Historia(s) e maletgs da Tujetsch – quei ei il cuntegn essenzial da mia(s) pagina(s). Ti anflas numerusas informaziuns sur da Tujetsch.
Giu Las Rueras. Antruras in cuntrada cun numerus faners, il Rein aunc buca curregius.
La pagina Genealogia presenta las numerusas famiglias tuatschinas naven dil 17avel tschentaner tochen l’entschatta dil 20avel. Historia – Las publicaziuns sur da Tujetsch ein numerusas. Ina roschada da quellas ein d’anflar sin quella pagina. Ulteriuras informaziuns davart Tujetsch anflas Ti era sin la pagina dil Forum cultural Tujetsch e digl Archiv communal da Tujetsch . A nies capo scriptur Vic Hendry ei ina ulteriura pagina dedicada. Ella presenta sia biografia e bibliografia cun biaras recensiuns ed autras informaziuns.
Bien divertiment da sfeglir e perscrutar mia(s) pagina(s). – La Val Tujetsch ha in historia fascinonta e quella ei d’attribuir a sia posiziun geografica ed alla bellezia dalla val!
Tarcisi Hendry
 |
 |
Il Cadruvi cun la veglia casa da scola (1848) cun suren la habitaziun dil caplon. Da vart dretga fuvan las localitads pigl equipament dils pumpiers. Il local da vart seniastra surveva primarmein sco magazin da lenna per scola e caplon. Ils anno 1940/50 han duas fatschentas anflau dacasa ella part suten cun l’entrada ensi; quei ein ils cusunzs Placi Beer, Gonda, e Placi Berther, Camischolas, il calger Alexander Schmid, Gonda e plitard la stizun da sport da Teofil Schmid-Venzin, Sedrun.
La Val Tujetsch, la vischnaunca da Tujetsch: Egl emprem vonn dalla val: emprema squadra cul vitg da Sedrun; secunda squadra cun Gonda e Camischolas , tiarza squadra cun Zarcuns e Rueras , quarta squadra cun Dieni . El secund vonn schai Selva e Tschamut sesanfla all’entschatta dil tierz vonn (Prau Mulins). Dalla vart dretga s’audan aunc Surrein e Cavorgia tier la vischnaunca da Tujetsch
Il Drun/Run la fin dils onns 1960. Ins vesa fetg bein il liug (oz enasisum la plazza da giug) nua ch’il Run era semenaus igl onn 1834 vi encunter il vitg da Sedrun e destruiu ina part dil santeri! Mira: Malaura 1834
La fotografia lai era persequitar fetg bein ils differents vaus dil Run el decuors da decennis/tschentaners.
Per mei sco „naschius en Casa Sten a Gonda “ ei quei ina fascinonta fotografia. Igl ei mia foto da Gonda dil temps d’affonza. Gonda ei la part encunter vest dil vitg da Sedrun, ni da l’autra vart dil Run. Cun l’entschatta dils onns 1970 ein las grondas midadas succedidas! Il Dulezi ha piars il baghetg dalla pervenda e la casa da scola da 1887. La resgia dils Solivas ha stuiu svanir e bia auter ei semidau, pil pli el senn positiv. Il Run ei oz bia pli bials e civilisaus. Denton resta il prighel – da quei duess ins adina esser e restar pertschards!!!
Gonda ils onns 1960!