Derivonza dils Hendrys
Las ragischs dils Hendry's en Surselva entscheivan a Sursaissa. El decuors dil 12 e 13avel tschentaner arrivan ils Gualsers a Sursaissa. La claustra da Mustér ha ord motivs economics e religius promoviu quella colonisaziun. Da gliez temps cumpigliava il territori dalla claustra il spazi denter il glatscher dalla Rona ed il dutg da S. Pieder a Sursaissa.

Denter ils Gualsers vegn era nudau el rodel dalla claustra da Mustér in Anricus de Sursaxa, da Sursaissa. Quei num duei pli tard esser sesvilupaus al num da famiglia Hendry e Henny. La schlatteina Anricus, era Anrich u Anrigg, ei sesviluppada differentamein sin igl intschess romontsch:

Ella Engiadina: Andri ed Andry

En la vallada dil Rein Anteriur: Anrisch, Candrisch, Denrisch, Caheinrich, Heinrighett, Righett, Raghett, Raghettli, Rigiet, Carigiet.

Tenor il cudisch retic da nums, edius da Konrad Huber, 1986, ei la schlatteina Hendry documentada aschia dapi igl onn 1380.
1380 Jennin Hainrich, Tujetsch/Cascharolas
1500 Petter Heinrici, Tujetsch
1536 Jacob Anrigk, Breil
1540 Jan Hendrych, Siat
1659 Jon dil Hendri, Trun
1694 Franciscus Hendri, Tujetsch/Camischolas

A Breil
A Breil ei Jacob Anrigk documentaus e quei igl onn 1536. Las impurtaziuns dalla schlatteina Hendry els cudischs digl archiv dalla pleiv a Breil entscheivan cun l'annada 1625, pia gia all'entschatta dil gissiatavel tschentaner - pressapauc curonta onns avon che en la Val Tujetsch. Enteifer ils onns 1625–1714 ein treis generaziuns dalla schlatteina Hendry verificadas. Cun igl onn 1702 cala la registraziun dalla schlatta Hendry a Breil. Ed igl ei da crer e supponer che las famiglias seigien mortas ora.
Las indicaziuns nudadas lain supponer che la descendenza cun il num Hendry a Breil vevi ina certa beinstonza. Denter las persunas purtadas els cudischs sesanfla tuttina in Ludovici Jacum Hendry (1685) ch'ei staus statalter. Igl Jacobu Hendry (1651–1693) ha giu igl uffeci da salter ed ei semaridaus cun Della Turre dil fendri Julianem.
Igl exponent dalla schlatteina Hendry a Breil ei il plevon Ludovicus Hendry (1690–1766) staus, in beadi dil statalter Ludovici Jacum. Mintgina dallas treis generaziuns Hendry a Breil ei representada cun il prenum Ludovici.
Ei lai crer che ina certa relaziun seigi stada avon maun denter las famiglias Hendry da Breil e da Tujetsch. Il plevon Ludovicus, Ludivic, Hendry da Breil stat perdetga da matrimoni en Tujetsch ils 28 da fevrer 1696 a Joanem Herni e Julianam gion valentin. Dalla vart dalla famiglia Herni stat Mathea Herni perdetga.
Igl ei senza dubi da supponer ch’in ni l‘auter dils Hendrys da Breil ei serendius en Tujetsch – forsa entras maridaglia e secasai a Camischolas. A Breil ei la schlatteina svanida cun l’entschatta dil 18avel tschentaner.

Herni
Schebein la schlatta Herni, documentada en Tujetsch dils 1664–1750, seigi ina ulteriura fuorma veglia dalla schlatteina Hendry - gliez ei buca lev da dir. Probabel! En mintga cass eis ei da turnar a dir ch'ins hagi pronunziau mal ils nums da lezzas uras e che la scripziun ei semegliontamein stada leusuenter – ord Herni ei daventau Hendri - igl ei iu pli tgunsch da tschintschar cun metter il «d» denteren ed il Hendry ei staus cheu e pli pratics e tschintscheivels!

Igl uoppen dalla famiglia Hendry

UoppenHendry
El cudisch d’uoppens dil cantun Grischun ei l’arma dalla famiglia Hendry buca lien. Ils onns 1950 fa Vic Hendry, Schaffusa/Cavorgia retschercas pertuccont in uoppen dalla schlatteina Hendry. Il biro da heraldica svizzer Raymond Brülhart, sincerescha ch’igl uoppen dalla famiglia Hendry seigi documentaus cun il num
Andreas Hendry
banneret 1619
Banneret significhescha „Bannerherr“, bandierel.

Il num Hendry seigi ina veglia lingia. Da Hendry derivi Henri/Henry en loghens franzos.

Ins ha sincerau la garanzia arisguard igl Andreas Hendry, banneret digl onn 1619. Il num Andreas (Andriu) serepeta facticamein duas ga en las generaziuns dalla schlatteina Hendry en Tujetsch.

Igl uoppen sez ei tschécs:
Treis muotas cun in pégn enamiez ed in treifegl da mintga vart che confirman la fritgeivladad dalla tiara. Il verd sin il funs blau, verd e blau – fan endamen e laudan – curascha e perseveronza.
Igl uoppen sco tal, muotas, pégn ed ils dus treifegls eifer la rama, astgan ins buca tuccar en; el ei nunmideivels. Tut igl odentuorn ei perencunter sulettamein decoraziun.
L’arma digl Andreas Hendry digl onn 1619 veva la dieua Venus enamiez la cruna dil spitg. Muort la dieua onz niua ha Raymond Brülhart, il heraldic digl institut a Losanna, reagau immediat. Ins sappi senz’auter schar d’ina vart la dieua Venus e repeter il pégn ella cruna che seigi la part principala digl uoppen.

Ferton ch’igl uoppen dil banneret Andreas Hendry ei d’in idil campester – ei l’arma englesa d’ina gronda noblezia. Permiez il scut sefan otg travs entraviers cun la musteila gronda. Colurs: Alv e tgietschen. Orasi dalla capellina sestenda in’amuretta (in aunghel cun alas) che tegn in tizun el maun dretg

Indentics cugl uoppen dils Hendry’s ei quel dalla famiglia Enderlin da Montzwick da Maiavila.

Emprema menziun
L'emprema registraziun d'in Hendry en Tujetsch datescha pér digl onn 1694. Il cudisch pren denton sia entschatta gia igl onn 1664 - pia da quei da 30 onns neginas impurtaziuns, igl ei denton da precisar che da certs da quels onns mauncan las indicaziuns dils battens.
Persuenter cumpara la schlatta Herni, quei cun naschientschas entochen 1694. Igl ei grev da giudicar, schebein ei exista ina relaziun segira denter la schlatta Henri e Hendry. Selubir da dir gie ei carteivel buca falliu!

Il cudisch da battens cuntegn ils suandonts Henris.

1664 Maria feglia d'Andriu Herni e Margarita Gion Paul Regiet
1665 Andreas fegl da M. Andriu Herni e Margarita de Conill
1670 Margaritham feglia da Christina Herni
1691 Maria Margarita feglia da Mathei Herni e Margarita Lorenz
1694 Anna Maria feglia da Mathei Herni e Margarita Christ Loreng

Cudisch da morts
1666 M. Andreas Herni
1677 Christina Herni
1703 Mathei Herni
1756 Juliana Herni (uxor Cristian de Gonda)
1756 Margarita Herni (prioris soror libera)
1758 Anna Maria Herni
1766 Margarita Herni

Scripziun
Las variantas screttas duront tschentaners: Herni, Hendri, Hendrj e lu sco oz Hendry e quei per l’emprema gada cun “y” igl onn 1860 el register dalla pleiv e dapi lu ei quella fuorma semantenida tochen al di dad oz.
Remarcabel - aunc 1852 suttascriva Giachen Martin Hendry cun HENRI. Il document cheusut confirma. Il text dil document ei buca meins interessants. Igl onn 1852 eis el emigraus ell'America ed ha stuiu prender si daners ed ils geniturs ein stai buns. Il cuntegn dalla brev secloma:

Tujetsch, ils 30 d’october 1852
Jeu alla fin suttascret Giachen Martin Hendri confessel cheutras dad oz haver retschiert daners d’emprest ina summa da 200 fl. ils quals fan en svizzers francs 340 frs., per ils quals il siu bab e mumma ein s’obligai ni s’obligeschan da tscheinsir ils 5% per tschien cun metter in sufficient Underfand a Fops prau grass che ils crediturs
seigein cuntents e che seigi liber e che negin empignau per la sura empristada seigi oz realmein daventau dils frars Giachen Martin e Duri Berther, sche confessa il sura Hendri Giachen Martin ed il bab Duri cun siu num
Suttascrivel jeu cun miu num
Giachen Martin Henri

1852 Tujetsch Henri

Era quella versiun che suonda ei vegnida praticada dils ufficials da vischnaunca el quen communal digl onn 1885/86, numnadamein Hendrich.
1885 Tujetsch Hendrich

Quella fuorma serepeta 1864 cun Luis Hendrich e medemamein cul medem num igl onn 1891. Tier la concessiun da lenna igl onn 1864 noda il gerau aschia: Dapli ei era concediu als Endris da Surrein da far si ina talina sper siu baghetg ol Plaun s. Leci. La schlatteina Enderlin cul medem uoppen vegn scochemai endamen e lai trer parallelas.

Els registers dalla baselgia ein ils nums vegni nudai duront tschentaners ella fuorma latina. Culs registers civils menai dils ufficials civils dalla vischnaunca semida quei. Ils registraturs prendan meinsvart la libertad da scriver sco ei manegian e fan schizun pil pli diever dil tudestg. Aschia dat ei Johann Jacob enstagl da Gion Giachen, Vigilius Joseph enstagl dil bi Vigeli Giusep, Barbara Dorothea enstagl dalla Barla Turtè, Katharina enstagl da Catrina ……

 EN ELAVURAZIUN (Nova versiun) !!!

 

placi-speschaPader Placi a Spescha - igl emprem historiograf dalla val. El ha descret detagliadamein la Val Tujetsch digl onn 1805. Spescha - Pader Baseli
Pader Baseli Berther ha cuntinuau. Sia lavur historica.   Ovras I + Ovras II

UoppenHendry La historia e genealogia dalla schlatteina Hendry da Tujetsch. Il cudisch!

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

     WappenTujetsch
  Vischnaunca Tujetsch

     pleiv
        Pleiv Tujetsch

img04.jpg