La suandonta descripziun da viadi ei cumparida ella Nova Gasetta Romontscha nr. 38 digl onn 1857. Deplorablamein ei il scribent da viadi buca enconuschents. Sias impressiuns dalla cuntrada e populaziun ein ordvart interessantas.

1857 Tujetsch Impressiuns da viadi

Arrivaus silla collina da Mumpé Tujetsch dat il viandont, che va dalla largia Surselva el stretg Uri, aunc ina legreivla egliada anavos silla maiestusa cadeina dil di e silla cuntrada amfiteatrala da Mustér cun sia imposanta abbazia, va lura tut alla grada vinavon silla davosa terrassa dalla Partsura, ell’amureivla Val Tujetsch. In stupent selvadi cun cuolms pitorescs, oreifras pastiras, fritgeivels funs ed in bi, activ, svelt e legher pievel!
Encunter miezdi sesarvan las vals Nalps, Curnera e Maighels provedidas cun bials glatschers. Viers gl’Uri sesaulza il Badus ni Sixmadun culla fontauna dil Reinsura e visavi l’aulta stgeina dil Crispalt, enamiez egl jarvus cuolm da Milez cul pass ad Ursera; encunter nord dus hazers coloss da 11’000 peis altezia: il Culmatsch ed il Pez Tgietschen; denter en il Tgiern dil Ritzli cun in carpus ed unfiseivel trutg giu ella Val Maderana, che sbucca giul Steg.
Il Bostg, igl ault denter Tujetsch e Mustér, che schai a mesa val e porsch’in oreifer prospect, paress d’esser destinaus per rinforzar signurs e signuras cun frestg’aria e scotga caura. Duess la viafier menar plaunsiu miez il mund tras la Surselva, sche po il Bostg survegnir in renomé europeic, ual sco il magnific Tgiern Maler ella Val Nalps, che fuss tenor las expectoraziuns dils inschigners, che lavuran vid la renomada carta da Dufour, schi remarcabels da muntar sco il Rigi, Faulhorn e Pilatus. Mo donn che nossa biala tiara e sias remarcabladads ein buca pli enconuschentas, schiglioc targessen ellas neutier tut in auter diember da viandonts.
Ual schi bials sco ils cuolms da Tujetsch ein, ual schi bials ein era las pastiras. Quellas porschan buca mo savurus pastg ad in grond diember da tiers, mobein culla fanada, ch’ei vegn cheu segau ora, enviarna Tujetsch 100 armauls! En neginas vischnauncas ei il fein a pastg da schi gronda impurtonza sco cheu. Senza negins funs ein ins el stan d’envernar ina vacca ed ina roscha cauras e forsa aunc vender empau fein. Buca per nuot eis ei vegniu pretendiu dalla cumissiun catastrofala dil circuit “ch’en Tujetsch stett’in pur bein cun nuot rauba”. Igl ei la tiara nua che latg e mèl flessegian sco gia siu vegl num cheltic “Tavaech” (habitaziun el plaun da pastg) dat d’entelgir. Il temps ch’ei vegn fatg fein a pastg ei tut si ella greppa, umens e femnas ein armai cun carpialas e bia bleissas ein schi prigulusas ch’in sulet pass falliu betta en bratscha alla mort. Ils spirituals bandunan quels dis buca la casa, nunsavend qual mument ch’els vegnien clamai per proveder in sventirau. E tonaton lavura tut cun grond ardiment, ed ei seschass dar ina zun interessanta descripziun da quella veta. Ils prauscasa ein fritgeivels ed ins paga pils legi ora tochen miez taler il fest! Salin vegn ei mess ora pauc, persuenter vesan ins ils pli stupents segals, strom da 6-7 peis lunghezia cun grondas e bialas spigias; il dumiec crescha aunc si Tschamut, 5300 peis sulla mar, il pli ault vitg ella Europa, nua ch’ins anfla èrs; il strom vegn zuar buca liungs, mo las spigias ton pli pleinas. Il glin en Tujetsch ei renomaus, el ei tochen in bratsch e miez liungs e dat bia sem. Dad ina curtauna semglin eis ei vegniu fatg tochen 20 curtaunas – ina buna rendita. Ei dat denton onns nua che la purgina lavaga tut ils èrs; aschia legian ins egl urbari dad in purgina el gissiatavel tschentaner, che ha totalmein giu ruinau la raccolta, taluisa che 80 persunas, babs da famiglia cun dunna ed affons, han gl’atun stuiu emigrar giu viers l’Ungaria per buca murir dalla fom.
Tujetsch para d’adina esser stau bein populau, sco ins vesa ord las devastaziuns dalla muria. Igl onn 1584 ha la muria gronda raffau naven mo en Tujetsch 800 persunas; era tiella pestilenza “dallas biergnas” el 17avel tschentaner eis ei iu ruh tier. Ina mumma ord la renomada nobla famiglia de Medel ei da quei temps fugida cun ses dus schumellins silla prada da Cungieri sur Sedrun si. Ins ha anflau leu la mumma morta, mo ils dus fegls eran aunc vivs e tezzavan vid il sein. In da quels senumnava Conradin de Medel, el ei silsuenter vegnius 1665 mistral e 1678 landrehter. Siu frar, in perdert scribent, ei vegnius legius ora sco prenci e prelat dalla claustra da Mustér sut il num Adalbert II. La schlatteina de Medel ei morta ora sco era quella de Putnengia ni Pontaninga, ch’ei sefatga immortala tras igl avat Pieder de Putnengia, il fundatur dalla Ligia Grischa; la ruina dil casti da quella nobla e beinmeriteivla famiglia paradescha aunc ozildi sin in crest sper Rueras
Enconuschent ei il bien humor e l’aulta e clara vusch dils Tujetschins. Els ein adina da buna veglia ed amaturs d’empau canera; sch’ins auda a grend els, sche ston ins tuttina buca tertgar, ch’els seigien malperina ed aunc bia meins ch’els secarghien. Els sedattan ora sin tuts mauns e plirs fan stupentas fatschentas egl jester. Las bialas frestgas mattauns setilan bugen el dumiesti, ed in proverbi di, ins sappi mai nua las mattauns da Tujetsch ed ils cavals laschien lur ossa. Ina profana cumparegliaziun!, schegie ch’il cavagl ei il pli niebel animal da casa; denton ei quei proverbi ina viva emprova che las Tujetschinas hagien dapertut bien esit. Maria Catrina Beer e Culastia Riedi, ch’ein dil temps dils Franzos cumpari en vestgadira dad umens e cul turschet si dies, dattan honorifica perdetga, ch’ei maunchi era buc allas Tujetschinas curascha e patriotissem.
Ils turists, che admiran cheu la biala natira el ravugl da maiestusas muntognas primitivas ed ils naturalists, che fan en quels cuolms ina preziusa raccolta da mineralias, anflan ellas ustrias da Tujetsch bien tractament. Negins viandonts passan spell’ustria dalla Cruna a Sedrun vi, senza star eri e considerar l’admirabla flora, che ornescha si las finiastras dall’entira fatschada; mo era negins viandonts han bandunau quella schitta e schubra casa senza remarcar el “Fremdenbuch” lur cumpleina cuntentientscha.
Basta nus stuein prender cumiau da Tujetsch ed ir sur cuolm. Igl ei las treis e mesa dalla damaun, l’alva pungiess, sch’ei fuss buc en la brentina e pluess. Nus lessan la sera esser a Berna ed igl ei aschia buca da piarder temps. Suandond il cussegl d’in vegl poet tudestg:

Wer reisen will,
Der schweig fein still,
Geh stetten Schritt,
Nehm nicht viel mit,
Tret an am frühen Morgen,
Und lass daheim die Sorgen,

essan nus semess sin viadi ed arrivai a bun’ura ell’Alp Tiarms. In stavel plein vaccas e dus pedagogs, vulgo “schulmeisters”, che mulschan. In tschaler cun plunas curters e silla cruna speras tractats romontschs sulla pedagogia e metodica. Tgei remarcabel cuntrast! Tgei curiositad per in pedagog tudestg, ch’enconuscha buca la veta romantica da nos scolasts! Fuss quei stan, al qual ils geniturs confidan lur pli grond scazi, salarisaus tenor merets, nus lein buca pretender a proporziun dils emploiai federals, lura stessen nos scolasts ella Bassa sper lur affons, e stuessen buc encurir la stad lur paun sco pasturs e signuns. Denton ha quella mala circumstanzia tuttina era enzatgei bien. L’aria alpina, las bunas latgiras e l’emperneivla distracziun ein franc adattadas da consolidar la sanadad dil scolast e mantener sia buna luna. Tedlei aber co quels tractats han anflau la via si Tiarms! In giuven pauc studiau, mo zun premurau scolast, ha seschau pladir leu sco signun culla cundiziun, ch’el possi pladir paster, tgi ch’el vegli. El va tier in talentus collega, che veva sco scolast fatg atras cuors da repetiziun per romontsch e per tudestg e di: “Vul ti prender ad alp tes cudischs da dar scola e denteren mussar empau a mi si d’alp, sche prendel jeu tei sco paster.” Detg e fatg. Tgi sa sch’in scolast d’ina diligenza schi originala ei buca vengonz dalla admissiun?
Rinforzai tras in bien refrestg alpin, bandunein nus vaccas e pedagogs e semettein en tutta cufla sin viadi encunter il lag sil Cuolm d’Ursera, ch’ei daventaus empau classics tras sequenta barbaria succedida leu ils 7 da mars 1799 tiella retirada dils Franzos, che vegnevan persequitai dils Grischuns. Cheu spel lag sebett’in Franzos enschanuglias cun mauns a Diu, cun grossas larmas giu pella vesta e cun ina corda da paternos enta maun roga el murtiradamein per perdun. In herox da Tujetsch, ch’era pinaus da mazzar el, senta commiseraziun; mo cheu seglia in auter pur neutier e di: “Sche ti has buc il cor da mazzar el, sche vi jeu sturnir el”. El peglia pella conna da sia buis cargada, mo dil bletsch daditg buc’ida pli, stermeina quella ton sco el po e sturnesch’il pauper schuldau; mo pren mira – muort la stremblada va la buis, la balla penetrescha il cor dil morder, e quel croda el medem temps per tiara vi.
Era nus currevan dil cuolm giuadora, sco sch’il landsturm persequitass nus, arrivein ad Ursera las otg, el medem mument sco la posta semettein en crotscha, che meina nus tut a galopp tochen Flüela. In viandont, che vul ver e guder nuot, quel dueigi seserrar ella posta!

pdfImpressiuns d'in viadi

Tujetsch Maighels Lag 00

Il Lag Miez a Maighels cun vesta encunter Pez Tiarms (enamiez), dretg la  cadeina dil Crispalt e seniester il Schneehüenerstock!
Denter Pez Tiarms e Crispalt sesanfla la Val Val. La (Fellital) Val Vagliauna (da vigilia "Wache/vegliader") schai denter Schneehüenerstock e Pez Tiarms.


placi-speschaPader Placi a Spescha - igl emprem historiograf dalla val. El ha descret detagliadamein la Val Tujetsch digl onn 1805. Spescha - Pader Baseli
Pader Baseli Berther ha cuntinuau. Sia lavur historica.   Ovras I + Ovras II

UoppenHendry La historia e genealogia dalla schlatteina Hendry da Tujetsch. Il cudisch!

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

     WappenTujetsch
  Vischnaunca Tujetsch

     pleiv
        Pleiv Tujetsch

img01.jpg