avel. Historia - Las publicaziuns sur da Tujetsch ein numerusas. Ina roschada da quellas ein d'anflar sin quella pagina. Ulteriuras informaziuns davart Tujetsch anflas Ti era sin la pagina dil Forum cultural Tujetsch e digl Archiv communal da Tujetsch. A nies capo scriptur Vic Hendry ei ina ulteriura pagina dedicada. Ella presenta sia biografia e bibliografia cun biaras recensiuns ed autras informaziuns.

Bien divertiment da sfeglir e perscrutar mia(s) pagina(s). - La Val Tujetsch ha ina historia fascinonta e quella ei d'attribuir a sia situaziun geografica ed alla bellezia dalla val!

Tarcisi Hendry

Il Cadruvi cun la veglia casa da scola cun suren la habitaziun dil caplon. Da vart dretga fuvan las localitads pigl equipament dils pumpiers. Ils anno 1940/50 han duas stizuns anflau dacasa ella part suten cun l'entrada ensi; quei ein ils cusunzs Placi Beer e Placi Berther, il calger Alexander Schmid e plitard la fatschenta da sport da Teofil Schmid-Venzin.

Ina part dalla Val Tujetsch: Egl emprem vonn dalla val: emprema squadra cul vitg da Sedrun; secunda squadra cun Gonda e Camischolas, tiarza squadra cun Zarcuns e Rueras, quarta squadra cun Dieni. El secund vonn schai Selva e Tschamut sesanfla all'entschatta dil tierz vonn.



Il Drun/Run la fin dils onns 1960 (engrondir cun smaccar). Ins vesa fetg bein il liug (oz enasisum il parcadi) nua ch'il Run era semenaus 1834 vi encunter il vitg Sedrun e destruiu ina part dil santeri!! Mira: Malaura 1834
La fotografia lai era persequitar fetg bein ils differents vaus dil Run el decuors da decennis/tschentaners.

Per mei sco "naschius en Casa Sten a Gonda" ei quei ina fascinonta foto. Igl ei mia foto da Gonda d'affonza. Gonda ei la part seniastra, viu dalla foto anora. Cun l'entschatta dils 1970 ein las grondas midadas succedidas! Il Dulezi ha schau svanir il baghetg dalla pervenda e la casa da scola. La resgia dils Solivas ha stuiu svanir e bia auter ei semidau, pil pli el senn positiv. Il Run ei oz bia pli bials e civilisaus. Denton resta il prighel - da quei duess ins adina esser pertschards!!!



Gonda ils onns 1960!