Ell’enzenna dalla glisch
Cloms
Sogn Bab, nus encurin Tia glisch,
che tegn, quietescha e dat curascha a nus.
Bab, pren puccau
Sogn Fegl, nus encurin Tia glisch
ch’accumpogna, schurmegia e lai buca curdar nus.
Sogn Fegl, pren puccau.
Sogn Spért, nus encurin Tia glisch,
che muossa la via, dat forza ed inspirescha nus.
Sogn Spért, pren puccau.
Laud
Segner Bab,
Nus ludein Tei,
pertgei Ti eis glisch.
Nus engraziein a Ti
che Ti laias prender part nus da quella glisch.
Nus rughein Tei,
tarmetta Tia glisch en nus ed entuorn nus.
Bab, Ti nies scaffider. Amen
Sogns
Jesus Cristus,
nus ludein Tei,
pertgei Ti has detg:
Jeu sun la glisch dil mund.
Nus engraziein a Ti,
pertgei Ti has detg: Vus essas la glisch dil mund.
Nus rughein Tei,
tarmetta la glisch als carstgauns che vivan el stgir.
Laud a Ti Jesus Cristus.
Preparaziun
Sogn Spért, pren puccau da nus
ed illuminescha nus.
Sogn Fegl, pren puccau da nus
e meina nus.
Sogn Bab, dai la pasch
e tarmetta Tia glisch sil mund a tuts carstgauns.
Cant final
Sogn Bab, nies scaffider.
Sogn Cristus, nies spindrader.
Sogn Spért, nies sanctificader.
Benedi, schurmegiei ed accumpignei nus tuts.
La glisch dil Bab, dil Fegl ed dil Sogn Spért. Amen
17-12-2019
Quella messa, cumponida da Claudio Simonet, Curaglia, ei vegnida cantada l’emprema gada la fiasta da Nadal digl onn 2021.
Nossa speronza
Survetsch divin da sepultura
Nus clamein (Kyrie)
Segner!
Nos stretgs cunfins,
nossa cuorta vesta,
purtein nus a Ti.
Mida en larghezia.
Cristus!
Nossa cumpleina impussonza,
quei che smacca e schirenta,
purtein nus a Ti.
Mida en forza.
Segner!
Nossa fidonza piarsa,
nossa tema,
purtein nus a Ti.
Mida en glisch.
Dentercant
Nus tedlein ussa Tiu plaid,
che tegn, quietesch’ed encurascha nus.
Tiu plaid ch’accumpogna, rinforza e meina nus.
Tiu plaid ei la vivonda che muoss’a nus la via.
Adina opereschi en nus il Spért divin!
Preparaziun (Offertori)
Nus essan trests mo nus savein:
Carstgauns che vivan dalla speronza, vesan vinavon.
Carstgauns che vivan dalla carezia, vesan pli profund.
Carstgauns che vivan dalla cardientscha,
vesan tut en in’autra glisch.
Nus ludein (Sanctus)
Nus ludein e clamein:
En nus ei stgir,
mo tier Tei ei glisch.
Nus essan persuls,
mo Ti bandunas buca nus.
Nus essan senza curascha,
mo ti gidas nus.
Nus essan malruasseivels,
mo ti schenghegias pasch.
En nus ei petradad,
mo tier Tei ei pazienzia.
Nus capin buca Tias vias,
mo Ti enconuschas la via per nus!
Ludaus seigies Ti Segner!
Fracziun dil paun (Agnus Dei)
Tschut da Diu:
Tiu maun tegn nus.
El quietescha e dat curascha.
Tschut da Diu:
Tiu maun accumpogna nus.
El schurmegia e meina.
Tschut da Diu:
Tegn Tiu maun sur nus e dai a nus la pasch.
Cant final
Cumiau strenscha.
Cumiau fa mal.
Da nies miez mo buca da nies cor.
Mo Tiu surrir ei nossa memoria.
Uss ei l’ura da partenza cheu.
O, Bab, arva Tes mauns
e dai carezia e pasch infinita!
2020
Cumposiziun entras Claudio Simonet, Curaglia, aposta pil Chor da sepultura Tujetsch.
Regurdientscha da Nadal
Il Bambin ei arrivaus,
tras finiastra ei entraus.
Nossa mumma quei annunzia
cun marcanta pronunzia.
Cun prescha e tensiun,
cun gronda perschuasiun,
en stiva sballunein,
la glisch fa bein.
Candeilas ardan,
sbrinzladers sbrenzlan.
In’odur preziusa,
in’atmosfera amurusa.
Canzuns cantein,
ils pachets arvein.
Profund mument,
restond sentiment.
2021
Quella canzun, cumponida da Claudio Simonet, Curaglia, ei vegnida cantada l’emprema gada la fiasta da Nadal digl onn 2021.
La forza dil vargau
Letras ein mo in streh dil vargau.
Ils plaids quentan, els scutinan.
Las lingias summan, frasas sefuorman e daventan realitad vivida.
Ils dis vargai vivan entras perscrutar e nudar.
Misteris neschan, ragudan e leventan historias
e paleisan la raccolta al cor attent e svegliau.
La historia naschida, viva e sveglia il passau.
Il vargau dat speronza e s’entaupa cul present.
El raquent schai pussonza
e dalla profunditad viva la memoria.
La historia ei in scazi.
Ina frastga zarta – sco ina teila che viva.
2024
Tuts texts mess en melodia entras musicist e cumponist Claudio Simonet, Curaglia